އެމެރިކާގެ ލަސް ވެގަސްގައި ބަޑީގެ ހަމަލާދިން ސްޓެފަން ޕެޑޮކްގެ މިލްކިއްޔާތުގައި ހުރި ހަތިޔާރުގެ އަދަދު 42 އަށް އަރާ ކަމަށް އެމެރިކާގެ ފުލުހުން ބުނެފި އެވެ.

ލަސް ވެގަސްގެ މަންޑަލޭ ބޭ ރިޒޯޓް އެންޑް ކެސިނޯގައި އާދީއްތަ ދުވަހު ދިން ހަމަލާގެ މަޤްޞަދު ދެނެގަތުމުގެ މަސައްކަތް އެމެރިކާ ފުލުހުން ކުރަމުންދާއިރު، ފުލުހުން ވަނީ މަންޑަލޭ ބޭ ހޮޓަލުގައި އޭނާ ދިރިއުޅުނު ކޮޓަރިން 23 ހަތިޔާރެއް ހޯދާފައެވެ. މީގެ އިތުރުން ނެވާޑާ ސްޓޭޓްގެ މެސްކުއިޓްގައި ހުންނާ އޭނާގެ ގެއިން އިތުރު 19 ހަތިޔާރު ފުލުހުން ވަނީ ހޯދާފަ އެވެ.

ލަސް ވެގަސްގެ މެޓްރޮޕޮލިޓަން ޕޮލީސް ޑިޕާޓްމަންޓުން ދަނީ ހަމަލާ ދިން މަޤްޞަދު ދެނެގަތުމުގެ އިތުރުން ކުށުގެ ވެށި އިތުރަށް ދެނެގަތުމުގެ މަސައްކަތް ކުރަމުންނެވެ.

ބާވީސްހާހަށްވުރެ ގިނަ މީހުން ބައިވެރިވި މިއުޒިކް ފެސްޓިވަލަކަށް އަމާޒުކޮށް ބަޑީގެ ހަމަލާ ދީފައި ވަނީ މެންޑަލާ ބޭ ހޮޓަލުގެ 32 ވަނަ ފަންގިފިލާގައި ޕެޑޮކް ދިރިއުޅުނު ކޮޓަރީގައި ހުރެގެންނެވެ. ފުލުފުލުގައި ބަޑީގެ ހަމަލާތައް ފޮނުވާލުމަށް ޕެޑޮކް ބޭނުން ކޮށްފައިވަނީ އަސްކަރިއްޔާގައި ގެންގުޅޭ އޮޓެމެޓިކް މެޝިން ބަޑިއަކުން ކަމަށް ރިޕޯޓްތައް ބުނެ އެވެ. އަދި އެކަމަށްޓަކައި އޭނާ ހަތިޔާރު މޮޑިފައިކޮށްފައިވާ ކަމަށް ވެސް ޚަބަރުތައް ބުނެއެވެ. 

އެމެރިކާގެ ނެވާޑާގައި ޙުއްދައެއް އަދި ޙައްދެއްނެތި އާއްމުންނަށް ހަތިޔާރު ގަތުމުގެ ފުރުޞަތު ފަހިވެފައިވާއިރު، އޭނާ އަށް ނިސްބަތްވާ ހުރިހާ ހަތިޔާރެއް ވެސް ހޯދާފައިވަނީ ޤާނޫނުގެ ތެރެއިން ކަމަށް ރިޕޯޓްތައް ބުނެއެވެ. އެހެން ނަމަވެސް، ސެމީ އޮޓޮމެޓިކް ހަތިޔާރު ގަތުމަށް ފަހު، އުނި އިތުރު ގެނެސް އޮޓޮމެޓިކް ހަތިޔާރަށް ބަދަލުކޮށްފައިވާ ކަމަށް އަލްޖަޒީރާ އިން ރިޕޯޓް ކޮށްފައި ވެއެވެ.

ޕެޑޮކްގެ ކުށުގެ ރެކޯޑެއް ނެތް އަދި ނަފްސާނީ ބައްޔެއްގެ ތާރީޚެއް ވެސް ނެތް ކަމަށާއި، ބޭރުގެ ހަތިޔާރު އެޅި އެއްވެސް ޖަމާޢަތަކާއި ގުޅުމެއް ނެތް ކަން މިހާތަނަށް ފާހަގަ ވެފައިވާ ކަމަށް އެމެރިކާގެ ތަޙުގީގީ އިދާރާ އެފްބީއައި އިން ބުނެ އެވެ. ނަމަވެސް ރެކޯޑްތަކުން ދައްކާ ގޮތުން ޕެޑޮކްގެ ބައްޕަ ބެންޖަމިން ހޮސްކިންސް ޕެޑޮކްއަކީ ބޮޑު ކުށްވެރިއެކެވެ. އަދި ބޭންކް ފެޅުން ފަދަ ކުށްތަކާ ގުޅިގެންނާއި އެ ނޫން ވެސް ތަފާތު ކުށްތަކާ ގުޅިގެން އެއްޒަމާނެއްގައި އޭނާ ހިމެނިފައި ވަނީ އެމެރިކާގެ އެފްބީއައި މޮސްޓް ވޯންޓެޑް ލިސްޓަގައެވެ. 

ސްޓެފަން ޕެޑޮކްގެ އެއްބަނޑު އެއްބަފާ ކޮއްކޮ އެރިކް ޕެޑޮކް ސީއެންއެން އަށް ބުނީ، އޭނާގެ ނަފްސާނީ މައްސަލައެއް ނެތް ކަމަށާއި، އަދި ސިޔާސީ އެއްވެސް މަޤްޞަދެއް އޮތްކަން އާއިލާ އަށް ކަށަވަރުވެފައިނުވާ ކަމަށެވެ.

އެހެންނަމަވެސް އީރާޤާއި ސީރިއާގައި ގާއިމްވެފައިވާ ޓެރަރިސްޓް ޖަމާއަތް، އިސްލާމިކް ސްޓޭޓުން ވަނީ ހަމަލާގެ ޒިންމާ ނަގާ ކަމަށް ބުނެފައެވެ. އެހެންނަމަވެސް ޕެޑޮކް އާއި އިސްލާމިކް ސްޓޭޓާ ގުޅުމެއް އޮތް ކަން އަދި ކަށަވަރު ވެފައެއް ނުވެއެވެ.

އާދީއްތަ ދުވަހުގެ ހަމަލާއަކީ އެމެރިކާގެ ފަހުގެ ތާރީޚުގައި ހިނގި ބަޑި ޖެހުމުގެ އެންމެ ބޮޑު ހާދިސާއެވެ. އާދީއްތަ ދުވަހު ދިން ހަމަލާގައި 59 މީހަކު މަރުވެ، 527 މީހުން ޒަޚަމްވެފައިވެ އެވެ.

ބަޑީގެ ހަމަލާ ދިން 64 އަހަރުގެ ޕެޑޮކް ފެނިފައި ވަނީ މެންޑަލޭ ބޭ ހޮޓަލުގައި އޭނާ ހުރި ކޮޓަރީގައި މަރުވެފައި ވަނިކޮށެވެ. ރިޓަޔަރޑް އެކައުންޓެންޓެއް ކަމަށްވާ ޕެޑޮކް މަރުވެފައި ވަނީ އަމިއްލަ އަށް ބަޑި ޖަހައިގެން ކަމަށް ބެލެވޭ ކަމަށް އެމެރިކާ ފުލުހުން ބުނެ އެވެ.

އެމެރިކާގެ ގަން ވަޔަލެންސް އާކައިވްގެ ތަފާސް ހިސާބުތައް ދައްކާ ގޮތުން މިއަހަރުގެ މިހާތަނަށް އެމެރިކާގައި އާއްމު ތަންތަނުގައި ބަޑި ޖެހުމުގެ 273 ހާދިސާ އެއް ހިނގާފައި ވެއެވެ. މިމުއްދަތުގައި ބަޑީގެ ހަމަލާތަކުގައި 11 ހާހަށްވުރެ ގިނަ މީހުން މަރުވެ، 23 ހާހަށްވުރެ ގިނަ މީހުން ޒަޚަމްވެފައިވާ ކަމަށް އެގްރޫޕުން ބުނެ އެވެ.