ހިއްސާއަކަށް ބެހުމަށް އެމްޓީސީސީން ހުށަހެޅި އަދަދު ފާހެއްނުވި!

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ހިއްސާއަކަށް ބެހުމަށް ހުށަހެޅި އަދަދު، އަހަރީ އާންމު ޖަލްސާއިން ފާހެއްނުވިއެވެ.

ބުރާސްފަތި ދުވަހުގެ ރޭ ކުރުނބާ މޯލްޑިވްސްގައި ބޭއްވި އެ ކުންފުނީގެ 2022 ވަނަ އަހަރުގެ އަހަރީ އާންމު ޖަލްސާގައި 119 ހިއްސާދާރުން ބައިވެރިވިއެވެ. މީގެ ތެރޭގައި އޮންލައިންކޮށްވެސް ހިއްސާދާރުން ބައިވެރިވިއެވެ. މިއަހަރުގެ އަހަރީ އާއްމު ޖަލްސާގައި އެމްޓީސީސީން 5.5 މިލިއަން ހިއްސާ ތަމްސީލުކުރިއެވެ.

2022 ވަނަ އަހަރަށް ހިއްސާގެ ފައިދާގެގޮތުގައި މޫނުމަތީ އަގު 5 ރުފިޔާގެ ކޮންމެ ހިއްސާއަކަށް 4 ރުފިޔާ ބެހުމަށް ވަނީ އަހަރީ އާންމު ޖަލްސާއަށް ހުށަހަޅާފައެވެ. އެހެންނަމަވެސް ހިއްސާދާރުންގެ ވޯޓަށް އެހުމުން މި އަދަދު ފާސްވެފައެއް ނުވެއެވެ. މި ބައި ފާސްކުރުމާ ދެކޮޅަށް 61 ހިއްސާދާރުން ވޯޓު ދީފައިވެއެވެ. މި އަދަދު ފާސްކުރުމަށް ވޯޓު ދީފައިވަނީ 54 ހިއްސާދާރުންނެވެ.

އެމްޓީސީސީން ވަނީ ހިއްސާއަކަށް 4 ރުފިޔާގެ މަގުން 32.15 މިލިޔަން ރުފިޔާ ބެހުމަށް ހުށަހަޅާފައެވެ.

މިގެ އިތުރުން 2022 ވަނަ އަހަރުގެ ޑިރެކްޓަރުންގެ ރިޕޯޓު ފާސްކުރުން ކުރިއަށްދިޔައިރު، މި ރިޕޯޓު ފާސްކޮށްފައިވަނީ ހިއްސާދާރުންގެ 89 އިންސައްތަ ވޯޓާއެކުއެވެ. އަދި 2022 ވަނަ އަހަރުގެ އޮޑިޓްކޮށްފައިވާ ކުންފުނީގެ ބެލެންސް ޝީޓާއި، ފައިދާއާއި، ގެއްލުމުގެ ހިސާބު ފާސްކޮށްފައިވެއެވެ. މި ހިސާބު ފާސްކޮށްފައިވަނީ ހިއްސާދާރުންގެ 83 އިންސައްތަ ވޯޓާއެކުއެވެ.

މި ޖަލްސާގައި 2021 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސްކޮށްފައިވެއެވެ. މި ޔައުމިއްޔާ ފާސްކޮށްފައިވަނީ ހިއްސާދާރުންގެ 96 އިންސައްތަ ވޯޓާއެކުއެވެ. މީގެ އިތުރުން 2021 ވަނަ އަހަރުގެ، ޚާއްސަ ގޮތުން ކުރާ އާންމު ޖަލްސާގެ ޔައުމިއްޔާ ފާސްކޮށްފައިވެއެވެ. މި ޔައުމިއްޔާ ފާސްކޮށްފައިވަނީ ހިއްސާދާރުންގެ 92 އިންސައްތަ ވޯޓާއެކުއެވެ.

ހިއްސާގެ ފައިދާގެ އިތުރުން ކުންފުނި އޮޑިޓްކުރުމަށް ހިއްސާދާރުންގެ ވޯޓާއެކު ޕްރައިސްވޯޓަރހައުސް ކޫޕަރސް ވަނީ ހަމަޖައްސާފައެވެ.

ޖަލްސާގައި އެޖެންޑާ އައިޓަމްތަކަށް ވޯޓުލުން ކުރިއަށްގެންގޮސްފައިވަނީ ފަހިވޯޓު މެދުވެރިކޮށެވެ.

އެމްޓީސީސީން 2022 ވަނަ އަހަރު ނިންމާލީ އެ ކުންފުނީގެ ތާރީޚުގައިވެސް އެންމެ ބޮޑު އާމްދަނީއާ އެކުގައެވެ. މިގޮތުން މިދިޔަ އަހަރު ނިމުނުއިރު އެ ކުންފުންޏަށް އާމްދަނީގެ ގޮތުގައި 2.47 ބިލިއަން ރުފިޔާ ވަނީ ލިބިފައެވެ. މިއީ އޭގެ ކުރީ އަހަރާ އަޅައިބަލާއިރު 26 އިންސައްތައިގެ ކުރިއެރުމެކެވެ. 2021 ވަނަ އަހަރު އެ ކުންފުންޏަށް އާމްދަނީގެ ގޮތުގައި ލިބުނީ 1.9 ބިލިއަން ރުފިޔާއެވެ.

އެމްޓީސީސީގެ މިދިޔަ އަހަރުގެ އާމްދަނީ ރެކޯޑު އަދަދަކަށް އަރާފައިވާއިރު، މިދިޔަ އަހަރު އެ ކުންފުނީގެ ހިންގުމުގެ ފައިދާވެސް ވަނީ އޭގެ ކުރީ އަހަރާ އަޅައިބަލާއިރު އިތުރުވެފައެވެ. އެގޮތުން، 2021 ވަނަ އަހަރު ހިންގުމުގެ ފައިދާގެ ގޮތުގައި 319 މިލިއަން ރުފިޔާ ލިބުނުއިރު، މިދިޔަ އަހަރު ލިބިފައިވަނީ 324 މިލިއަން ރުފިޔާއެވެ. މިއީ ގާތްގަނޑަކަށް 1.5 އިންސައްތައިގެ ކުރިއެރުމެކެވެ.