ކުރިއަށްއޮތް ދެ ދުވަހުވެސް ރާއްޖޭގެ އެކި ހިސާބުތަކަށް ވިއްސާރަކުރާނެ: މެޓް
އުތުރުގެ އަތޮޅުތަކަށާއި މެދުރާއްޖޭގެ އަތޮޅުތަކަށް ގުގުރުމާއެކު ބޯކޮށް ވާރޭ ވެހޭނެ
ކުރިއަށްއޮތް ދެ ދުވަހުވެސް ރާއްޖޭގެ އެކި ހިސާބުތަކަށް ވިއްސާރަކުރާނެ
ކުރިއަށް އޮތް ދެ ދުވަހުވެސް ރާއްޖޭގެ އެކި ހިސާބުތަކަށް ވިއްސާރަކުރާނެކަމަށް މޫސުމާއި ބެހޭ ގައުމީ އިދާރާއިން ލަފާކޮށްފިއެވެ.
މޫސުމާބެހޭ ޤައުމީ އިދާރާއިން ބުނީ ކުރިއަށްއޮތް ދެ ދުވަހުވެސް ރާއްޖޭގެ އެކި ހިސާބުތަކަށް ވިއްސާރަކުރާނެކަމަށް ލަފާކުރެވޭއިރު، އުތުރުގެ އަތޮޅުތަކަށާއި މެދުރާއްޖޭގެ އަތޮޅުތަކަށް ގުގުރުމާއެކު ބޯކޮށް ވާރޭ ވެހޭނެކަމަށް ލަފާކުރެވޭކަމަށެވެ. އަދި އުތުރުގެ އަތޮޅުތަކަށާއި މެދުރާއްޖެތެރޭގެ އަތޮޅުތަކުގެ ކަނޑުތައް ޢާއްމު ގޮތެއްގައި ގަދަވާނެކަމަށް ލަފާކުރެވިފައިވާއިރު، ގަޑިއަކު 23 މޭލާއި 29 މޭލު ބާރުމިނުގައި ވައިގަދަވާނެކަމަށްވެސް މޫސުމާބެހޭ އިދާރާއިން ލަފާކުރެއެވެ.
މިހާރުކުރަމުންދާ ހުޅަނގު މޫސުމުގެ ވިއްސާރައާ ގުޅިގެން، މެދުރާއްޖެތެރެއާއި އުތުރުގެ އަތޮޅުތަކަށް މެޓުން ވަނީ ވައިޓް އެލާޓް ނެރެފައެވެ. މި އެލާޓް ނެރެފައިވަނީ ބުދަ ދުވަހުގެ 11.30 ހަވީރު 17.30 އަށެވެ.
މެޓުން ބުނީ ދެކުނުގެ އަތޮޅުތަކުގެ މޫސުން ޢާއްމުގޮތެއްގައި ރަނގަޅުވާނެކަމަށާއި އެ ހިސަބުތަކަށް ކުރިއަށް އޮތް ހަފްތާގައި މޫސުން ރަނގަޅުވާނެކަމަށް ލަފާކުރެވޭކަމަށެވެ.
ރާއްޖޭގެ އުތުރަށް މިހާރު ކުރަމުންދާ ބޯ ވިއްސާރައިގައި، ހއ. އުލިގަމުގައި ވަނީ ވަރަށް ބޮޑަށް ފެންބޮޑުވެ، ވައިގަދަވުމުގެ ސަބަބުން ބައެއް ރުއްގަސް ބިމާއި ހަމަވެފައެވެ. އަދި ބައެއް ގެތަކަށް ފެންވަދެ ހިފާ ގެންގުޅޭތަކެއްޗަށް ވަނީ ގެއްލުތަންތަކެއް ލިބިފައެވެ.
