ފާހިޝް އަމަލުތައް ޕްރޮމޯޓްކުރުން އިތުރުވާތީ އެމްއާރްއެމްގެ ކަންބޮޑުވުން
އެމްއާރްއެމްއިން ވަނީ މި މައްސަލަތައް ބަލައި ގާނޫނީ ފިޔަވަޅު އެޅުމަށް ގޮވާލާފައި
އެމްއެމްއާރްއެމް ޕްރެސް
ފާޙިޝް ޢަމަލުތައް ޕްރޮމޯޓްކޮށް، އެފަދަ ނުބައި ޢަމަލުތައް ދިވެހި މުޖްތަމަޢުގައި ފެތުރެމުންދާތީ އެމްއާރްއެމްއިން ކަންބޮޑުވުން ފާޅުކޮށްފިއެވެ.
މިކަމާއި ގުޅިގެން އެމްއާރްއެމްއިން ނެރުނު ބަޔާނުގައި ބުނީ މިހާރަކަށް އައިސް، ފައިސާ ހޯދުމުގެ ނިޔަތުގައާއި އަދި އެހެނިހެން ގޮތް ގޮތުން، ދިވެހި މުޖުތަމަޢުގައި އެކިއެކި ފާޙިޝް ޢަމަލުތައް ޕްރޮމޯޓުކޮށް، އެއްވެސް ޖެހިލުމެއް ނެތި އެފަދަ ނުބައި ޢަމަލުތަކަށް ހިތްވަރުދޭ މެސެޖުތައް، ސޯޝަލް މީޑިއާގައި ދައުރުވަމުންދާ ދިއުމަކީ އެ ޕާޓީއިން އިންތިހާއަށް ކަންބޮޑުވާ ކަމެއް ކަމަށެވެ.
އެފަދަ މައްސަލަތަކުގައި ބައިވެރިވާ ފަރާތްތަކާ މެދު، ކަމާބެހޭ މުއައްސަސާތަކުން އަޅަންޖެހޭ ޤާނޫނީ ފިޔަވަޅު ނޭޅި، މައްސަލަތައް ދިގުލައި ދިއުމަކީ ބަލައިގަނެވޭނެ ކަމެއް ނޫން ކަމަށާއި، އެފަދަ ޢަމަލުތައް ފްރޮމޯޓްކޮށް، އެފަދަ ފާޙިޝް ޢަމަލުތަކުގައި ބައިވެރިވާ މީހުންގެ މައްސަލަ، އެއްވެސް އިސްތިސްނާއެއް ނެތި، ހަމަހަމަ އުޞޫލެއްގެ ދަށުން ކަމާއިބެހޭ މުއްސަސާތަކުން، ވީހާވެސް އަވަހަކަށް ބަލައި ޤާނޫނީ ފިޔަވަޅު އެޅުމަށް އެމްއާރްއެމްއިން ވަނީ ގޮވާލާފައެވެ.
މިފަދަ ޢަމަލުތަކަކީ ދިވެހި މުޖްތަމަޢުގެ އިޖްތިމާޢީ ފޭރާން ވީދި، މުޅި މުޖްތަމަޢު ނުރައްކަލެއްގެ ތެރެއަށް ހުށަހެޅިގެންދާނެ ބިރުވެރި ކަންކަން ކަމަށާއި، މާތް ވެގެންވާ އިސްލާމްދީނަށް އޮންނަ ލޯތްބާއި ޤަދަރު ކުޑަވެގެންދާނެ ކަމެއް ކަމަށް އެމްއާރްއެމްއިން ބުނެފައިވެއެވެ. އެހެންކަމުން، އެފަދަ ފާޙިޝް ޢަމަލުތައް ހުއްޓުމަށްޓަކައި މުޅި މުޖްތަމަޢު ގުޅިގެން މަސައްކަތް ކުރަންޖެހޭ ކަމުގައި އެ ފާޓީން ދެކޭކަމަށް އެމްއާރްއެމްއިން ވަނީ ބުނެފައެވެ.
