ޓްރަމްޕްގެ ގެއިން ފެނުނު ބައެއް ސިއްރު ފައިލްތައް "ޝަވަރ" އެއްގެ ތެރޭގައި ވެސް ބަހައްޓާފައި ހުރި

އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ގެއިން އެމެރިކާގެ ވެރިކަމުގެ ބައެއް ސިއްރު ފައިލްތަކާއި ލިޔުންތައް ފެނުނު މައްސަލައިގައި ޓްރަމްޕްގެ މައްޗަށް މިހާރުވަނީ ދައުވާ އުފުލާފައެވެ.

ޓްރަމްޕްގެ ބީޗްސައިޑް މޭންޝަން "މަރަލާގޯ" އިން ފެނިފައިވާ ލިޔުންތަކުގެ ތެރޭގައި އެމެރިކާގެ ބައެއް ނިއުކްލިއަރ ސިއްރުތަކާއި އަދި މިލިޓަރީ ޕްލޭންތައް ހިމެނެއެވެ. މީގެ އިތުރުން ފެނުނު ބައެއް ފައިލްތަކާއި ޑޮކިއުމަންޓްތައް އާންމުކޮށް އިވެންޓުތައް ބާއްވާ ބޯލް ރޫމެއްގައާއި އަދި ފެންވަރާތަނެއް (ޝަވަރ) އެއްގައި ވެސް ބަހައްޓާފައި ހުރިކަމަށް ވެއެވެ.

ޓްރަމްޕާ ދެކޮޅަށް ދައުވާކުރުމަށް ހުށަހެޅި ލިޔުމުގައި 37 ކަމެއް ފާހަގަކޮށްފައިވާއިރު، ޑޮކިއުމަންޓްތައް މަރަލާގޯގައި ހުރިކަން އެނގިގެން ބަލާފާސްކުރަން އުޅުމުން އެކަމަށް ހުރަސްއަޅާ އިންވެސްޓިގޭޓަރުންނަށް ދޮގުހަދާ އޮޅުވާލައްވަން މަސައްކަތް ކުރެއްވި ކަމަށް ބުނެފައިވެއެވެ.

ހަމަ މި މައްސަލައިގައި ޓްރަމްޕްގެ ޕަރސަނަލް އެއިޑްއެއްގެ މައްޗަށްވެސް ވަނީ ދައުވާ ކުރަން ފޮނުވާފައެވެ. އެއީ މަރަލާގޯ އަށް ދިޔަ އެފްބީއައި އޭޖެންޓުންނަށް ފޮރުވުމަށްޓަކައި ފައިލްތަކާއި ޑޮކިއުމަންޓްތައް އެއްތަނުން އަނެއްތަނަށް ގެންދިއުމުގެ ކުށެވެ.

ޓްރަމްޕާ ދެކޮޅަށް ހުށަހެޅުނު 49 ސަފުހާގެ ދައުވާގެ ލިއުންތަކަކީ އެމެރިކާގެ ކުރީގެ ރައީސްއަކާ ދެކޮޅަށް އުފުލޭ ފުރަތަމަ ފެޑަރަލް ދައުވާގެ ލިއުމެވެ. އޭގައިވާ ގޮތުން ކަރުދާސް ފޮށިފޮށީގައި ޓްރަމްޕް އަމިއްލަ ގެކޮޅުގައި ރައްކާކުރައްވާފަހުރި ލިޔުންތަކުގެ ތެރޭގައި އެމެރިކާގެ ނިއުކްލިއަރ ޕްރޮގްރާމާބެހޭ ސިއްރު ލިޔުންތައް، ހަތިޔާރު އަދި ދިފާއީ ގާބިލިއްޔަތު ހުރި މިންވަރާބެހޭ ލިޔުންތައް، މިލިޓަރީ ހަމަލާއެއް އަތުވެއްގެ ހިނދެއްގައި އެމެރިކާގެ "ބަލިފައި" ހުރި ދިމާތަކާބެހޭ މައުލޫމާތު، އަދި ބޭރުގެ ހަމަލާއެއް އަތުވެއްޖެ ހިނދެއްގައި އެމެރިކާއިން ރައްދުހަމަލާތައްދޭނެ ގޮތުގެ ޕްލޭން ފަދަ މުހިންމު ކަންކަން އެކުލެވޭ ލިޔުންތައް މަރަލާގޯ އިން ފެނިފައިވެއެވެ.

ޕްރޮސެކިއުޓަރުން ބުނެފައިވާ ގޮތުގައި ޓްރަމްޕްގެ ޓަރމް ހަމަކުރައްވާ ގެއަށް ވަޑައިގެންނެވިއިރު 300 އެއްހާ ކްލެސިފައިޑް ފައިލް ގެންދަވާފައި ވެއެވެ. ޓްރަމްޕްގެ ބޮޑު، ބީޗްސައިޑް އެސްޓޭޓް މަރަލާގޯ އަކީ މުއްދަނދި ޕްރައިވެޓް މެންބަރުންގެ ކްލަބެއްގެ ގޮތުގައި ވެސް ބޭނުންކޮށް، އެތަނެއްގައި އެތައް ސަތޭކަ މެހްމާނުންނަށް އިވެންޓްތައް ބާއްވާ ތަނެކެވެ. އަދި މިފަދަ އިވެންޓުތައް ބާއްވާ ބޯލް ރޫމެއްގައި ވެސް، ހުއްދަނެތް އެތައް ބަޔަކަށް ފެނުމުގެ ފުރުސަތު އޮތް ގޮތަށް ބައެއް ޑޮކިއުމަންޓް ފޮށިތައް ބަހައްޓާފައި ހުރި ކަމަށް ދައުވާގައި ބުނެފައި ވެއެވެ.

މިމައްސަލައިގައި ޓްރަމްޕް ފުރަތަމަ ކޯޓަށް ހާޒިރު ކުރެވޭނީ އަންގާރަ ދުވަހުއެވެ. އެއީ ޓްރަމްޕުގެ 77 ވަނަ އުފަން ދުވަހުގެ ކުރީ ދުވަހެވެ.

ޓްރަމްޕަގެ މައްޗަށް މީގެ ކުރިންވެސް ވަނީ މައްސަލައެއްގައި ދައުވާ އުފުލިފައެވެ. އެއީ ކަސްބީ އަންހެނަކަށް ފައިސާ ދެއްވިކަމުގެ މައްސަލައިގަ އެވެ.

2024 ވަނަ އަހަރުގެ ރިޔާސީ އިންތިޚާބަށްވެސް ކުރިމަތިލައްވާފައިވާ ޑޮނަލްޑް ޓްރަމްޕް ވިދާޅުވީ އޭނާ އެއްވެސް ކުށެއް ނުކުރައްވާކަމަށާއި އޭނާއަކީ މައުސޫމް ބޭފުޅެއް ކަމަށެވެ. ނަމަވެސް ގާނޫނީ ބޭފުޅުން ވިދާޅުވަނީ ފައިލްތައް ފޮރުވި މައްސަލައިގައި ކުށް ސާބިތު ވެއްޖެނަމަ ޓްރަމްޕަށް ދިގު ޖަލު ހުކުމެއް އަންނާނެކަމަށެވެ.