އަހަރަކު އެއްފަހަރު ބާއްވާ ގޮތަށް ޤާނޫނަށް ގެނައި އިސްލާހާއެކު ބޭއްވި އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ ބައި އިލެކްޝަންތަކުގެ ނަތީޖާ އިލެކްޝަންސް ކޮމިޝަނުން ހާމަކޮށްފިއެވެ.

ހޮނިހިރު ދުވަހު ބޭއްވި 8 ބައި އިލެކްޝަންގެ ތެރެއިން 5 ގޮނޑި ކާމިޔާބު ކުރީ އިދިކޮޅު ޕީޕީއެމްގެ ކެނޑިޑޭޓުންނެވެ. އެމްޑީޕީން މިއިންތިޚާބުގައި ދެގޮނޑި ކާމިޔާބު ކޮށްފައިވާއިރު، މިނިވަން ކެނޑިޑޭޓެއް ވެސް ވަނީ އެއް ގޮނޑި ކާމިޔާބު ކޮށްފައެވެ.

އިދިކޮޅު ޕީޕީއެމްގެ ފަރާތުން އިންތިޚާބު ކާމިޔާބު ކޮށްފައިވަނީ ކ. ދިއްފުށި އަންހެނުންގެ ކޮމެޓީއަށް ވާދަކުރި ޢައިޝަތު ސާހިރާ އާއި، މ. ވޭވަށު ގޮނޑިއަށް ވާދަކުރި ޝިފާޒާ އިބްރާހިމްއާއި، ހދ. ފިނޭ ގޮނޑިއަށް ވާދަކުރި ޒުހުދާ މުހައްމަދު އާއި ލ. މާމެންދޫ ގޮނޑިއަށް ވާދަކުރި ސަޢުދިއްޔާ ޙުސެއިންގެ އިތުރުން ގދ. ހޯނޑެއްދޫ ގޮނޑިއަށް ވާދަކުރި ނަޒުރާނާ ހުސެއިން މަނިކު އެވެ. މި ބައި އިލެކްޝަންތަކުން ވެރިކަން ކުރާ މައި ޕާޓީ އެމްޑީޕީއިން ކާމިޔާބު ކޮށްފައިވަނީ އއ. ފެރިދޫ ގޮނޑިއަށް ވާދަކުރި ސާނާ އަހުމަދާއި، ތ. ގާދިއްފުށި ގޮނޑިއަށް ވާދަކުރި މަރިޔަމް ޙަސަންއެވެ. މި ބައި އިލެކްޝަންގައި ރ. އަނގޮޅިތީމުގެ ގޮނޑި ކާމިޔާބު ކުރީ މިނިވަން ކެނޑިޑޭޓް ޢާސިމާ ރަޝީދެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ބައި އިލެކްޝަން އަހަރަކު އެއްފަހަރު ބާއްވާގޮތަށް، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ގަވާއިދަށް ގެނައި އިސްލާޙަށް އަމަލުކުރަން ފެށީ 21 ޑިސެމްބަރުގައެވެ. މި ޤަވާއިދުގައި ބުނެފައިވާ ގޮތުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރެއްގެ މަޤާމު ހުސްވެއްޖެނަމަ، ލޯކަލް ގަވަރމަންޓް އޮތޯރިޓީން، އިލެކްޝަންސް ކޮމިޝަނަށް އެކަން އަންގާތާ ލަސްވެގެން 365 ދުވަސް (1 އަހަރު) ތެރޭގައި، އެ މެންބަރެއްގެ ބަދަލުގައި ކޮމިޓީއަށް މެންބަރަކު އިންތިޚާބު ކުރަން ޖެހޭ ކަމަށެވެ. މީގެ ކުރިން ޤަވާއިދުގައި ބަޔާން ކޮށްފައި އޮންނަނީ 60 ދުވަހެވެ.