"ނޭޓޯގެ މެމްބަރަކަށްވުމުގެ ދައުވަތު އަންނަ މަހު ޔޫކްރެއިނަށް ލިބޭނެކަމަށް އުންމީދުކުރަން"
ޔޫކްރެއިނުން ދަނީ އެގައުމުން ނޭޓޯގެ މެމްބަރު ގައުމުތަކުގެ ތާއީދު ހޯދުމަށް ކުރަންޖެހޭ ކަންކަމާމެދު އެމެރިކާއާ މަޝްވަރާކުރަމުން
ނޭޓޯގެ މެމްބަރަކަށްވުމުގެ ދައުވަތު އަންނަ މަހު ޔޫކްރެއިނަށް ލިބޭނެކަމަށް އުންމީދުކުރާކަމަށް އެގައުމުން ބުނެފި
ނޭޓޯގެ މެމްބަރަކަށްވުމުގެ ދައުވަތު އަންނަ މަހު ޔޫކްރެއިނަށް ލިބޭނެކަމަށް އުންމީދުކުރާކަމަށް އެގައުމުން ބުނެފިއެވެ.
ޔޫކްރެއިންގެ ރައީސްގެ ޗީފް އޮފް ސްޓާފް އެންޑްރީ ޔެރްމަކް ވަނީ، އަންނަ މަހު ވިލިނަސްގައި ބޭއްވުމަށް ހަމަޖެހިފައިވާ މިލިޓަރީ އެލަޔަސް ސަމިޓްގައި، ނޭޓޯގެ މެމްބަރަކަށް ވުމަށް، "އޯޕަން ޑޭޓް"އަކާ އެކު ޔޫކްރެއިނަށް ދައުވަތެއް ލިބޭނެކަމަށް އެގައުމުން އުންމީދުކުރާކަމަށް ބުދަ ދުވަހު ވިދާޅުވެފައެވެ.
އޭނާ ވަނީ މި ސަމިޓްގައި މިފަދަ ދައުވަތެއް އެގައުމަށް ނުލިބިއްޖެނަމަ، މިހާތަނަށް ގަދަ ހިތްވަރާއެކު މަސައްކަތްކުރަމުންދާ ޔޫކްރެއިންގެ ރައްޔިތުންނަށް ވަރަށް ބޮޑު މާޔޫސްކަމެއް ލިބޭނެކަމަށްވެސް ވިދާޅުވެފައެވެ.
މީގެ އިތުރުން، އެގައުމުން ނޭޓޯގެ މެމްބަރު ގައުމުތަކުގެ ތާއީދު ހޯދުމަށް ކުރަންޖެހޭ ކަންކަމާމެދު އެމެރިކާއާ މަޝްވަރާކުރަމުން ދާކަމަށްވެސް އޭނާ ވަނީ ވިދާޅުވެފައެވެ.
މިސަމިޓު ބާއްވަން ހަމަޖެހިފައިވަނީ އަންނަ މަހުގެ 11 އަދި 12 ވަނަ ދުވަހުއެވެ.
ޔޫކްރެއިންގެ ރައީސް ވޮލޮޑިމީރް ޒެލެންސްކީ ދަނީ އެގައުމަކީ ނޭޓޯގެ މެމްބަރު ގައުމަކަށް ހެއްދެވުމަށް ވަރަށް ބޮޑަށް މަސައްކަތްކުރައްވަމުންނެވެ. އެހެން ނަމަވެސް، ރަޝިއާއާ އެގައުމާ ދެމެދު ކުރާ ހަނގުރާމަ ނިމުމަކަށް ނާންނަނީސް އެކަން ކާމިޔާބު ނުވާނެކަމަށްވެސް ޒެލެންސްކީ ވަނީ ވިދާޅުވެފައެވެ.
