ހަމްޕުއާއި ދާދުގެ ލަނޑުން ރާއްޖެއަށް މުހިންމު މޮޅެއް

ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖެ ކުޅުނު ފުރަތަމަ މެޗު ބޫޓާނާ ވާދަކޮށް 2-0ން ކާމިޔާބުކޮށްފިއެވެ.

މީގެ ކުރިން ދުވަހަކުވެސް ރާއްޖެ އަތުން މޮޅުވެފައިނުވާ ބޫޓާން ކޮޅަށް މެޗުގެ ފުރަތަމަ ލަނޑު ޖެހީ ހަތް ވަނަ މިނިޓްގައި ލިބުނު ޕެނަލްޓީއަކުން، ހަމްޒާ މުހައްމަދު (ހަމްޕު)އެވެ. ދެވަނަ ލަނޑު ޖެހީ މެޗުގެ ފަހު މިނިޓްގައި ނާއިޒް ހަސަން (ދާދު)އެވެ. ރާއްޖެއާއި ބޫޓާން މީގެ ކުރިން ކުޅުނު 9 މެޗުވެސް ކާމިޔާބުކުރީ ރާއްޖެއެވެ.

ނަމަވެސް މި މެޗުގެ ބޮޑުބައި ކޮންޓްރޯލްކޮށްގެން ރަނގަޅު ހަމަލާތައް ފޮނުވާލާފައިވަނީ ބޫޓާނެވެ. މީގެ ތެރެއިން ގިނަ ހަމަލާތައް ދިފާއުކުރީ މުޅިން އަލަށް ގައުމީ ޖާޒީގައި ކުޅުނު ކީޕަރު، ހުސައިން ޝަރީފެވެ. ރާއްޖެއިން ގުޅިގެން ރަނގަޅަށް ކުޅެން ފެށީ، އަލީ ފާސިރު (ސެންޓޭ) ފަހު ހާފުގައި ކުޅެން ނެރުނު ހިސާބުންނެވެ. ނަމަވެސް ސެންޓޭއާއި ހަސަން ރާއިފް އަހުމަދު (ހަންނަ)، އަދި ދާދުއާއި އިބްރާހީމް ވަހީދު ހަސަން ފޮނުވާލި ބޯޅަ ބޫޓާން ކީޕަރު ދިފާއުކުރިއެވެ.

މި މެޗުގެ އިތުރު ވަގުތުގައި ރާއްޖޭގެ ހަންނައަށް ދެވަނަ ރީނދޫ ކާޑާއެކު ރެފްރީ ރަތްކާޑު ދައްކައި ދަނޑުން ފޮނުވާލިއެވެ.

މި ގްރޫޕުގެ ފުރަތަމަ ދެ މެޗަށްފަހު ރާއްޖެއާއި ލެބަނަންއަށް ވަނީ ތިން ޕޮއިންޓް ލިބިފައެވެ. ލެބަނަން މޮޅުވީ މިއަދު ހަވީރު ބަނގްލަދޭޝް އަތުން 2-0ންނެވެ.

ބުދަ ދުވަހުން ފެށިގެން، އަންނަ މަހުގެ ހަތަރަކަށް އިންޑިޔާގެ ބެންގަލޫރުގައި ކުރިއަށްދާ މުބާރާތުގެ ސެމީއަށްދާނީ ކޮންމެ ގްރޫޕަކުންވެސް އެންމެ ގިނަ ޕޮއިންޓް ހޯދާ ދެ ޓީމެވެ. ގްރޫޕް އޭގައި މިވަގުތު ކުރީގައި އޮތީ ޗެމްޕިއަން އިންޑިޔާއެވެ. ދެވަނާގައި ކުވެއިތެވެ. މި ގްރޫޕުގައި ދެން ހިމެނެނީ ނޭޕާލާއި ޕާކިސްތާނެވެ.