ރާއްޖެއަށް ކުރެއްވި ދަތުރުފުޅަކީ ވަރަށް ކާމިޔާބު ދަތުރުފުޅެއް ކަމަށް ސޭޝެލްސްގެ ރައީސް ވޭވަލް ރާމްކަލާވަން ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ދައުވަތަކަށް ރާއްޖެއަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށްފަހު ސޭޝެލްސްގެ ސްޓޭޓް ހައުސް މެދުވެރިކޮށް ނެރުއްވި ބަޔާނެއްގައެވެ. ސޭޝެލްސްގެ ރައީސް އާއި އެމަނިކުފާނުގެ އަނބިކަނބަލުން ލިންޑާ ރާމްކަލާވަން ރާއްޖެއަށް ކުރެއްވި ދަތުރުފުޅު ނިންމަވާލެއްވުމަށްފަހު އެނބުރި ސޭޝެލްސްއަށް ވަޑައިގެންނެވީ ހުކުރު ދުވަހުއެވެ.
ހަ ދުވަހުގެ މި ދަތުރުފުޅުގައި ދެ ޤައުމުގެ ދެމެދުގައި މުހިންމު މަޝްވަރާތައް ކުރެވިގެންދިޔަ ކަމަށް ސޭޝެލްސްގެ ރައީސް ވިދާޅުވިއެވެ. އަދި މިހާރު ރާއްޖެއާއި އެ ޤައުމާ ދެމެދުގެ ގުޅުން ވަނީ އިތުރަށް ބަދަހިވެފައި ކަމަށާއި ބައިނަލްއަގުވާމީ މައިދާނުގައި ދެ ޤައުމު ގުޅިގެން ކުރެވެން ހުރި މަސައްކަތްތައް ދެނެގަނެވިފައިވާ ކަމަށް ވިދާޅުވިއެވެ. މީގެ ތެރޭގައި މޫސުމަށް އަންނަ ބަދަލުތަކާއި ފަތުރުވެރިކަމުގެ ދާއިރާ ކުރިއެރުވުމާއި މަލްޓީ ޑިމެންޝަނަލް ވަލްނަރެބިލިޓީ އިންޑެކްސް އާއި ލޮސް އެންޑް ޑެމޭޖް ފަންޑު ގާއިމް ކުރުން ހިމެނޭ ކަމަށް ވެސް އެމަނިކުފާނު ވިދާޅުވިއެވެ.
ސޭޝެލްސްގެ ރައީސް އިތުރަށް ވިދާޅުވީ އިންޑިއާ ކަނޑުގެ އަވައްޓެރި ދެ ޤައުމުގެ ހައިސިއްޔަތުން މި ސަރަހައްދުގެ އަމާންކަން ދެމެހެއްޓުމަށް ދެ ޤައުމުގެ ގުޅިގެން މަސައްކަތް ކުރައްވާނެ ކަމަށެވެ.
މިއަހަރު ރާއްޖޭގައި ބާއްވާ ރިޔާސީ އިންތިޚާބު އަމާން އިންތިޚާބަކަށް ވެގެންދާނެ ކަމަށް އުއްމީދު ކުރައްވާކަމަށް ވިދާޅުވެ އެމަނިކުފާނު ވަނީ ރާއްޖޭގެ ޑިމޮކްރަސީ އިތުރަށް ހަރުދަނާވެގެންސިއުމަށް އެދިވަޑައިގަންނަވާ ކަމަށް ވިދާޅުވެފައެވެ.
ސޭޝެލްސްގެ ރައީސް ވޭވަލް ރާމްކަލާވަން އާއި އެމަނިކުފާނުގެ އަނބިކަނބަލުން ރާއްޖެއަށް ކުރެއްވި މި ދަތުރުފުޅުގައި ދެގައުމުގެ ލީޑަރުން ބައްދަލުކުރައްވައި ދެގައުމުގެ ދެމެދު ރަސްމީ ވާހަކަފުޅުތައް ބާއްވަވައި ދެގައުމުގެ ދެމެދު އެކި ދާއިރާތަކުން އެއްބާރުލުން ދިނުމުގެ އެއްބަސްވުންތައް ބަދަލުކުރައްވައި ދެގައުމުގެ ލީޑަރުން މީޑިޔާއާ ބައްދަލުކުރައްވައި ގުޅިފައިވާ ބަޔާނެއް ދެއްވާފައިވެއެވެ.
މި ފުރަމާނަ ދަތުރުފުޅުގެ ނިމުން ފާހަގަކޮށް ދެގައުމު ގުޅިގެން، ޖޮއިންޓް ކޮމިއުނިކޭއެއް ނެރެފައިވާއިރު ދެ ގައުމުގެ އެކުވެރިކަމުގެ ގުޅުން އެގޮތުގައި ކުރިޔަށްގެންދިއުމާއި ދެ ގައުމަށް ވެސް ފައިދާހުރި ދާއިރާތަކުގައި ގުޅިގެން މަސައްކަތްކުރަމުން ގެންދާނެކަން ފާހަގަކުރައްވާފައިވެއެވެ.
