ބެލަރޫސް އިން ރަޝިޔާގެ ނިއުކްލިއަރ ހަތިޔާރުގެ ޑެލިވަރީ ނަގަން ފަށައިފި
14 ޖޫން 2023 | ބުދަ 17:16މިއީ ސޯވިއެޓް ޔޫނިއަން ރޫޅުފަހުން ރަޝިއާއިން ބޭރު ސަރަހައްދެއްގައި އެގައުމުގެ ނިއުކްލިއަރ ހަތިޔާރު ޑިޕްލޯއި ކުރާ ފުރަތަމަ ފަހަރު
ބެލަރޫސް އިން ރަޝިޔާގެ ނިއުކްލިއަރ ހަތިޔާރުގެ ޑެލިވަރީ ނަގަން ފަށައިފި
ބެލަރޫސް އިން ރަޝިޔާގެ ނިއުކްލިއަރ ހަތިޔާރުގެ ޑެލިވަރީ ނަގަން ފަށައިފިކަމަށް އެގައުމުގެ ރައީސް އެލެކްޒެންޑަރ ލުކަޝެންކޯ ވިދާޅުވެއްޖެއެވެ.
ލުކަޝެންކޯ ވަނީ އެގައުމުން ނަގަންފަށާފައިވާ ބައެއް ހަތިޔާރުތަކަކީ 1945 ވަނަ އަހަރު އެމެރިކާއިން ޖަޕާންގެ ހިރޮޝިމާ އަށާއި ނަގަސާކީއަށް ވައްޓާލި އެޓޮމިކް ބޮންތަކަށް ވުރެ ވަރުގަދަ ހަތިޔާރުތަކެއް ކަމަށްވެސް ފާހަގަކުރައްވާފައެވެ.
މިއީ ސޯވިއެޓް ޔޫނިއަން ރޫޅުނު ފަހުން ރަޝިއާއިން ބޭރު ސަރަހައްދެއްގައި އެގައުމުގެ ނިއުކްލިއަރ ހަތިޔާރު ޑިޕްލޯއި ކުރާ ފުރަތަމަ ފަހަރެވެ.
ލުކަޝެންކޯ ވަނީ އެގައުމަށް ރަޝިއާއިން މިސައިލާ ބޮން ލިބިފައިވާކަމަށް ވިދާޅުވެފައެވެ.
މިދިޔަ ހުކުރު ދުވަހު، ރަޝިއާގެ ރައީސް ވްލެޑްމިއަރ ޕުޓިން ވަނީ އެކަމަށް ހާއްސަ ފެސިލިޓީތައް ތައްޔާރުވުމުން ކަމަށް ވިދާޅުވެފައެވެ.
ރަޝިއާގެ ނިއުކްލިއަރ ހަތިޔާރު ބެލަރޫސްގައި ބަހައްޓަން ނިންމައި އެކަން ޕުޓިން އިއުލާންކުރައްވާފައި ވަނީ މާޗު މަހުއެވެ. އަދި އެމެރިކާއަށް އެގައުމުގެ ނިއުކްލިއަރ ހަތިޔާރު ޔޫރަޕްގެ ގައުމުތަކުގައި ބެހެއްޓޭ ނަމަ، ރަޝިއާއަށްވެސް އެގޮތަށް އަމަލުކުރެވޭނެ ކަމަށް ޕުޓިން ވަނީ ވިދާޅުވެފައެވެ.
އެމެރިކާއިން ރަޝިއާގެ އަމަލުތަކަށް ފާޑުކިޔަމުން ދިޔަ ނަމަވެސް، އެގައުމުން ނިއުކްލިއަރ ހަތިޔާރާ ގުޅިގެން ގެންގުޅޭ ސިޔާސަތުތަކަށް ބަދަލުނުގެންނާނެ ކަމަށްވެސް އެމެރިކާއިން ވަނީ ބުނެފައެވެ.
