ރާއްޖޭގައި ޓެކްނިކަލް އޮފިޝަލުން ނެތުމަކީ ނެޓްބޯޅައަށް އޮތް ވަރަށްބޮޑު ޗެލެންޖެއް- ފަޒްނާ
ޤައުމީ މުބާރާތަށް ދެ އަމްޕަޔަރުން ބޭރުން ގެނައި
ނެޓްބޯޅަ އެސޯސިއޭޝަންގެ ރައީސް ފަޒްނާ ޖަލީލް
ރާއްޖޭގައި ޓެކްނިކަލް އޮފިޝަލުން ނެތުމަކީ ނެޓްބޯޅައަށް އޮތް ވަރަށްބޮޑު ޗެލެންޖެއްކަމަށް ނެޓްބޯޅަ އެސޯސިއޭޝަންގެ ރައީސް ފަޒްނާ ޖަލީލް ވިދާޅުވެއްޖެއެވެ.
ޤައުމީ ނެޓްބޯޅަ މުބާރާތުގެ ފައިނަލް މެޗަށްފަހު ރާއްޖެ ޓީވީގެ "ކުޅިވަރު ފައިލް" ޕްރޮގްރާމަށް ދެއްވި އިންޓަރވިއުއެއްގައި ފަޒްނާ ވިދާޅުވީ މިފަހަރުގެ މުބާރާތްވެސް ކުރިއަށް ގެންދަން ޖެހުނީ ރާއްޖެއިން ބޭރުން ދެ އަމްޕަޔަރުން ގެނެސްގެން ކަމަށެވެ. އަދި މުބާރާތަށް ޓޭބަލް އޮފިޝަލުން ތަމްރީންކޮށްގެންކަމަށެވެ. އަމްޕަޔަރުން ހިމެނޭ ގޮތަށް ރާއްޖޭގެ ޓެކްނިކަލް އޮފިޝަލުން ތަމްރީނުކުރަން މަސައްކަތްތަކެއް ކުރެވޭކަމަށްވެސް ވިދާޅުވިއެވެ. އެކަމަކު ކޯވިޑްގެ ހާލަތަށްފަހު އަދިކިރިޔާ ރަނގަޅަށް ފަށައިގަނެވުނީ ކަމަށާއި, ބޭރުގެ އަމްޕަޔަރުން ނުލާ މުބާރާތްތައް ކުރިއަށް ގެންދަން އުއްމީދުކުރާކަމަށް ވިދާޅުވިއެވެ. ފަޒްނާ ވިދާޅުވީ ބޭރުން އަމްޕަޔަރުން ގެނެސްގެން ދިހަ ބާރަ ދުވަސް ރާއްޖޭގައި ބައިތިއްބަން ޖެހުމުން މުބާރާތަށް ކުރަންޖެހޭ ޚަރަދާ އެއްވަރުގެ ޚަރަދެއް އަމްޕަޔަރުންނަށް ކުރަން ޖެހޭކަމަށެވެ. އޭގެ ބަދަލުގައި އެ ފައިސާ ޝައުޤުހުރި ދިވެހި ކުދިންނަށް ދެވޭގޮތްވުން ބޭނުންވާކަން ފާހަގަކުރެއްވިއެވެ.
ޤައުމީ މުބާރާތާ ގުޅޭގޮތުން ވިދާޅުވީ ވޭތުވެދިޔަ ހުރިހާ އަހަރުތަކެއްގެ މުބާރާތްތަކަށް ބަލާފަ ގިނަ ކަންކަން ރަނގަޅުކުރިކަމަށެވެ.
ނެޓްބޯޅައަކީ ވެސް މުބާރާތްތެރޭގައި ސަޕޯޓަރުން ގިނަ ކުޅިވަރެއްކަން ފާހަގަކުރައްވާ ފަޒްނާ ވިދާޅުވީ ނެޓްބޯޅަ ކުޅޭ މާހައުލަކީ އެކަށީގެންވާ މާހައުލަކަށް ހަދަން މަސައްކަތްކުރައްވާ ކަމަށެވެ. އޭނާ ވިދާޅުވީ ދެން އޮންނަ މުބާރާތެއް ކުރިއަށްދާނީ ނެޓްބޯޅަ ކޯޓްގެ ރޮސްޓްރަމްއާވެސް އެކު, ހިތްހަމަޖެހިލައިގެން މެޗުތައް ބަލާލެވޭނެ ކަހަލަ ގޮތަކަށް ކަމަށެވެ.
