ޒެލެންސްކީގެ އުފަން ސިޓީއަށް ރަޝިއާގެ ވަރުގަދަ މިސައިލް ހަމަލާތަކެއް

ރަޝިއާގެ ވަރުގަދަ މިސައިލް ހަމަލާތަކެއް ޔޫކްރެއިންގެ އިތުރު ސިޓީއަކަށް އަމާޒުވެއްޖެއެވެ.

އަންގާރަ ދުވަހު ރަޝިއާއިން ވަނީ ޔޫކްރެއިންގެ ސެންޓްރަލް ސިޓީއެއް ކަމަށްވާ ކްރިވީ ރިއްހް އަށް ގިނަ މިސައިލްތަކެއް ފޮނުވާލާފައެވެ.

ޔޫކްރެއިނުން މައުލޫމާތުދޭގޮތުގައި މިހަމަލާގައި އެގައުމުގެ ތިން މީހަކު ވަނީ މަރުވެފައެވެ. އަދި 25 މީހަކަށް އެކިވަރުގެ އަނިޔާތައް ވަނީ ލިބިފައެވެ.

ޔޫކްރެއިންގެ އޮފިޝަލުންނާ ހަމަލާދީ މީޑިއާތަކުން ރިޕޯޓުކޮށްފައިވާގޮތުން ރަޝިއާގެ ހަމަލާތަކުގައި އެސިޓީގެ އުމްރާނީ ގިނަ އިމާރާތްތަކަކަށް ވަނީ ގެއްލުން ލިބިފައެވެ. އާންމުން ދިރިއުޅޭ އިމާރާތްތަކަށްވެސް ރަޝިއާގެ މިސައިލްތައް އަމާޒުވެފައިވާކަމަށް ރިޕޯޓުތައް ބުނެއެވެ.

ހަމަލާތަކުގެ ސަބަބުން ބައެއް އިމާރާތްތައް ވެއްޓި، އާންމުން އިމާރާތްތަކުގެ ދަށުގައި ތާށިވިކަމަށް ޔޫކްރެއިންގެ އޮފިޝަލުން ބުނެއެވެ.

ކްރިވީ ރިއްހް އަކީ ޔޫކްރެއިންގެ ރައީސް ވޮލޮޑިމީރް ޒެލެންސީގެ އުފަން ސިޓީއެވެ. ޒެލެންސްކީ ވަނީ އެމަނިކުފާނުގެ އުފަން ސިޓީއަށް ރަޝިއާއިން ދިން ހަމަލާތައް ކުއްވެރިކޮށްފައެވެ.

ރިޕޯޓުތައް ބުނާގޮތުން ރަޝިއާއިން ވަނީ އެސިޓީއަށް 14 ކްރޫސް މިސައިލް އަމާޒުކޮށްފައެވެ. ޔޫކްރެއިންގެ އަސްކަރިއްޔާއިން އޭގެ 10 މިސައިލް ވައްޓާލާފައިވާކަަމަށް ވަނީ ބުނެފައެވެ.

މިކަމާ ގުޅިގެން ރަޝިއާގެ ސީދާ ބަހެއް އަދި ރިޕޯޓުކޮށްފައިވެއެވެ.

ހަނގުރާމާގައި އާންމުންނަށް ހަމަލާތައް އަމާޒުކުރަމުން ނުދާކަމަށް ރަޝިއާ އަދި ޔޫކްރެއިނުންވެސް ދަނީ ބުނަމުންނެވެ.