ހިއްސާދާރުންނަށް ދޭ ޔަގީންކަމަކީ ހިއްސާގެ ފައިދާ އަހަރުން އަހަރަށް ރަނގަޅު ކުރުމަށް މަސައްކަތްކުރާނެކަން: އާޒިމް

އެމްޓީސީސީގެ ހިއްސާދާރުންނަށް ދޭން އޮތް ޔަގީންކަމަކީ އެމްޓީސީސީގެ ހިއްސާގެ ފައިދާ އަހަރުން އަހަރަށް ރަނގަޅުކުރުމަށް ކުންފުނިން މަސައްކަތްކުރަމުން ގެންދާނެކަން ކަމަށް އެކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.

ޖޫން 15 ވަނަ ދުވަހުގެ ރޭ ކުރުނބާ މޯލްޑިވްސްގައި ވަނީ އެމްޓީސީސީގެ އަހަރީ އާންމު ޖަލްސާ ބާއްވާފައެވެ. ނަމަވެސް އެކުންފުނިން ހިއްސާއަކަށް ބެހުމަށް ހުށަހެޅި އަދަދުކަމުގައިވާ މޫނުމަތީ އަގު 5 ރުފިޔާގެ ކޮންމެ ހިއްސާއަކަށް 4 ރުފިޔާ ބެހުމަށް ނެގުނު ވޯޓުގައި ހިއްސާދާރުން އެއަދަދު ފާހެއް ނުވިއެވެ. އެކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ އެއަދަދު ފާސްވެގެން ނުދިޔުމަކީ ލިބުނު ހައިރާންކަމެއްކަމަށެވެ. އެއީ އެމްޓީސީސީގެ ހަޔާތުގައި މިހާތަނަށް ކަނޑައެޅި އެންމެ ބޮޑު ޑިވިޑެންޓް ކަމަށް އާޒިމް ވިދާޅުވިއެވެ. ކޮންމެވެސް ސަބަބަކާ ހުރެ އެއަދަދު ފާސްވެގެން ނުދިޔައީކަމަށާއި ހިއްސާދާރުންގެ އެ ނިންމުމަށް އިހުތިރާމްކުރާކަމަށެވެ.

Advertisement

އާޒިމް ވިދާޅުވީ އޮންނަ އުސޫލުގެ ތެރެއިން އަލުން އަހަރީ އާންމު ޖަލްސާއެއް ބާއްވާ އެކަން ފާސްކުރުމުގެ ކަންކަންކުރާނެކަމަށެވެ.

އެމްޓީސީސީން 2022 ވަނަ އަހަރު ނިންމާލީ އެ ކުންފުނީގެ ތާރީޚުގައިވެސް އެންމެ ބޮޑު އާމްދަނީއާ އެކުގައެވެ. މިގޮތުން މިދިޔަ އަހަރު ނިމުނުއިރު އެ ކުންފުންޏަށް އާމްދަނީގެ ގޮތުގައި 2.47 ބިލިއަން ރުފިޔާ ވަނީ ލިބިފައެވެ. މިއީ އޭގެ ކުރީ އަހަރާ އަޅައިބަލާއިރު 26 އިންސައްތައިގެ ކުރިއެރުމެކެވެ. 2021 ވަނަ އަހަރު އެ ކުންފުންޏަށް އާމްދަނީގެ ގޮތުގައި ލިބުނީ 1.9 ބިލިއަން ރުފިޔާއެވެ.

އެމްޓީސީސީގެ މިދިޔަ އަހަރުގެ އާމްދަނީ ރެކޯޑު އަދަދަކަށް އަރާފައިވާއިރު، މިދިޔަ އަހަރު އެ ކުންފުނީގެ ހިންގުމުގެ ފައިދާވެސް ވަނީ އޭގެ ކުރީ އަހަރާ އަޅައިބަލާއިރު އިތުރުވެފައެވެ. އެގޮތުން، 2021 ވަނަ އަހަރު ހިންގުމުގެ ފައިދާގެ ގޮތުގައި 319 މިލިއަން ރުފިޔާ ލިބުނުއިރު، މިދިޔަ އަހަރު ލިބިފައިވަނީ 324 މިލިއަން ރުފިޔާއެވެ. މިއީ ގާތްގަނޑަކަށް 1.5 އިންސައްތައިގެ ކުރިއެރުމެކެވެ.