ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރަށް ހަމަލާދިން މައްސަލާގައި ހައްޔަރުކުރި އިބްރާހީމް އަބްދުﷲ (ގައްބަރޭ)ގެ ބަންދަށް ކްރިމިނަލް ކޯޓުން އިތުރު 14 ދުވަސް ޖަހައިދީފިއެވެ.
އިބްރާހީމް އަބްދުﷲ ހައްޔަރުކޮށް، ތަހުގީގަށް އޭނާ ބަންދުކުރަން ކޯޓުން އެންމެ ފުރަތަމަ ޖަހައިދިން 30 ދުވަހުގެ މުއްދަތު ހަމަވުމުން، އޭނާގެ ބަންދާ މެދު ގޮތެއް ނިންމުމުގެ އަޑުއެހުމެއް ބުރާސްފަތި ދުވަހު ވަނީ ބާއްވާފައެވެ.
ރައްޔިތުންގެ މަޖިލީހުގެ މަތިވެރީ ދާއިރާގެ މެންބަރު ހަސަން ޒަރީރަށް ހަމަލާ ދީފައިވަނީ މެއި 1 ވަނަ ދުވަހު، ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށެވެ.
ފުލުހުން ބުނީ، ގްރޫޕް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގައި، މީހަކު މަރާލަން އުޅުނުކަމުގެ ތުހުމަތު އިބްރާހީމް އަބްދުﷲގެ މައްޗަށް ކުރެވޭކަމަށެވެ.
ފުލުހުން މައުލޫމާތު ދިންގޮތުގައި، މެންބަރު ޒަރީރަށް ހަމަލާ ދީފައިވަނީ ނުރައްކާތެރި ހަތިޔާރެއްގެ ގޮތުގައި ބެލެވިދާނެ އެއްޗެއް ބޭނުންކޮށްގެންނެވެ. ނަމަވެސް ހަމަލާއާ ގުޅިގެން މެންބަރު ޒަރީރަށް ސީރިއަސް އަނިޔާއެއް ލިބިފައެއް ނުވެއެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
