މަންމަ މަރުވިތާ 40 ދުވަސް ފަހުން ސަލާމަތްވި ދަރިންކޮޅުގެ އިންތިޒާރުގައި މާމައާއި ކާފަ ކެތްމަދުވެފައި

އެއީ އެ ނަޞީބު ލިބިފައި އޮތް އެއްވެސް މީހަކު ދެކޮޅު ހަދާނެ ޙަޤީޤަތެއް ނޫނެވެ. އެފަދަ ޠާޚިރު، ސާފު ސީދާ ލޯތްބެއް، ދެވަނަ މީހެއްގެ ފަރާތުން ނުލިބޭ ކަމަށް ބުނާ މީހުންވެސް މަދެއް ނޫނެވެ. މި ދައްކަނީ، މާމަ-ކާފައިންގެ ފަރާތުން ލިބޭ ލޯބީގެ ވާހަކައެވެ. ބައެއް ފަހަރު، ބަނޑު އަޅާ ވިހޭ މައިމީހާއާއި އުފަން ބައްޕައަށް ވުރެވެސް ބޮޑަށް، މާމަ-ކާފަގެ ފަރާތުން ލިބޭ ލޯތްބާއި، އޯގާތެރިކަމާއި ޙަމްދަރުދީ މާ ފުރިހަމައޭ ހީވާ ފަހަރުވެސް އާދެއެވެ.

މީގެ ދޮޅުމަހެއްހާ ދުވަސް ކުރިން ކޮލަމްބިއާގެ ޖަންގައްޔަކަށް ވެއްޓުނު ކުޑަކުޑަ މަތިންދާ ބޯޓުން ދަތުރު ކުރި 4 ބެއިން، ސަލާމަތުން، ހެޔޮ ހާލުގައި، ދިރިތިއްބާ، 40 ދުވަސް ފަހުން ފެނުން ވެގެން ދިޔައީ އެކުދިންގެ މާމަ-ކާފަގެ މޫނުމައްޗަށް އިންތިހާ ހިނިތުންވުން ގެނުވި ޚަބަރަކަށެވެ. އެ ބުނާ އިންތިހާ ލޯބީގެ ފުރިހަމަ ރަމްޒު، ފާޅުވެގެން ދިޔައެވެ.

4 ބެއިން ސަލާމަތް ކުރުމަށް ކޮލަމްބިއާގެ އަސްކަރިއްޔާއިން މަސައްކަތްކޮށް، އެކަން ކާމިޔާބު ކުރީ ޖޫން 9 ވީ ހުކުރު ދުވަހުއެވެ. އެ ކުދިން ފެނިފައި ވަނީ، ބޯޓު ވެއްޓުނު ސަރަޙައްދާ މާ ދުރު ނޫން ހިސާބަކުންނެވެ.

އޭނާއަށް ކާފަ ކިޔާ 3 އަންހެން ދަރިންނާއި ފިރިހެން ކުއްޖާ ސަލާމަތްވި ޚަބަރާއެކު މިއަދު އޭނާ ހުރީ އިންތިހާ އުފަލުން ކަމަށް ފިދެންސިއޯ ވެލަންސިއާ ބުންޏެވެ.

7 މީހުންނާއެކު ދަތުރު ކުރަމުން ދިޔަ ސެސްނާ 206 މަތިންދާ ބޯޓުގެ އިންޖީނު ފެއިލްވެ، މޭޑޭ އެލަރޓް އިޢުލާން ކުރީ މެއި 1 ވަނަ ދުވަހުގެ ފަތިހުގެ ވަޤުތެއްގައެވެ. ބޯޓު ވެއްޓުނު ހާދިޘާގައި، ބޮޑު 3 މީހުން މަރުވީއެވެ. އޭގެ ތެރޭގައި ބޯޓު ދުއްވަން އިން ޕައިލެޓާއި، 4 ބެއިންގެ މަންމަ ކަމަށް ވާ މަޖްދަލީނާ މުޗުޓޫއީވެސް ހިމެނެއެވެ. އެ މީހުންގެ ހަށިގަނޑުތައް ފެނިފައި ވަނީ، ވެއްޓިފައި ވާ ބޯޓުގެ އެތެރެއިންނެވެ. އެމީހުން މަރުވީ، ބޯޓު ވެއްޓި، ޖެހުނު ވަޤުތު ކަމަށް މަޢުލޫމާތު ލިބެއެވެ.

ޢުމުރުން 13 އަހަރާއި، 9 އަހަރު އަދި 4 އަހަރާއި، މިހާރު ޢުމުރުން އެންމެ 12 މަސް ފުރިފައި ވާ 4 ބެއިންގެ ފުރާނަ ސަލާމަތްވިއެވެ. ކޮލަމްބިއާގެ އަސްކަރިއްޔާއިން ވަނީ، ޖަންގަލީގެ މެދުގައި އެކުދިންނާއެކު ނަގާފައިވާ ފޮޓޯއެއް އާންމު ކޮށްފައެވެ.

ކުދިން ސަލާމަތް ކުރުމުގެ މަސައްކަތުގައި ބައިވެރި ކުރި ކުއްތާތަކެއް މީގެ ކުރިން ވަނީ، އެކުދިން ދިރި ތިބުމަށް ކައިބޮއެ އުޅުނު މޭވާތަކެއް ހޯދާފައެވެ. އަދި ޖަންގަލިން ލިބެން ހުރި އެކި ވަޞީލަތްތައް ބޭނުންކޮށްގެން، ބޯހިޔާވަހިކަން ހޯދުމަށް އެކުދިން ހަދާފައި ހުރި ޖިފުޓިގަނޑެއްވެސް ވަނީ ހޯދާފައެވެ.

ޖަންގަލި ތެރެއިން ކުދިން ސަލާމަތް ކުރުމަށް ފަހު، ފަރުވާ ދިނުމަށް 4 ކުދިންވެސް ގެންގޮސްފައި ވަނީ ޢާއިލާއާ ދުރު ހިސާބަކަށް ކަމުން، އެ ޢާއިލާއިން ވަނީ، ދަރިންނާ ބައްދަލުވާނެ ގޮތް ހަދާ ދިނުމަށް، ކޮލަމްބިއާގެ ރައީސްއަށް ދަންނަވާފައެވެ.