ޕީޕީއެމް/ޕީއެންސީގެ ސަޕޯޓަރުންތަކެއް ޑރ. އިޔާޒަށް ފުރައްސާރަކޮށް ދިމާކުރި މައްސަލަ އަދާލަތުން ކުށްވެރިކޮށްފި
ވަރަށް ހުތުރު ބަސްތައް ބޭނުންކޮށްފައިވޭ
ޑރ. އިޔާޒާއި ޕީޕީއެމް/ޕީއެންސީގެ ސަޕޯޓަރުންތައް ދިމާކުރަނީ
އަދާލަތު ޕާޓީގެ އިލްމުވެރިންގެ މަޖިލީހުގެ ނައިބު ރައީސް ޑރ. މުހައްމަދު އިޔާޒަށް، ޕީޕީއެމް/ޕީއެންސީގެ ސަޕޯޓަރުންތަކެއް މަގުމަތިން ފުރައްސާރަކޮށް ދިމާކުރި މައްސަލަ އެޕާޓީން ކުށްވެރިކޮށްފިއެވެ.
ބުދަ ދުވަހު ޕީޕީއެމް/ޕީއެންސީ ކުރި މުޒާހަރާއެއްގެ ތެރެއިން ޑރ. އިޔާޒާއި ދިމާކޮށްފައިވަނީ މަޖީދީ މަގުމަތިންނެވެ. ސޯޝަލް މީޑިއާގައި އާއްމުވެފައިވާ ވީޑިއޯއިން ފެންނަނީ ޑރ.އިޔާޒު ސައިކަލުގައި ދަނިކޮށް ފަހަތުން ސަޕޯޓަރުން އެއްޗެހި ކިޔަމުން އަންނަތަނެވެ. އަދި ވަރަށް ހުތުރު ބަސްތައް ބޭނުންކޮށްފައިވެއެވެ. މި ވީޑިއޯ އާއްމުވުމާއި ގުޅިގެން އަދާލަތު ޕާޓީން ވަނީ އެކަން ކުށްވެރިކޮށްފައެވެ. އަދި އެއީ ބަލައިގަނެވޭނެ ކަމެއް ނޫން ކަމަށް އެޕާޓީން ބުނެއެވެ.
މިމައްސަލައާ ގުޅޭގޮތުން އަދާލަތު ޕާޓީގެ ތަރުޖަމާނު އަދި ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު ވިދާޅުވީ އަދާލަތު ޕާޓީގެ އިސްފަނޑިޔާރު އަދި އިލްމުވެރިންގެ މަޖިލީހުގެ ނައިބް ރައީސް ޑރ އިޔާޒާ މަގުމަތިން ދިމާކޮށް، އިސްލާމުން އެކަކުއަނެކަކަށް ރައްދުކުރުން ނަހީކުރައްވާފައިވާ ބަސްތަކުން މުޚާތަބުކޮށް ޕީޕީއެމް-ޕީއެންސީއިން ހިންގި ދަށުދަރަޖައިގެ ހުތުރު އަމަލު ހަރުކަށި އިބާރާތުން ކުށްވެރިކުރާ ކަމަށެވެ.
އަލީ ނަޒީރު ވިދާޅުވީ މިކަމުން ދޭހަކޮށްދެނީ އިދިކޮޅު ޕާޓީތަކުގެ ވެރިންގެ ރާވައިގެން އަމިއްލަ މަންފާއަށް އާންމު މެންބަރުން ލައްވާ އިސްލާމް ދީނާއި ގާނޫނުތަކާއި އަދި އާންމު އަޚުލާގީ މިންގަނޑާ ޚިލާފުކަންކަން ކުރުވާ ކަމަށެވެ. މިފަދަ ހުތުރު އަމަލުތަކުގެ ސަބަބުން އަދާލަތުގެ އިލްމުވެރިންގެ މަސައްކަތް ނުހުއްޓުވޭނެ ކަމަށް އޭނާ ވިދާޅުވިއެވެ.
