އިންޓަރ ސްކޫލް ޓީޓީ މުބާރާތުގައި ފުވައްމުލަކު ސްކޫލްތައް ވިދާލައިފި

އަންގާރަ ދުވަހުގެރޭ ނިމުނު އިންޓަރ ސްކޫލް ޓޭބަލް ޓެނިސް މުބާރާތުގައި ފުވައްމުލަކުން ވާދަކުރި ދަރިވަރުން ވިދާލައިފިއެވެ.

މުބާރާތުގައި މާލޭގެ ސްކޫލްތަކުގެ އިތުރުން ވާދަކުރީ ފުވައްމުލަކު ސްކޫލްތަކުންނެވެ. މުބާރާތުގެ ނުވަ އަހަރުން ދަށުގެ އަންހެން ޓީމް އިވެންޓްގެ ޗެމްޕިއަން ހޯދީ ފުވައްމުލަކު މުޙައްމަދު ޖަމާލުއްދިން ސްކޫލެވެ. މިއުމުރުގެ ފިރިހެން ބައިން ރިހި މެޑަލް ހޯދީވެސް މުހައްމަދު ޖަމާލުއްދީން ސްކޫލެވެ. 13 އަހަރުން ދަށުގެ އަންހެން ޗެމްޕިއަން ހޯދީ ހާފިޒު އަހުމަދު ސްކޫލެވެ. 13 އަހަރުން ދަށުގެ ފިރިހެން ޗެމްޕިއަން ހޯދީ މުހައްމަދު ޖަމާލުއްދިން ސްކޫލެވެ.

13 އަހަރުން ދަށުގެ ސިންގަލްސް ފިރިހެން ބައިގަ ވާދަކޮށް މުހައްމަދު ޖަމާލުއްދީން އެސްކޫލްގެ ޔަޒީން ހުސެއިން ޝަރީފް ރިހި މެޑަލް ހޯދިއެވެ. މިބައިގެ ޗެމްޕިއަންކަން ހޯދީ ހާފިޒު އަހުމަދު ސްކޫލްގެ މުޙައްމަދު ޒާއިމް އަހުމަދު އެވެ. 15 އަހަރުން ދަށުގެ ފިރިހެން ޑަބަލްސް ޗެމްޕިއަންކަން ހޯދީ މުޙައްމަދު ޖަމާލުއްދީން ސްކޫލްގެ މުޙައްމަދު އާން އަލީއާއި, ޔަޒީން ހުސެއިން ޝަރީފްއެވެ.

15 އަހަރުން ދަށުގެ ޓީމް އިވެންޓްގެ ފިރިހެން އަދި އަންހެން ބައިންވެސް ރިހި މެޑަލް ހޯދީ ހާފިޒު އަހުމަދު ސްކޫލެވެ.

މުބާރާތުގައި މުހައްމަދު ޖަމާލުއްދީން ސްކޫލުން ވަނީ ޖުމްލަ 28 މެޑަލް ހޯދާފައެވެ. އެއީ ރިހި އަދި ލޯ މެޑަލް ހިމަނައިގެންނެވެ.

ފުވައްމުލަކުގައި ޓީޓީ އެސޯސިއޭޝަނުން ޔޫތް ޑިވެލޮޕްމަންޓް ޕްރޮގްރާމް ފެށިތާވީ އަހަރެއްހާ ދުވަހެއެވެ. އެޕްރޮގްރާމްތައް އެސިޓީގައި ހިންގަނީ އިންޑިޔާ ކޯޗެއްގެ ބެލުމުގެ ދަށުންނެވެ. އޭނާ ބުނީ މިއީ ފުވައްމުލަކުގެ ސްކޫލްތަކުން ހޯދި ވަރަށް ރަނގަޅު ކާމިޔާބިއެއް އަދި ތަޖުރިބާއެއް ކަމަށެވެ. ކުރިއަށް އޮތްތަނުގައި ފުވައްމުލަކުގެ ދަރިވަރުން މާބޮޑަތި ކާމިޔާބީތައް ހޯދާނެކަން އޭނާ ފާހަގަކުރިއެވެ.

މުބާރާތުގައި ފުވައްމުލަކު ސިޓީގެ ތިން ސްކޫލަކުން ވާދަކުރިއެވެ. މާލެއިން ވާދަކުރި 11 ސްކޫލާއެކު ޖުމްލަ މުބާރާތުގައި 15 ސްކޫލުން ވާދަކުރިއެވެ.