ވޯޓާސް ލިސްޓަށް މިހާތަނަށް 185 ޝަކުވާ ހުށަހަޅައިފި

ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލާ މީހުންގެ ލިސްޓަށް އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާއިރު ޖޫން މަހުގެ 20 ވަނަ ދުވަހުގެ ނިޔަލަށް 185 ޝަކުވާ ހުށަހަޅާފައިވާކަމަށް އިލެކްޝަންސް ކޮމިޝަން (އީސީ) ން ބުނެފިއެވެ.

އިލެކްޝަންސް ކޮމިޝަނުން ވަނީ ޖޫން 22 ވާ ބުރާސްފަތި ދުވަހުގެ ނިޔަލަށް ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައެވެ. އެ ކޮމިޝަނުން ޖޫން 21 ވަނަ ދުވަހު އާންމުކޮށްފައިވާ ތަފާސްހިސާބުތަކަށް ބަލާއިރު އެންމެ ގިނައިން ޝަކުވާ ހުށަހަޅާފައިވަނީ މަރުވެފައިވާ މީހުންގެ ނަން ލިސްޓުގައި ހިމެނިގެންނެވެ. އޭގެ 148 ޝަކުވާ ހުށަހަޅާފައިވެއެވެ. އެއަށްފަހު ދެން އެންމެ ގިނައިން ޝަކުވާ ހުށަހަޅާފައިވަނީ އެޑްރެސް ބަދަލުވެގެންނެވެ. އެޑްރެސް ބަދަލުވެގެން 21 ޝަކުވާއެއް ހުށަހަޅާފައިވެއެވެ.

ލިސްޓުގައި ނަން ނެތިގެން 10 ޝަކުވާ ހުށަހަޅާފައިވާއިރު ދާއިރާ ބަދަލުވެގެން 3 ޝަކުވާ އަދި ނަން ބަދަލުވެގެން 2 ޝަކުވާ އަދި އައިޑީ ކާޑު ބަދަލުވެގެން އެއް ޝަކުވާ ހުށަހަޅާފައިވެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން އީސީގެ ރައީސް ފުއާދު ތައުފީގު ވިދާޅުވެފައިވަނީ ދުވަހުން ދުވަހަށް ޝަކުވާތަކަށް އެޓެންޑްކުރަމުންދާކަމަށެވެ. ދުވަހުން ދުވަހަށް ޝަކުވާތަކަށް އެޓެންޑްވަމުންދަނީ ޝަކުވާ ހުށަހެޅުމުގެ މުއްދަތު ހަމަވާއިރު ފައިނަލް ލިސްޓް ވީހާވެސް އަވަހަށް އެކުލަވާލުމަށްކަމަށް ފުއާދު ވިދާޅުވިއެވެ. ފައިނަލް ލިސްޓް އާންމުކުރުމާއެކު ދެން ލިސްޓަށް ބަދަލުނުގެނެވޭނެކަން ފާހަގަކުރައްވާ ފުއާދު ވިދާޅުވީ މިމުއްދަތުގެ ތެރޭގައި ލިސްޓުގައި އެމީހެއްގެ ނަން އޮތްތޯ ޗެކްކޮށް ޝަކުވާ ހުށަހެޅުން ވަރަށް މުހިންމު ކަމަށެވެ.

އީސީން ވަނީ މެއި މަހުގެ ތެރޭގައި ވެސް ވޯޓާސް ލިސްޓު އާންމުކޮށް ޝަކުވާ ހުށަހެޅުމަށް ހުޅުވާލާފައެވެ. ފުއާދު ވިދާޅުވީ އެ މުއްދަތުގެ ތެރޭގައި ވެސް ޝަކުވާ ލިބިފައިވާކަމަށެވެ. އެގޮތުން ނިޔާވެފައިވާ 93 މީހެއްގެ ނަން ލިސްޓުގައި އޮވެގެންނާއި، އެޑްރެސް ބަދަލުވެގެން 88 ޝަކުވާ އާއި 18 އަހަރު ނުވާ 3 ޝަކުވާގެ އިތުރުން ނަން ބަދަލުވުމުގެ ޝަކުވާއެއް ހުށަހެޅުނުކަމަށެވެ.

2023 ސެޕްޓެމްބަރު 9ށް 18 އަހަރު ފުރޭ 282672 މީހުންގެ ވޯޓުދިނުމުގެ ޙައްޤު ލިބިފައިވާ ލިސްޓު ދިވެހި ސަރުކާރުގެ ގެޒެޓްގައި ވަނީ ޝާއިޢުކޮށްފައެވެ. ލިސްޓުގައި ނަން އޮތްތޯ 1414 އަށް ގުޅައިގެން ނުވަތަ އެސް.އެމް.އެސްއެއް ފޮނުވައިގެން ވެސް ޗެކް ކުރެވޭނެއެވެ. މި ލިސްޓު އީސީގެ ވެބްސައިޓުންނާއި، ރަށު ކައުންސިލްތަކާއި، ސިޓީ ކައުންސިލްތަކުގެ އިދާރާއިން ވެސް ބެލޭނެއެވެ.