"ހޯމަ ދުވަހުގެ މަޖިލީހުގެ ޖަލްސާ ކުރިއަށް ގެންދިއުމާއި މެދު ގޮތެއް ނިންމާނީ އާދިއްތަ ދުވަހު"
މަޖިލީސް ކުރިއަށް ގެންދެވޭނެ ގޮތް ވަރަށް ސާފުކޮށް ފެންނަން އޮތް ކަމަށް އެމްޑީޕީގެ މެމްބަރުން ދަނީ ބުނަމުން
2023 ވަނަ އަހަރުގެ ދެވަނަ ދައުރުގެ 8 ވަނަ ޖަލްސާ
ހޯމަ ދުވަހުގެ މަޖިލީހުގެ ޖަލްސާ ކުރިއަށް ގެންދިއުމާއި މެދު ގޮތެއް ނިންމާނީ އާދިއްތަ ދުވަހުކަމަށް މަޖިލީހުގެ އިދާރާއިން ބުނެފިއެވެ.
މަޖިލީހުގެ ރައީސް މުހައްމަދު ނަޝީދު އާއި ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ އެއް މަޖިލީހަށް ވަނީ ހުށަހަޅާފައެވެ. އޭގެ ތެރެއިން އީވާގެ އިތުބާރު ނެތްކަމުގެ މައްސަލަ ޖޫން 11ވާ އާދިއްތަ ދުވަހަށް ތާވަލްކުރިއެވެ. އެހެންނަމަވެސް ފަހުން އެ ޖަލްސާ ކެންސަލްކުރިކަން މެމްބަރުންނަށް ވަނީ އަންގާފައެވެ. އެ މައްސަލަ ކެންސަލް ކުރި ކަމަށް އަންގާފައި ވަނީ މަޖިލީހުގެ މެމްބަރުން ނިސްބަތްވާ ޕާޓީތަކަށް އައި ބަދަލާއި ގުޅިގެން ކޮމިޓީތަކަށް ބަދަލުގެންނަން ޖެހޭތީ، އާއްމު ކޮމިޓީ އިން އީވާގެ މައްސަލަ ކުރިއަށް ގެންދާނެ ގޮތް ކަނޑަ އެޅިފައި ނުވާތީ އެވެ.
އެހެންނަމަވެސް އެ މައްސަލަ ކުރިއަށް ނުގެންގޮސް މަޖިލީހުގެ އިތުރު މަސައްކަތްތަކެއް ކުރިއަށް ނުގެންދެވޭނެކަމަށް އެމްޑީޕީގެ ޕީޖީ ގްރޫޕުން ވަނީ ބުނެފައެވެ. އަދި އެމްޑީޕީގެ ޕީޖީ ގްރޫޕުން ވަނީ މަޖިލީހުގެ ޖަލްސާތައް ކުރިއަށް ގެންދާނެ ގޮތެއްގެ ލަފާ މަޖިލީހުގެ ރައީސް އަށް ދެއްވުމަކީ މަޖިލީހުގެ އަމީން އާއްމުގެ ޒިންމާ އެއް ކަމަށް ވެސް ބުނެފައެވެ. އެމްޑީޕީ ޕީޖީ ގްރޫޕުން ވަނީ މިކަމާއި ގުޅިގެން އަމީން އާއްމު ފާތިމަތު ނިއުޝާ އަށް ސިޓީ އެއް ވެސް ފޮނުވާފައެވެ. މަޖިލީހުގެ މަސައްކަތްތައް ކުރިއަށް ގެންދާނެ ގޮތަކާއި މެދު އަމީން އާއްމުގެ ނިންމެވުމަކީ ކޮބާތޯ ސާފުކުރުމަށް ގުޅުމުން ފޯނަށް ޖަވާބުނުދެއްވާތީ މިކަމާއި މެދު ނިއުޝާ ދެކިލައްވާގޮތެއް ސާފުވެފައެއް ނުވެއެވެ.
މަޖިލީހުގެ ޖަލްސާތައް ކުރިއަށް ގެންދިއުމާއި މެދު ގޮތެއް ނިންމާފައިވޭތޯ ސާފުކުރުމަށް ސުވާލުކުރުމުން ރައްޔިތުން މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރު ހަސަން ޒިޔާއު ވިދާޅުވީ އެކަމާއި މެދު ގޮތެއް ނިންމާނީ އާދިއްތަ ދުވަހު ކަމަށެވެ.
އެމްޑީީޕީ ނޫން އެހެން ޕާޓީތަކުގެ މެމްބަރުން ދަނީ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހުށަހެޅުމުން މަޖިލީހުގެ ޖަލްސާ ކުރިއަށް ނުގެންދެވޭނެ ކަމަށް ބުނަމުންނެވެ. އަދި ނާއިބު ރައީސްގެ އިތުބާތު ނެތްކަމުގެ މައްސަލަ ވައްދާފަ އޮއްވާ ރައީސްގެ އިތުބާރު ނެތްކަމުގެ މައްސަލަ ނުވެއްދޭނެ ކަމަށް ވެސް ބުނަމުންނެވެ. އެހެންނަމަވެސް އެއީ ޤާނޫނީ ބުރަދަނެއް ހުރި ވާހަކަތަކެއް ނޫން ކަމަށާއި މަޖިލީސް ކުރިއަށް ގެންދެވޭނެ ގޮތް ވަރަށް ސާފުކޮށް ފެންނަން އޮތް ކަމަށް އެމްޑީޕީގެ މެމްބަރުން ދަނީ ބުނަމުންނެވެ.
