53.33 މިލިއަން ރުފިޔާއަށް، ނޫމަރާ ބަނދަރު ތަރައްގީކުރުމުގެ މަސައްކަތް އެމްޓީސީސީއަށް
455 ދުވަހުގެ ތެރޭގައި ނިންމަންޖެހޭ
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ށ. ނޫމަރާ ބަނދަރު ތަރައްގީކުރުމުގެ މަޝްރޫއު ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ ހަވާލުކޮށްފިއެވެ.
ބުރާސްފަތި ދުވަހު ބޭއްވި ރަސްމިއްޔާތެއްގައި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ ޒީނިޔާ ހަމީދެވެ.
މި މަޝްރޫއުގެ ދަށުން 5076 ކިއުބިކް މީޓަރުގެ ސަރަހައްދެއްގެ، ކުރިން ފުންކޮށްފައިވާ ފަޅު އަލުން ފުންކުރުމާއ،ި 34,386 ކިއުބިކް މީޓަރުގެ ސަރަހައްދެއްގެ އައު ހާބަރ ބޭސިން ފުންކުރުމާއި، 2920 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 302.60 މީޓަރުގެ ސަރަހައްދެއްގައި ބޭރުތޮށިލުމާއ،ި 64 މީޓަރުގެ ސަރަހައްދެއްގައި ރިވެޓްމެންޓް ޖެހުމާއ،ި 177 މީޓަރުގެ ސަރަހައްދެއްގައި އެއްގަމުތޮށި ލުމާއ،ި 32 މީޓަރުގެ މިހާރު ހުރި އެއްގަމުތޮށި މަރާމާތު ކުރުމާއ،ި މޫރިންގ ބޯއީސް ހަރުކުރުމާއ،ި 11 މީޓަރު ދިގު 11 މީޓަރު ފުޅާ ރޭމްޕެއް ހެދުމާއ،ި ދެ ޖެޓީއެއް ހެދުމާއ،ި ބަނދަރު ބައްތި ހަރުކުރުމާއ،ި 1652 ސްކޮޔަރ މީޓަރުގެ ސަރަހައްދެއްގައި ޕޭވްމަންޓް ހެދުމާއ،ި 311 މީޓަރުގެ ސަރަހައްދެއްގައި ކާރބްސް ހަރުކުރުމުގެ މަސައްކަތް ހިމެނެއެވެ.
މި މަޝްރޫއު، 53.33 މިލިއަން ރުފިޔާއަށް އެމްޓީސީސީއާ ހަވާލުކޮށްފައިވަނީ 455 ދުވަހުގެތެރޭގައި ނިންމާ ގޮތަށެވެ. މި މަޝްރޫއުގެ އަމަލީ މަސައްކަތް ފެށުމަށް ހަމަޖެހިފައިވަނީ އެންވަޔަރަންމަންޓަލް އިމްޕެކްޓް އެސެސްމަންޓެއް ހެދުމަށްފަހުއެވެ.
500އެއްހާ މީހުންގެ އާބާދީއެއް އޮންނަ ނޫމަރާ ރައްޔިތުން އާމްދަނީ ހޯދުމަށްޓަކައި އާއްމުކޮށް ވަޒީފާ އަދާކުރަނީ ޕަބްލިކް ސެކްޓަރުގައެވެ. އަދި ރިސޯޓްތަކުގައި މަސައްކަތްކުރާ ޒުވާނުންނާއި ވަޑާމުގެ މަސައްކަތުގައި އުޅޭ މީހުންވެސް މަދެއްނޫނެވެ.
ނޫމަރާ ކައުންސިލުން މައުލޫމާތުދޭގޮތުގައި، ބަނދަރު ތަރައްގީކުރުމުގެ މަޝްރޫއުގެ މަސައްކަތް ނިމުމާއެކު ވަރަށް ބޮޑު ލުއިފަސޭހައަކާއި ހިތްހަމަޖެހުމެއް ރަށު ރައްޔިތުންނަށް ލިބޭނެއެވެ. މީގެ ކުރިން ދިމާވަމުން އަންނަ، ބޭރުތޮށީގެ މައްސަލަތަކާއި ކުއްލިކުއްލިއަށް ނެރު ފުންކުރަންޖެހުމުގެ މައްސަލަތަކަށް އޭރުން ހައްލެއް ލިބިގެންދާނެއެވެ. އަދި ޖާގަ ތަނަވަސް, ޒަމާނީ ބަނދަރެއް ރައްޔިތުންނަށް ލިބ،ި އޮޑިފަހަރު ފަރަށް އެރުމުގެ ހާދިސާތަކަށް ނިމުމެއް އަންނާނެ ކަމަށް ކައުންސިލުން ބުނެއެވެ.
