މޯލްޑިވްސް ސާފިން އެސޯސިއޭޝަން (އެމްއެސްއޭ) އިން ކުރިއަށްގެންދާ ދިވެހި ސާފް ލީގުގެ މި އަހަރުގެ ތިން ވަނަ އިވެންޓު، "ގާމާދޫކޮޅު" ގެ މެންސް އޯޕަން ޗެމްޕިއަންކަން ހުސައިން އަރީފް އަދި ޖޫނިއާ ޗެމްޕިއަންކަން ކަޔާން އަބްދުﷲ އަރީފް ހޯދައިފިއެވެ.

މި މަހު 14 ވަނަ ދުވަހު ހިންމަފުށީގައި ފެށި މި އިވެންޓުގެ ފައިނަލް ހީޓުތަކުގެ އިތުރުން މެންސް އޯޕަންގެ ކުއާޓާ، ސެމީ އަދި ޖޫނިއާ ސެމީގެ ހީޓުތައް ކުރިޔަށް ދިޔައީ ހޮނިހިރު ދުވަހުއެވެ.

ފަސް ވަނަ ރައުންޑުގައި ލިބުނު އަނިޔާއެއްގެ ސަބަބުން 2022 ވަނަ އަހަރުގެ ޗެމްޕިއަން އަދި މިވަގުތު ލީގު ތާވަލުގެ ތިންވަނައިގައި ހިމެނޭ އަހުމަދު އާގިލް (އަންމަޑޭ) އަށް ކުއާޓާ ފައިނަލްގެ ހީޓުގައި ވާދަކުރެވިފައެއް ނުވެއެވެ.

މެންސް އޯޕަންގެ ފައިނަލުގައި ބައްދަލުކުރީ ހުސައިން އަރީފް އަދި ހޫދު އަހުމަދު (ހޫބްޒް) އެވެ. ފައިނަލުގެ ޖާގަ ހުސައިން އަރީފް ހޯދާފައިވަނީ ސެމީގައި 16 ޕޮއިންޓުގެ ސްކޯއަކުން އާދަމް މުއީން އިބްރާހީމް ބަލިކުރުމަށްފަހުއެވެ. އަދި ހޫބްޒް ފައިނަލަށް ދަތުރުކުރީ ސެމީގައި އިސްމާއީލް މިގްލާލް (ކުޑަ އިއްސެ) އާ ބައްދަލުކޮށް 17.17 ގެ ނަތީޖާއަކުން ހީޓު ކާމިޔާބުކޮށްގެނެވެ.

ވާދަވެރި ފައިނަލް ހީޓުގައި ހޫބްޒް ކައިރިން ހުސައިން އަރީފް މޮޅުވީ 15.66 ގެ ނަތީޖާއަކުންނެވެ. ހޫބްޒްއަށް ލިބުނީ 11.73 އެވެ.

ޖޫނިއާ ފައިނަލުން ކަޔާން ޖާގަ ހޯދީ މުހައްމަދު އިނާން އަބްދުލް ހަންނާން އާ ބައްދަލުކޮށް ހަނިގޮތަކަށް މޮޅުވެގެނެވެ. ކަޔާންއަށް ލިބުނީ 11.83 އެވެ. ފައިނަލުގެ ދެވަނަ ޖާގަ ޔާސިން އަހުމަދު ނާޝިދު ހޯދީ ސެމީގައި ޝާނިފް ޝަފީގް 11.84 ގެ ސްކޯއަކުން ބަލިކުރުމަށްފަހުއެވެ.

ޖޫނިއާ ބައިގެ ފައިނަލް ހީޓުގައި ކަޔާން ވަނީ 12.77 ހޯދާފައެވެ. އަދި ޔާސިން އަށް ލިބުނީ 7.50 އެވެ.

ދިވެހި ސާފް ލީގުގެ ހަތަރު ވަނަ އިވެންޓު ކުރިޔަށްދާނީ ޖުލައި މަހުގެ 28 އިން އޮގަސްޓު 1 ގެ ނިޔަލަށް ރ.ކިނޮޅަހުގައެވެ. އަދި މި އަހަރުގެ އެންމެ ފަހު އިވެންޓު ކަމަށްވާ ރަންނަމާރި ޗެލެންޖު އޮންނާނީ އޮކްޓޫބަރު މަހު 27 އިން ނޮވެމްބަރު 5 ގެ ނިޔަލަށެވެ.