ބަންދު ގިނަ ދުވަސްތަކެއް އައިނަމަވެސް ޕޯޓްގެ އޮޕަރޭޝަނަށް ހުއްޓުމެއް ނާންނާނެ: ސީއީއޯ ޝާހިދު
ޕޯޓް އޮޕަރޭޝަން ބަންދުވާނީ ދެ ދުވަހަށް
މޯލްޑިވްސް ޕޯޓްސް ލިމިޓެޑްގެ ސީއީއޯ، ޝާހިދު އަލީ
އަޟްޙާ ޢީދާ ގުޅިގެން ބަންދު ގިނަ ދުވަސްތަކެއް އައިނަމަވެސް ޕޯޓްގެ އޮޕަރޭޝަނަށް ހުއްޓުމެއް ނާންނާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ ޝާހިދު ޢަލީ ވިދާޅުވެއްޖެއެވެ.
ރާއްޖެއެމްވީއަށް ދެއްވި ޚާއްޞަ އިންޓަވިޔުގައި ޝާހިދު ވިދާޅުވީ ޕޯޓް އޮޕަރޭޝަން ބަންދުވާނީ ދެ ދުވަހަށް ކަމަށާއި، އެއީ ހައްޖު ދުވަހާއި އަޟްޙާ ޢީދު ދުވަސް ކަަމަށެވެ. ބަންދަށް ގިނަ ދުވަސްތަކެއް ލިބުނު ނަމަވެސް އެހެން ދުވަސްތަކުގައި މަސައްކަތްތައް ކުރިއަށްދާނެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ވިޔަފާރިވެރިންނަށް ދަތިނުވާނެހެން ހުރިހާ އިންތިޒާމެއް ހަމަޖައްސަމުންދާކަމަށެވެ.
އަޟްޙާ ޢީދު ބަންދާ ދިމާކޮށް ގިނަ އަދަދެއްގެ މުދާ ވަނީ ކްލިއަރ ކޮށްފައެވެ.
ބަންދު ގިނަ ދުވަސްތަކެއް އައިނަމަވެސް ޕޯޓްގެ އޮޕަރޭޝަނަށް ހުއްޓުމެއް ނާންނާނެ ކަމަށް އެމްޕީއެލްއިން ބުނެފައިވާއިރު، މިމަހުގެ 25ން 29ށް ވަނީ ސަރުކާރުގެ ބަންދު ދުވަސްތަކުގެ ގޮތުގައި ކަނޑައަޅާފައެވެ. އެހެންކަމުން ދެން ސަރުކާރު ހުޅުވޭނީ ޖުލައި 2 ވާ ހޯމަ ދުވަހެވެ.
