ހުޅުމާލެ ދެވަނަ ފިޔަވަހީގެ ހިޔާ ޓަވަރުގައި ދިރިއުޅޭ ފަރާތްތަކަށް ހާއްސަކޮށްގެން ފަޔަރ އެވެއާނެސް ޕްރޮގްރާމެއް ކުރިއަށް ގެންގޮސްފިއެވެ.
މި ޕްރޮގްރާމަކީ އެމްއެންޑީއެފް މާލޭ އޭރިއާ ކޮމާންޑާއި ހުޅުމާލެ ފަޔަރ ސްޓޭޝަނާއި އަރބަންކޯ ގުޅިގެން ކުރިއަށް ގެންދިޔަ ޕްރޮގްރާމެކެވެ. ހުކުރު ދުވަހުގެ ހަވީރު ކުރިޔަށް ގެންދިޔަ މި ޕްރޮގްރާމުގައި، އަލިފާނުގެ ހާދިސާއެއް ދިމާވެއްޖެ ހާލަތެއްގައި އަމަލުކުރަންޖެހޭނެ ގޮތްތަކާއި، އެފަދަ ހާދިސާތަކުގައި އަޅަންޖެހޭ ސަލާމަތީ ފިޔަވަޅުތައް އަޅާނެ ގޮތާއި، އަލިފާން ރޯވަން މެދުވެރިވާ ސަބަބުތައް ވަނީ ދަސްކޮށްދީފައެވެ.
މީގެ އިތުރުން ޚާއްސަ ގޮތެއްގައި ގޭތެރޭގައި ހިނގާފާނެ އަލިފާނުގެ ހާދިސާތަކުން ރައްކާތެރިވާނެ މުހިންމު ގޮތްތައް ބައިވެރިންނަށް ބުނެދީފައިވާއިރު ގޭހުގެ ނުރައްކަލުން ސަލާމަތް ވުމަށް ކުރެވިދާނެ ކަންތައްތަކާއި ގޭސް ލީކުވާނަމަ އަމަލު ކުރާނެ ގޮތްތަކާއި އަލިފާން ނިއްވަން ބޭނުންކުރާ ބައެއް އާލާތްތައް ބޭނުންކުރާނެ ގޮތްތައް ވަނީ ދަސްކޮށްދީފައެވެ. އަދި ފަޔަރ ބްލޭންކެޓް ބޭނުންކޮށްގެން އަލިފާން ނިއްވާނެ ގޮތް ވެސް ވަނީ ކިޔައިދީފައެވެ.
މި ހަރަކާތުގެ ތެރެއިން ހިޔާ ސަރަހައްދުގައި ދިރިއުޅޭ ކުޑަކުދިންނަށް ޚާއްސަ ހަރަކާތްތަކެއް ވެސް ވަނީ ކުރިއަށްގެންގޮސްފައެވެ.
މިހަރަކާތުގައި ހިޔާ ސަރަހައްދުގައި ދިރިއުޅޭ 600 އެއްހާ މީހުން ބައިވެރިވެފައިވާ ކަމަށް އެމްއެންޑީއެފުން މައުލޫމާތު ދެއެވެ.
