އެކުވެރި ކަމުގެ މެޗުގައި ސެނެގާލް އިން ބްރެޒިލް ބަލިކޮށްފި

ބައިނަލްއަޤުވާމީ ރަޙުމަތްތެރިކަމުގެ މެޗުގައި ސެނެގާލް އިން ބްރެޒިލް ބަލިކޮށްފި އެވެ.

ސެނެގާލާ ދެކޮޅަށް ކުޅުނު މެޗުގައި އެންމެ ފުރަތަމަ ލަނޑު ޖަހައި ކުރި ހޯދީ ވެސް ބްރެޒިލް އެވެ. މެޗުގެ 11 ވަނަ މިނެޓުގައި ޒުވާން ކުޅުންތެރިޔާ ވިނީޝިއަސް ޖޫނިއާ ތަނަވަސް ކޮށްދިން ފުރުސަތެއްގައި ބްރެޒިލަށް ލީޑު ނަަގައިދިނީ ލޫކަސް ޕަކޭޓޭ އެވެ. ނަމަވެސް ފުރަތަމަ ހާފު ނިމުމުގެ ކުރިން ސެނެގާލް އިން ލަނޑު ޖަހައި ނަތީޖާ ހަމަހަމަ ކުރި އެވެ. 22 ވަނަ މިނެޓުގައި ސެނެގާލަށް ނަތީޖާ ހަމަހަމަ ކޮށްދިނީ ހަބީބް ޑިއާލޯ އެވެ. ދެ ވަނަ ހާފު ފަށައިގެން ސެނެގާލަށް ފުރަތަމަ ފަހަރަށް ލީޑު ލިބުނީ ބްރެޒިލްގެ ޑިފެންޑަރު މާކީނިއޯސް އަތުން ބައި ކޮޅަށް ވަތް ލަނޑުންނެވެ. އޭގެ ތިން މިނެޓު ފަހުން ސެނެގާލްގެ ލީޑު ފުޅާކޮށްދިނީ ސަޑިއޯ މާނޭ އެވެ. އެއީ ފުރަތަމަ ލަނޑު ޖަހައިދިން ޑިއާލޯގެ އެހީތެރިކަމާއެކު މާނޭ ޖެހި ލަނޑެކެވެ. މާނޭ ލަނޑު ޖެހިތާ ތިން މިނެޓު ފަހުން މާކީނިއޯސް ވަނީ ލަނޑެއް ޖަހައި ބްރެޒިލަށް ފަރަގު ކުޑަކޮށްދީފަ އެވެ. ސެނެގާލަށް މެޗުން ފުރިހަމަ މޮޅެއް ހޯދައިދިނީ އިތުރު ވަގުތުގައި ލިބުނު ޕެނަލްޓީއެއް ކާމިޔާބުކޮށްގެން މާނޭ އެވެ.

މިއީ ފީފާ ވޯލްޑް ކަޕްގެ ފަހުން ބްރެޒިލް އިން ކުޅުނު ތިން ވަނަ މެޗެވެ. ތިން މެޗުގެ ތެރެއިން ބްރެޒިލް މޮޅުވެފައި ވަނީ އެންމެ މެޗަކުންނެވެ. މިހާތަނަށް ބްރެޒިލުން ކުޅެމުން އަންނަނީ ހެޑު ކޯޗެއް ނެތި އެވެ. ވޯލްޑް ކަޕަށް ފަހު ޓީޓޭ ޓީމު ދޫކޮށްލިއިރު، އައު ކޯޗެއް ހޯދުމުގެ މަސައްކަތް އެ ޤައުމުން އަންނަނީ ކުރަމުންނެވެ.