ސައުދީ ޕްރޯ ލީގުގެ އަލް ހިލާލް އިން ބެލްޖިއަމްގެ ރޮމެލޫ ލުކާކޫއާ ބައްދަލުކޮށްފައިވާ ކަމަށް މީޑިއާތަކުން ބުނެފި އެވެ.
މީޑިއާތަކުގައި ބުނެފައިވާ ގޮތުން އަލް ހިލާލްގެ އޮފިޝަލުން ވަނީ ފްރާންސްގެ ޕެރިހުގައި ލުކާކޫއާ ބައްދަލުކޮށްފަ އެވެ. އެ ބައްދަލު ކުރުން ބާއްވާފައިވާއިރު، އެކުލަބުން ވަނީ ލުކާކޫ ހޯދުމުގެ ޝައުޤުވެރިކަން ވެސް ފާޅުކޮށްފަ އެވެ. އެންމެ ފަހުން ލުކާކޫ ކުޅުނީ އިޓާލިއަން ލީގުގެ އިންޓަ މިލާން އަށެވެ. އެއް އަހަރު ދުވަހުގެ އެއްބަސްވުން މި ސީޒަންގެ ނިޔަލަށް ހަމަވާ ނަމަވެސް، ލުކާކޫ ބޭނުންވަނީ އަންނަ ސީޒަނުގައި ވެސް އިންޓަ އަށް ކުޅެން ކަމަށް ވެސް ވަނީ ބުނެފަ އެވެ. އެހެންކަމުން އިންޓަ އިން މަސައްކަތް ކުރަނީ ލުކާކޫ އެ ކުލަބުގައި ބަހައްޓާށެވެ.
ނަމަވެސް އަލް ހިލާލް އިން ވަނީ ލުކާކޫއާ ބައްދަލުކޮށް، ހުށަހެޅުމާ ގުޅޭ ގޮތުން މަޝްވަރާކޮށްފައި ކަމަށް ވަނީ ބުނެފަ އެވެ. އެގޮތުން އެ ކުލަބުން ލުކާކޫ އަށް ހުށަހަޅަނީ މުސާރައިގެ ގޮތުގައި އަހަރަކު އޭނާ އަށް 16 މިލިއަން ޕައުންޑު ލިބޭ ހުށަހެޅުމެއް ކަމަށް ވެސް ވަނީ ބުނެފަ އެވެ. އިނގިރޭސި ޕްރިމިއާ ލީގުގެ ޗެލްސީގައި ލުކާކޫ އަށް އަހަރަކު ލިބެނީ 11 މިލިއަން ޕައުންޑެވެ. އެހެންކަމުން އޭނާ އަލް ހިލާލްގެ ހުށަހެޅުމާ މެދު ވެސް ވިސްނާނެ ކަމަށް މީޑިއާތަކުން ވަނީ ބުނެފަ އެވެ.
ދެ ވަނަ ފަހަރަށް ލުކާކޫ ޗެލްސީ އަށް ބަދަލުވީ 2021 ވަނަ އަހަރު އެވެ. އެއީ އިންޓަ ދޫކޮށްލުމަށްފަހު އެވެ. ނަމަވެސް ޗެލްސީގެ ސިސްޓަމަށް ލުކާކޫ ނުފެތޭތީ އެ ކުލަބުން ވަނީ ލޯނު އެއްބަސްވުމަކަށް އޭނާ އިންޓަ އަށް ދޫކޮށްލައިފަ އެވެ. އޭގެ ފަހުން ލުކާކޫ ވަނީ އިންޓަ އަށް ކުޅެދިން 37 މެޗުގައި 14 ލަނޑު ޖަހައިފަ އެވެ. އިންޓަ އާއެކު މި ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި ލުކާކޫ ކުޅެފައިވާއިރު، އިންޓަ އެ މެޗުން ސަލާމަތްކޮށްދިނުމަށް އޭނާ އަށް ވަނީ ތަނަވަސް ފުރުސަތުތަކެއް ލިބި، ބޭކާރުވެފަ އެވެ.
