މި ދުވަސްތަކުގެ ތެރޭގައި ހިމެނޭ އެންމެ މާތް ދުވަހަކީ ހައްޖު ދުވަސް ނުވަތަ އަރަފާތު ދުވަސް ކަމަށާއި، މި ދުވަހަކީ ފާފަ ފުއްސެވުމާއި އަފޫ ކުރެއްވުމުގެ ދުވަސް ކަމަށް ހުކުރު ޚުތުބާގައި ބުނެފިއެވެ.

"އަރަފާތު ދުވަހުގެ މާތްކަން" މި މައުޟޫއަށް އިއްވި ހުކުރު ޚުތުބާގައި ބުނީ އަހަރުމެން މިހާރު ވޭތުކުރަމުންމިދާ ހައްޖުމަހުގެ ފުރަތަމަ 10 ދުވަހަކީ ހެޔޮކަމާއި ބަރަކާތުން ފުރިގެންވާ ދުވަސްތަކެއް ކަމަށެވެ. މިއީ ކުރެވިފައިވާ ފާފަތަކުން ތައުބާވުމުގެ ދުވަސް ކަމަށާއި، ހެޔޮއަމަލުކުރުން ގިނަކޮށް އާޚިރަތުގައި ބާއްޖަވެރިކަން ލިބިގަތުމުގެ ދުވަސް ކަމަށް ޚުތުބާގައި ބުނެފައިވެއެވެ.

މި ދުވަސްތަކުގެ ތެރޭގައި ހިމެނޭ އެންމެ މާތް ދުވަހަކީ ހައްޖު ދުވަސް ކަމަށާއި، އެ ދުވަހު އަރަފާތު ބިމަށް ޖަމާވެފައިވާ ހައްޖުވެރިންގެ ފާފަތައް ފުއްސަވައިދެއްވާނެ ކަމަށް ޚުތުބާގައި ބުނެފައިވެއެވެ. ހައޖްުގެ އަޅުކަން އަދާކުރުމުގެ ނަސީބު ނުލިބޭ މީހުންވެސް މި ޡަވާބުން މަހުރޫމު ނުވާ ކަމަށާއި، އެމީހުން އަރަފާތު ދުވަހު ރޯދަ ހިފުން މޮޅުއިތުރުވެގެންވާކަމަށް ޚުތުބާގައި ބުނެފައިވެއެވެ.

މީގެ އިތުރުން އަޟްހާ އީދު ދުވަހުވެސް އެހެން މީހުންނަށް ހެޔޮ ފޯރުވައި އެހީތެރިވާންޖެހޭކަމަށް ޚުތުބާގައި ބުނެފައިވެއެވެ. މި ދުވަހު އުޟްހިޔާ ކަތިލުމަކީ ތަނަވަސްކަން ލިބިގެންވާ މީހުންނަށް ގަދަވެގެންވާ ސުންނަތެއް ކަމަށް ބުނެފައިވެއެވެ.

ޚުތުބާގައި އިތުރަށް ބުނީ އިސްލާމްދީނުގައި މިއިން ކޮންމެ މުނާސަބަތެއްވެސް ފާހަގަކުރެވެނީ މާތް ﷲއަށް ކުރެވޭ މަތިވެރި އަޅުކަމަކުން ކަމަށެވެ. ޝުކުރުވެރިކަމާއެކު ކުރެވޭ ނަމާދަކުން ކަމަށާއި، މި ނަމާދުގައި ބައިވެރިވުމަކީ ސުންނަތްކަން ގަދަވެގެންވާ ކަމެއް ކަމަށް ޚުތުބާގައި ފާހަގަކުރެއެވެ.