ހެޔޮލަފާ ޖީލެއް ބިނާކުރުމުގައި ބެލެނިވެރިންގެ ދައުރު އަދާކޮށްދީ: ނައިބުރައީސް
ކުދިންނަކީ މަސައްކަތްތެރި ރަނގަޅު ބައެއްގެ ގޮތުގައި ތަރުބިއްޔަތުކުރުން މުހިންމު
ރައީސުލްޖުމްހޫރިއްޔާގެ ނައިބު، މުހައްމަދު ގާސިމް ޕްރީސްކޫލުގެ ދަސްވެނިވުމުގެ ހަފުލާގައި
ގައުމަށް ޚިދުމަތްކުރާ ދަރިންތަކެއް އެކުލެވޭ ހެޔޮލަފާ ޖީލެއް ބިނާކުރުމުގައި ބެލެނިވެރިން އިސް ދައުރެއް އަދާކޮށްދިނުމަަށް, ރައީސުލްޖުމްހޫރިއްޔާގެ ނައިބު ފައިސަލް ނަސީމް އެދިވަޑައިގެންފިއެވެ.
ރައީސުލްޖުމްހޫރިއްޔާގެ ނައިބު މިކަމަށް އެދިވަޑައިގެންފައިވަނީ، މުހައްމަދު ގާސިމް ޕްރީސްކޫލުގެ ގްރެޖުއޭޝަން 2022-2023ގެ ޖަލްސާ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. މި ޖަލްސާ ބާއްވާފައިވަނީ މިއަދު ހެނދުނު, ހުޅުމާލޭ ހުރަވީ ސްކޫލްގެ ހޯލުގައެވެ.
އެމަނިކުފާނުގެ ވާހަކަފުޅުގައި، ކުދިންގެ ހުރި ހުނަރުތައް ދެނެގަނެ އެކަންކަން ތަރައްގީކުރުމުގައި ބެލެނިވެރިން ބާރުއަޅައިދިނުމަށް ވެސް އެދިވަޑައިގެންނެވިއެވެ. ހަމައެހެންމެ އެމަނިކުފާނު ވަނީ ކުދިންނަކީ މަސައްކަތްތެރި ރަނގަޅު ބައެއްގެ ގޮތުގައި ތަރުބިއްޔަތުކުރުމުގައި ސްކޫލުތަކާއި ބެލެނިވެރިން އަދާކުރާ މުހިންމު ދައުރު ފާހަގަކުރައްވާފައެވެ.
ޗުއްޓީ ތެރޭގައިވެސް ކުދިންލައްވައި ކަންކަންކުރުވައި ކަންކަން ދަސްކޮށްދިނުމަށް މަސައްކަތްކުރުމާއި، ޚާއްސަކޮށް ދީނީ ކަންކަމަށް ކުދިންނަށް ބާރުއަޅައިދިނުމަށްވެސް ނައިބުރައީސް ވަނީ އެދިވަޑައިގެންފައެވެ.
މި ޖަލްސާގައި، މުހައްމަދު ގާސިމް ޕްރީސްކޫލުން ގްރެޖުއޭޓްވި ޔޫ.ކޭ.ޖީ1ން ޔޫ.ކޭ.ޖީ 8ށް، ހުރިހާ ކްލާސްތަކުން ގްރެޖުއޭޓްވި ދަރިވަރުންނަށް ސްކްރޯލް ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.
މުހައްމަދު ގާސިމް ޕްރީސްކޫލަކީ 24 އޮކްޓޫބަރ 2021ގައި ހުޅުވުނު ޕްރީސްކޫލެކެވެ. މިހާރު 462 ދަރިވަރުން ތައުލީމު ހާސިލުކުރަމުން އަންނައިރު، އޭގެތެރޭގައި ޚާއްސަ އެހީއަށް ބޭނުންވާ 36 ކުދިންވެސް ހިމެނެއެވެ. މި ހަފްލާގައި ޖުމްލަ 198 ދަރިވަރުން ގްރެޖުއޭޓްވެފައިވެއެވެ.
