އަދީބާއެކު އެއްބަަސްވުން ހެދީ ކުރީގެ ޕީޖީ، ދައުލަތުން އެއްބަސްވުމެއް ވެފައިވާނަމަ އިހުތިރާމް ކުރާނަން: ޝަމީމް
ޕީޖީ އޮފީހަކީ ސަރުކާރުން އަންގާ ކޮންމެ ކަމެއް ކުރަން އޮންނަ މުއައްސަސާއެއް ނޫން
ޕްރޮސެކިއުޓަރ ޖެނެރަލް ހުސައިން ޝަމީމް
ކުރީގެ ނައިބްރައީސް އަހުމަދު އަދީބާއެކު އިއުތިރާފުގެ އެއްބަަސްވުން ހެއްދެވީ ކުރީގެ ޕްރޮސެކިއުޓަރ ޖެނެރަލް އައިޝަތު ބިޝާމް ކަމަށާއި، ދައުލަތުން އެއްބަސްވުމެއް ވެފައިވާނަމަ އެ އެއްބަސްވުމަކަށް އިހުތިރާމް ކުރައްވާނެކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވެފައި މިވަނީ ރ ފުއްގިރި ހިޔާނާތުގެ މައްސަލައިގައި ދައުލަތުގެ ހެއްކެއްގެ ގޮތުގައި ހެކިބަސް ދެއްވަން ކޯޓަށް ވަޑައިގެންނެވުމުން، ކުރީގެ ނައިބްރައީސް އަހުމަދު އަދީބަށް އެ މައްސަލައިިގެ ޚަސްމެއްކަމަށްވާ ކުރީގެ ރައީސް އަބްދުﷲ ޔާމީނު އިންޒާރު ދެއްވި މައްސަލައެއް ފެންމަތިވެފައިވާ ދަނޑިވަޅެއްގައެވެ.
އެކަމާ ގުޅޭގޮތުން އަންގާރަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ޝަމީމް ވިދާޅުވީ، އަދީބާއެކު އެއްބަސްވުން ހަދާފައިވަނީ ރައީސް ޔާމީނުގެ ސަރުކާރުގައި އައްޔަނު ކުރެއްވި އޭރުގެ ޕްރޮސެކިއުޓަރ ޖެނެރަލް އައިޝަތު ބިޝާމް ކަމަށާއި، ދައުލަތް ތަމްސީލު ކުރަން ހުރި ފަރާތަކުން ނިންމާފައިވާ ނިންމުމެއް ދެން އަންނަ ފަރާތަކުންވެސް ތަންފީޒު ކުރަންޖެހޭ ކަމަށެވެ.
އޭގެ އިތުރުން، މިހާރު އެއްބަސްވުންތައް އެކުލަވާލުމާގުޅޭ ހަމަތަކެއްވެސް އެކުލަވާލެވިފައިވާކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ، ޔާމީނުގެ ވެރިކަމުގައި ޑެޕިއުޓީ ޕީޖީގެ މަޤާމު ފުރުއްވާފައިވާ ކަމަށާއި، އޭރުވެސް ސަރުކާރުގެ ފަރާތުން ޕީޖީ އޮފީހަކަށް ނުފޫޒެއް ނޯންނަ ކަމަށެވެ.
އަދި އެގޮތަށް ނުފޫޒު ނުވެސް ފޯރުވޭނެކަމަށް ޝަމީމް ވިދާޅުވިއެވެ. އެއީ އެއްވެސް ވެރިކަމެއްގައި ތަޖުރިބާ ކުރައްވަން ޖެހިވަޑައިގެންނެވި ކަމެއް ނޫންކަމަށް ޝަމީމް ފާހަގަ ކުރެއްވިއެވެ.
ރ ފުއްގިރި ހިޔާނާތުގެ މައްސަލައިގައި ޔާމީނު ވަނީ އަދީބު ދެކިލައްވާ ގޮތް ބެއްލެވުމަށްކަމަށް ވިދާޅުވެ، ދައުލަތުން ބޭނުންވާ ގޮތަށް ނޫން ގޮތަކަށް ހެކިބަސް ދީފިނަމަ ގޭބަންދު ނިމުމަކަށް އަންނާނެތޯ ސުވާލު ކުރައްވާފައެވެ.
އަދީބު ވަނީ، އޭނާ ގޭބަންދުގައި ހުރީ ސިއްޙީ ސަބަބުތަކަކަށްޓަކައި ކަމަށް ވިދާޅުވެ، އެއީ ދައުލަތާއެކު ވެފައިވާ އިއުތިރާފުގެ އެއްބަސްވުމުގެ ސަބަބުން ލިބުނު ލުޔެއް ނޫންކަމަށް ވިދާޅުވެފައެވެ.
އެހިސާބުން ޔާމީނު ވަނީ، ހިތްހަމަޖެހިވަޑައިނުގެން ހުންނަވައި އަދީބަށް ސުވާލުތަކެއް އަމާޒު ކުރައްވާފައެވެ. އެގޮތުން ރިޔާސީ އިންތިޚާބު ބޯމަތިވެފައިވާކަން ހަނދުމަ ކޮށްދެއްވަމުން ޔާމީނު ވަނީ ޕީޕީއެމްގެ ވެރިކަމެއް އައިސްފިނަމަ، ޕްރޮސެކިއުޓަރ ޖެނެރަލާއެކު އެއްބަސްވުންތައް ހައްދަވައިގެން ގޭގައި ހުންނެވިދާނެހެން ހީއްކުރެއްވޭތޯ ސުވާލު ކުރައްވާފައެވެ. އޭގެ ޖަވާބުގައި އަދީބު ވަނީ ޕީޖީ އޮފީހަކީ މިނިވަން މުއައްސަސާއެއްކަމަށް ވިދާޅުވެފައެވެ.
އެހެން ވިދާޅުވުމުން ޔާމީނު ވަނީ، ޕީޖީ އޮފީހަކީ މިނިވަން މުއައްސަސާއެއް ނަމަވެސް، ޔާމީނުގެ ވެރިކަމުގައި އަދީބަށް އެ ލުއިތައް ލިބިދީފައިނުވާކަން ހަނދުމަ ކޮށްދެއްވާފައެވެ.
ޕީޖީ އޮފީހުގެ ވަކީލުވެސް ވަނީ ކޮންމެ ބަޔަކު ވެރިކަމުގައި ތިބި ނަމަވެސް، ޕީޖީ އޮފީހަކީ މިނިވަން މުސްތަޤިއްލު މުއައްސަސާއެއްކަމަށް ވިދާޅުވެ، ޕްރޮސެކިއުޓަރ ޖެނެރަލްގެ މައްޗަށް ސަރުކާރަކަށް ބަސް ނުބުނެވޭނެކަން ފާހަގަ ކުރައްވާފައެވެ.
ޕީޖީ އޮފީހަކީ ސަރުކާރުން އަންގާ ކޮންމެ ކަމެއް ކުރަން އޮންނަ މުއައްސަސާއެއް ނޫންކަންވެސް ދައުލަތުގެ ވަކީލު ފާހަގަ ކުރެއްވިއެވެ.
ޔާމީންގެ ސުވާލުތައް އަމާޒުކުރެއްވިގޮތުން ޝަރުޢީކޯޓުތަކަށް ރައީސުލްޖުމްހޫރިއްޔާގެ ބާރު އޮންނަ ފަދަ މޭރުމަކުން ވާހަކަފުޅު ދެއްކެވުމުން ދައުލަތުގެ ވަކީލު އިޢުތިރާޟް ކުރައްވައި ވިދާޅުވީ، ތިން ބާރު ވަކި ވެފައިވާ ދައުލަތް ހިންގުމުގެ ނިޒާމަށް ގޮންޖައްސަވައި ސުވާލު އަމާޒު ނުކުރެއްވޭނެކަމަށެވެ.
