އާރްޑީސީގެ މަސައްކަތަށް ފާޑު ކިޔުމުގެ ޖާގައެއް ނޯންނާނެ: މޫކޭ
14 ޖޫން 2023 | ބުދަ 17:25ކުންފުނީގެ ކެޕޭސިޓީއާ މެދު ސުވާލު އުފައްދާނެ ޖާގައެއް ނެތް
މޫސާ އަލީ މަނިކު (މޫކޭ)
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީން)ގެ މަސައްކަތަށް ފާޑުކިޔުމުގެ ޖާގައެއް ނޯންނާނެ ކަމަށް އެ ކުންފުނީގެ މެނޭޖިންގ ޑިރެކްޓަރު މޫސާ އަލީ މަނިކު (މޫކޭ) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުން މޫކޭ ވިދާޅުވީ މަސައްކަތް ކުރިއަށް ގެންދަނީ ވަރަށް ފަރުވާތެރިކަމާއެކު ކަމަށެވެ. އަދި ކުންފުނީގެ ކެޕޭސިޓީއާ މެދު ސުވާލު އުފައްދާނެ ޖާގައެއް ނެތް ކަމަށެވެ.
އަމީނީމަގުގެ މަސައްކަތް ކުރިއަށްދާ ގޮތާއި ގުޅޭގޮތުން ވާހަކަ ދައްކަވަމުން މޫކޭ ވިދާޅުވީ މަސައްކަތް ނިންމުމުގެ އެންމެ ބޮޑު ހުރަކަށް އޮތީ 24 ގަޑިއިރު މަސައްކަތް ކުރެވޭނެ ގޮތް ނުވުން ކަމަށެވެ. ކުންފުނިން މަސައްކަތް ކުރާއިރު ކޮލެޓީ ކޮމްޕްރޮމައިޒް ނުކުރާ ކަމަށް ވެސް ވިދާޅުވިއެވެ.
މޫކޭ ވިދާޅުވީ މަގު ހެދުމަށް ގެންނަނީ އެންމެ ކޮލެޓީ ރަނގަޅު ސާމާނުތައް ކަމަށާއި މިހާރު ގެންނަ ސާމާނުތަކަކީ މިނިސްޓްރީން ހުއްދަ ހޯދުމަށްފަހު ގެންނަ ސާމާނުތައް ކަމަށެވެ. މިހާރު މަސައްކަތް ކުރިއަށް ގެންދާ ގޮތް ތަފާތުވާނެ ކަމަށާއި ކަންތައްތައް މޮނިޓަރކޮށް ބަލާނެ މީހުން މިހާރު ތިބޭނެ ކަމަށް ވެސް ވިދާޅުވިއެވެ.
ކުންފުނީގައި ދިވެހި މުވައްޒަފުން ގިނަކަން ފާހަގަކުރައްވާ މޫކޭ ވިދާޅުވީ އާރްޑީސީގެ މަސައްކަތުގައި ސުޕަވައިޒް ކުރާނީ ދިވެހިން ކަމަށެވެ. އަދި ދިވެހިންނަކީ މަސައްކަތަށް ރަނގަޅު ބަޔެއް ކަމަށް ވެސް ވިދާޅުވިއެވެ.
އަމީނީމަގު ހެދުމުގެ މަޝްރޫއު ކުރިއަށްދާއިރު ތާރުއެޅޭ މިންވަރަކުން މަގުތައް ހުޅުވާލާމުންދާ ކަމަށާއި އެހެންނަމަވެސް ދަތިތަކާއި ދިމާވާކަމަށް ވިދާޅުވިއެވެ. އެއީ މަގުގެ ދެފަޅީގައި ބައެއް މީހުން އުޅަނދުތައް ޕާކު ކުރާތީ ކަމަށް ވިދާޅުވިއެވެ. މަގުގެ ދެ ފަޅީގައި ވެހިކަލްތައް ޕާކު ކުރުމުން މަސައްކަތް ކުރިއަށް ގެންދިޔުމަށް ވެސް އުނދަގޫވާ ކަމަށް މޫކޭ ވިދާޅުވިއެވެ. އަދި އެތަނުގައި އުޅަނދު ޕާކު ނުކޮށް، ޖާގަ ދެއްވުމަށް މޫކޭ ވަނީ އެދިވަޑައިގެންފައެވެ.
