ޑިއާޒް އެނބުރި ރެއާލަށް

ސްޕެއިންގެ ޒުވާން އެޓޭކިން މިޑްފީލްޑަރު ބްރަހިމް ޑިއާޒް އެނބުރި ރެއާލް މެޑްރިޑަށް ބަދަލުވެ، އައު އެއްބަސްވުމުގައި ސޮއި ކޮށްފި އެވެ.

ޑިއާޒް އެންމެ ފުރަތަމަ ރެއާލަށް ބަދަލުވީ 2019 ވަނަ އަހަރު އެވެ. އެއީ އޭނާގެ ސީނިއާ ކެރިއަރު ފެށި މެންޗެސްޓަރ ސިޓީ ދޫކޮށްލުމަށް ފަހު އެވެ. ރެއާލަށް ބަދަލުވެ އޭނާ ވަނީ އެ ޓީމަށް 21 މެޗު ކުޅެދީ ދެ ލަނޑު ޖަހައިފަ އެވެ. އެއަށްފަހު އެ ޓީމު ދޫކޮށް 2020 ވަނަ އަހަރު އިޓާލިއަން ލީގުގެ އޭސީ މިލާނަށް ބަދަލުވީ ލޯނު އެއްބަސްވުމެއްގެ ދަށުންނެވެ. އެއް އަހަރަށް އެކުލަބަށް ބަދަލުވި ނަމަވެސް، އޭނާ ވަނީ އިތުރު އެއް އަހަރަށް އެ ކުލަބުގައި މަޑު ކޮށްފަ އެވެ. މި ސީޒަނަށް ފަހު އޭނާ ވަނީ އަލުން އެނބުރި ރެއާލަށް އައިސްފަ އެވެ. ރެއާލާއެކު އެންމެ ފުރަތަމަ ޑިއާޒް އެކުލަވާލި އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރަށެވެ. ނަމަވެސް މިހާރު ސޮއި ކޮށްފައިވާ އައު އެއްބަސްވުމުގައި ވާގޮތުން 2027 ވަނަ އަހަރުގެ ޖޫން މަހުގެ ނިޔަލަށް އޭނާ ރެއާލްގައި މަޑު ކުރާނެ އެވެ.

ރެއާލުން ކުރިއަށް އޮތް ސީޒަނަށް ޓީމު އެކުލަވާލާ، ސްކޮޑުގައި ޑިއާޒް ހިމަނާނެ އެވެ. އެއީ ރެއާލްގެ ކޯޗު ކާލޯ އަންޗެލޮޓީ ބޭނުންވާ ގޮތެވެ. ރެއާލުން ޑިއާޒްގެ އެއްބަސްވުން އައު ކުރުމަށް ބޭނުންވީ ވެސް އަންޗެލޮޓީގެ އެދުމުގެ މަތިން ކަމަށް ސްޕެއިންގެ މީޑިއާ ތަކުން ބުނެ އެވެ. އަންޗެލޮޓީ ދެކޭ ގޮތުގައި ޑިއާޒް އަކީ މުސްތަޤުބަލު އޮތް، ރެއާލްގެ ސިސްޓަމަށް ފެތޭ ޒުވާން ކުޅުންތެރިޔެކެވެ.