ޝަރުއީ ދާއިރާގައި މަސައްކަތް ކުރާ މުވައްޒަފުންގެ ކޯޑް އޮފް ކޮންޑަކްޓް އާންމުކޮށްފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ބުރާސްފަތި ދުވަހު އާއްމު ކުރި ގަވާއިދުގައި 211 ވަނަ އަހަރުން ފެށިގެން އަމަލުކުރަމުން އައި ގަވާއިދުގެ ބައެއް ބާބުތަކާއި މާއްދާތައް ވަނީ އުވާލާފައެވެ. މީގެ ތެރޭގައި ޝަރުއީ ދާއިރާގެ މުވައްޒަފުން ސިޔާސީ ހަރަކާތްތަކުގައި އެއްވެސް ގޮތަކަށް ބައިވެރިވުން މަނާކުުރާ ބާބު ވެސް ހިމެނެއެވެ. މި ބާބު އުވާލާފައިވީ ނަމަވެސް ކޯޑް އޮފް ކޮންޑަކްޓްގެ "ޝަރުއީ ދާއިރާގެ މިނިވަންކަން ދެމެހެއްޓުމާއި އިތުބާރު ހިފެހެއްޓުން" މާއްދާގެ ދަށުން އެ ބައި ވަނީ ހިމަނައިފައެވެ.

އައު ގަވާއިދުގެ ތިންވަނަ މާއްދާގެ (ށ) ގައި ބުނެފައިވާ ގޮތުގައި ޝައުރީ ދާއިރާގެ އެއްވެސް މުވައްޒަފެއްގެ މިނިވަންކަމާމެދު ސުވާލު އުފެދިދާނެ އެއްވެސް ކަމެއް ކޮށްގެން ނުވާނެ ކަމަށެވެ. އަދި ޝަރުއީ ދާއިރާގެ މިނިވަންކަމާއި އެ ދާއިރާއަށް އާއްމުން ކުރާ އިތުބާރަށް އުނިކަން އަތުވެދާނެ ކަންކަމުން މުވައްޒަފުން ދުރުހެލިވާން ޖެހޭނެ ކަމަށާއި އޭގެ ތެރޭގައި ސިޔާސީ އަދި އެ ނޫންވެސް ހަރަކާތްތައް ހިމެނޭ ކަމަށް ވަނީ ބުނެފައެވެ.

ސިޔާސީ ހަރަކާތްތަކުގެ ތެރެއިން ޝަރުއީ ދާއިރާގެ މުވައްޒަފުން ބައިވެރިވުން މަނާ ކަންކަމުގެގެ ތެރޭގައި ސިޔާސީ ވަކި ޕާޓީއެއް ނުވަތަ ސިޔާސީ މަގާމަކަށް ވާދަކުރާ ވަކި ކެންޑިޑޭޓެއްގެ މަގުބޫލުކަން އިތުރުކުރުމަށް ނުވަތަ ކުޑަކުރުމަށް ހިންގާ ހަރަކާތްތަކާއި އާއްމުންގެ މެދުގައި ސިޔާސީ ގޮތުން ދެބަސްވުން އުފެދިފައިވާ ނުވަތަ އުފެދިދާނެ ކަންކަމާ ގުޅޭ ބަހުސްތަކާއި ކެމްޕޭންތައް ހިމެނެއެވެ.

މި ގަވާއިދުގެ ދަށުން ސިޔާސީ ކަންކަމާ ގުޅުންހުރި ތިން ކަމެއްގައި ޝަރުއީ ދާއިރާގެ މުވައްޒަފުންނަށް ބައިވެރިވެވިދާނެއެވެ. އޭގެ ތެރޭގައި އާއްމުންގެ މެދުގައި ބައިބައިވުން އުފެދިފައިވާ ނުވަތަ އުފެދިދާނެ ކަންކަމަށް ނުބެލެވޭ އަދި އެ ކަމެއްގައި އުޅުމުގެ ސަބަބުން އެ ދާއިރާގެ މިނިވަންކަމަށް އަދި ދާއިރާއަށް ކުރާ އިތުބާރާއި އިހުތިރާމަށް ނޭދެވޭ އަސަރު ނުކުރާނެ ނުވަތަ މުވައްޒަފުގެ މިނިވަންކަމާބެހޭގޮތުން ސުވާލު ނުއުފެދޭނެ ފަދަ އިޖުތިމާއީ ހަރަކާތްތަކުގައި ބައިވެރިވުން ހިމެނެއެވެ.

މީގެ އިތުރުން ސިޔާސީ ޕާޓީއެއް ނުވަތަ ސިޔާސީ ހަރަކާތެއް ހިންގާ ޖަމިއްޔާ ޖަމާއަތެއްގެ މެންބަރަކަށް ވުމާއި އެފަރާތެއްގެ އެތެރޭގެ އިންތިޚާބެއްގައި ވޯޓުލުން ވެސް ޝަރުއީ ދާއިރާގެ މުވައްޒަފުންނަށް މިހާރު ހުއްދަވާނެއެވެ. އަދި އަމިއްލަ އެހީގައި ވޯޓުލާ މަރުކަޒަކަށް ހާޒިރުނުވެވޭ ތިމާގެ މީހަކު ވޯޓުލާ މަރުކަޒަށް ގެންދިއުމުގައި އެހީވުމަކީ ވެސް އައު ކޯޑް އޮފް ކޮންޑަކްޓުގެ ދަށުން މިހާރު ޝަރުއީ ދާއިރާގެ މުވައްޒަފުންނަށް ކުރެވޭނެ ކަމެކެވެ.