ފެނާއި ނަރުދަމާގެ ނިޒާމު ޑިޒައިންކުރަނީ ކުރިއަށްއޮތް 25 އަހަރަށް: ޝާހު
ބޭނުންކުރާ މެޓީރިއަލްވެސް ދިގު މުއްދަތަށް ދެމިގެންދާނެކަން ޔަގީންކުރަން
އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު
ފެނާއި ނަރުދަމާގެ މަސައްކަތްތައް ޑިޒައިން ކުރަނީ ކުރިއަށް އޮތް 25 އަހަރަށް ދެމިގެންދާނެ ގޮތަށް ކަމަށް އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
ޝާހު މިހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުންނެވެ.
ޝާހު ވިދާޅުވީ ފެނާއި ނަރުދަމާގެ މަސައްކަތްތައް ޑިޒައިންކުރުމަށް ޑިޒައިން ގައިޑްލައިންތަކެއް ޕްލޭނިން މިނިސްޓްރީން ކަނޑައަޅާފައިވާކަމަށެވެ. މި ގައިޑްލައިނާ އެއްގޮތަށް ފެނާއި ނަރުދަމާގެ މަސައްކަތްތައް ޑިޒައިން ކުރެވިގެންދާނީ އެންމެ މަދުވެގެން 25 އަހަރަށް ދެމިގެންދާ ގޮތަށް ކަމަށާއި، މެޓީރިއަލް ހޯދުމުގައިވެސް މިކަމަށް ބަލާނެ ކަމަށެވެ. އަޑީގައި ވަޅުލާފައި ހުންނައިރު އެންމެ މަދުވެގެން 25 އަހަރަށް ހަލާކުނުވެ، ދެމިގެންދާނެ ފަދަ މެޓީރިއަލްތަކެއް ހޯދުމަށް އިސްކަމެއްދެއްވާކަމަށް ޝާހު ވިދާޅުވިއެވެ.
އެމްޑަބްލިއުއެސްސީން މިހާރުވެސް ގެންދަނީ ރާއްޖޭގެ އެކި ކަންކޮޅުތަކުގައި ފެނާއި ނަރުދަމާގެ ގިނަ މަސައްކަތްތަކެއް ކުރަމުންނެވެ. މި މަސައްކަތްތައް ނިންމޭނެކަމާމެދު އެއްވެސް ޝައްކެއް ނެތްކަމަށް ޝާހު ވިދާޅުވިއެވެ.
މީހުން ދިރިއުޅޭ ކޮންމެ ރަށެއްގައި އަސާސީ ޚިދުމަތްތައް ގާއިމްކުރުމަކީ މި ސަރުކާރުން ޚާއްސަ އިސްކަމެއްދޭ އެއް ކަންތަކެވެ. މިގޮތުން މި ޚިދުމަތް ނެތް ރަށްރަށުގައި މި ޚިދުމަތް ގާއިމްކުރުމުގެ މަސައްކަތް އަދިވެސް ދަނީ ކުރަމުންނެވެ. ސަރުކާރުގެ އަމާޒަކީ މި ދައުރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފެނާއި ނަރުދަމާ ޚިދުމަތް ގާއިމްކުރުމެވެ.
