އަންނަ އަހަރު ޖަރުމަނުގައި ބޭއްވުމަށް ހަމަޖެހިފައިވާ ޔޫރޯ ފުޓުބޯޅަ މުބާރާތުގެ ކައުންޓްޑައުން ރަސްމީކޮށް ފަށައިފި އެވެ.
ބުދަ ދުވަހު ޖަރުމަނުގައި އެކަމަށްޓަކައި އޮތް ޚާއްސަ ރަސްމިއްޔާތެއްގައި މި ކައުންޓްޑައުން ފައްޓަވައި ދެއްވީ ޖަރުމަނުގެ ޗާންސެލާ އޯލާފް ސްކޯލްޒް އެވެ. މުބާރާތުގެ 100 ދުވަހުގެ ކައުންޓްޑައުން ފައްޓަވައި ދެއްވުމަށްފަހު ވާހަކަ ދައްކަވަމުން ސްކޯލްޒް ވިދާޅުވީ، އެއީ ޖަރުމަނަށް އަމިއްލަ ޤައުމުގައި ލިބޭނެ ބޮޑު ޝަރަފެއް ކަމަށެވެ. މިއީ ޖަރުމަނަށް ލިބޭ ފަޚުރުވެރި ވަގުތު ކޮޅެއްގެ ގޮތުގައި ސިފަ ކުރައްވާ އޭނާ ވިދާޅުވީ، އުންމީދު ކުރަނީ ޖަރުމަނުގައި ބާއްވާ މުބާރާތަކީ ހުރިހާ ގޮތަކުން ވެސް ކާމިޔާބު އަދި ޝަރަފުވެރި މުބާރާތަކަށް ވާނެ ކަމަށެވެ. އަނެއްކޮޅުން އަމިއްލަ ފަސްގަނޑުގައި ޖަރުމަނު ޓީމުން ފަޚުރުވެރި ކާމިޔާބެއް ހޯދާނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވި އެވެ.
މީގެ އިތުރުން ޖަރުމަނު ފުޓުބޯޅަ އެސޯސިއޭޝަންގެ ރައީސް ބާންޑް ވިދާޅުވީ، ކުޅިވަރުގެ ގޮތުގައި ފުޓުބޯޅަ އަކީ ޖަރުމަނަށް އުފާވެރިކަން ގެނެސްދޭ ކުޅިވަރެއް ކަމަށެވެ. އޭނާ ވިދާޅުވީ ޖަރުމަނުން އަބަދު ވެސް އިސްކަން ދެމުން އަންނަނީ ޕްރޮފެޝަނަލް ފުޓުބޯޅަ އަށް ކަމަށެވެ. އެގޮތުން ކުލަބުތަކަކީ ވެސް ވަރުގަދަ ކުލަބުތަކަކަށް ހެދުމާއި، ކުޅުންތެރިންނަކީ ވެސް ވަރުގަދަ ބަޔަކަށް ހެދުމަށް ޚާއްސަ އަހަންމިއްޔަތު ކަމެއް ދެއްވާ ކަމަށް އޭނާ ވިދާޅުވި އެވެ. ޖަރުމަނުގައި 25،000 ފުޓުބޯޅަ ކުލަބު އޮންނައިރު، މިއީ އެ ޤައުމުގެ ފުޓުބޯޅަ އަށް އިންގިލާބެއް ގެންނާނެ މުބާރާތެއް ކަމަށް ވެސް އޭނާ ވަނީ ވިދާޅުވެފަ އެވެ.
މި ރަސްމިއްޔާތުގައި އެ ޤައުމުގެ ކުޅިވަރު މިނިސްޓަރު ނޭންސީ ފޭޒާ ވެސް ވަނީ ބައިވެރިވެ ވަޑައިގެންފަ އެވެ. އެ ރަސްމިއްޔާތުގައި އެކަމަނާ ވިދާޅުވީ، ކުޅިވަރު މިނިސްޓަރުގެ ހައިސިއްޔަތުން އެކަމަނާ އަށް ވެސް ބޮޑު އުފަލެއް ލިބިލައްވާ ކަމަށެވެ. ކައުންޓްޑައުން އާއެކު މުބާރާތުގައި މަސައްކަތް ކުރާނެ ވޮލެންޓިއަރުން ހޯދުމަށް މަސައްކަތް ކުރާ ކަމަށާއި، އުންމީދަކީ 15،000 ވޮލެންޓިއަރުން ލިބުން ކަމަށް ވެސް ފޭޒާ ވަނީ ވިދާޅުވެފަ އެވެ. އިތުރަށް އެކަމަނާ ވިދާޅުވީ، ޖަރުމަނުން އަަަބަދު ވެސް ފުޓުބޯޅައިގެ ކަންކަމުގައި އިސްކަން ދެމުން އަންނަ ކަމަށާއި، ޔޫރޯ މުބާރާތުގައި ރަނގަޅު ކާމިޔާބެއް ލިބުމަށް ވެސް އެދޭ ކަމަށެވެ.
މީގެ ކުރިން ޖަރުމަނުން ވަނީ 1998 ވަނަ އަހަރުގެ ޔޫރޯ މުބާރާތް ވެސް ހޯސްޓު ކޮށްފަ އެވެ. ޖަރުމަނުގައި އަންނަ އަހަރުގެ މުބާރާތް ކުރިއަށް ދާނީ ޖޫން މަހުގެ 14 ވަނަ ދުވަހުން ފެށިގެން ޖުލައި މަހުގެ 14 ވަނަ ދުވަހާ ހަމައަށެވެ.
