ފްރެންޗް އޯޕަން ކާމިޔާބުކޮށް ޖޮކޮވިޗް އަށް ތާރީޚީ ރެކޯޑެއް

ފްރެންޗް އޯޕަން ކާމިޔާބުކޮށް ސާބިއާގެ ނޯވަކް ޖޮކޮވިޗް ތާރީޚީ ރެކޯޑެއް ހޯދައިފި އެވެ.

އާދިއްތަ ދުވަހުގެ ރޭ ކުޚުނު ފައިނަލްގައި އޭނާ ވާދަކޮށްފައި ވަނީ ނޯވޭ އަށް ނިސްބަތްވާ ކެސްޕާ ރޫޑުއާ އެވެ. މުޅި ފައިނަލް މެޗުގައި ވެސް ޖޮކިވިޗްގެ ފަރާތުން ފެނިފައި ވަނީ މޮޅު ކުޅުމެކެވެ. މިއަހަރުގެ ފްރެންޗް އޯޕަން މުބާރާތުގެ ސެމީ ފައިނަލްގައި ޖޮކޮވިޗް ވަނީ ދުނިޔޭގެ ރޭންކިންގެ އެއް ވަނައިގައި އޮތް ސްޕެއިންގެ ކާލޮސް އަލްކަރާޒް ބަލިކޮށްފަ އެވެ. މި ކާމިޔާބާއެކު ޖޮކިވިޗަށް ދުނިޔޭގެ ރޭންކިންގެ އެއް ވަނަ ލިބޭނެ އެވެ.

މިއަހަރުގެ ފްރެންޗް އޯޕަން ކާމިޔާބުކޮށް ޖޮކޮވިޗް ވަނީ، އެންމެ ގިނަ ގްރޭންޑް ސްލޭމް ކާމިޔާބު ކުރި ކުޅުންތެރިޔާ އަށް ވެފަ އެވެ. މީގެ ކުރިން މި ރެކޯޑު އޮތީ ސްޕެއިންގެ ރަފައެލް ނަޑާލް އަދި ޖޮކޮވިޗް އަތުގަ އެވެ. އެއީ ކޮންމެ ކުޅުންތެރިޔަކު 22 ގްރޭންޑް ސްލޭމް އެވެ. ނަމަވެސް ނަޑާލް ފަހަތަށް ޖައްސާލުމަށް ފަހު ޖޮކޮވިޗް ވަނީ ކުރިއަށް ޖެހިލައިފަ އެވެ. އަނިޔާގެ ސަބަބުން މިއަހަރުގެ ފްރެންޗް އޯޕަންގައި ނަޑާލް ވާދަކޮށްފައެއް ނުވެ އެވެ. މިއީ ޖޮކޮވިޗް ފްރެންޗް އޯޕަން މުބާރާތް ކާމިޔާބު ކުރި ތިން ވަނަ ފަހަރެވެ. މީގެ ކުރިން އޭނާ ވަނީ 2016 ވަނަ އަހަރާއި 2021 ވަނަ އަހަރު ފްރެންޗް އޯޕަން ކާމިޔާބު ކޮށްފަ އެވެ.