ހައްޖާޖީންނަށް ޚާއްސަކޮށް ޓްރެކިންގ ޑިވައިސްއެއް ހަވާލުކުރާނެ: ހައްޖު ކޯޕަރޭޝަން
10 ޖޫން 2023 | ހޮނިހިރު 07:19މި ޑިވައިސްއިން ވަރަށް ގިނަ ލުއިފަސޭހަތައް ލިބޭނެ
ހައްޖާޖީންތަކެއް ފުރަން ބޯޓަށް އަރަނީ
މިއަހަރު ހައްޖަށް ދާ މީހުންނަށް ޚާއްސަކޮށް ޓްރެކިންގ ޑިވައިސްއެއް ހަވާލުކުރާނެކަމަށް ހައްޖު ކޯޕަރޭޝަނުން ބުނެފިއެވެ.
ރާއްޖެޓީވީގައި ވާހަކަފުޅުދައްކަވަމުން ހައްޖު ކޯޕަރޭޝަންގެ ކޯޕަރޭޓް އެފެއަރޒްގެ މެނޭޖަރު އާއިޝަތު ގާހިރު ވިދާޅުވީ، ބައެއް ފަހަރަށް ހައްޖު ނުވަތަ އުމްރާގެ އަޅުކަމުގައި މީހުން ގެއްލިގެން އުޅެންޖެހޭ ކަމަށެވެ. އަދި މައްސަލަ ހައްލު ކުރުމުގެ ގޮތުން، މިއަހަރު ހައްޖަށް ދާ މީހުންނަށް ޚާއްސަކޮށްގެން ތަމްރީން ޕްރޮގްރާމްތައް ކުރިއަށް ގެންދިއުމުގެ އިތުރުން ޓްރެކިންގ ޑިވައިސްއެއް ހަވާލުކުރާނެކަމަށް އޭނާ ވިދާޅުވިއެވެ.
މިއަހަރު ހައްޖުގެ އަޅުކަމަށް ދާ މީހުންގެ ތެރޭގައި ގިނައީ އުމުރުން ދުވަސްވީ މީހުންކަން ފާހަގަކުރައްވައި އާއިޝަތު ވިދާޅުވީ، މި ޑިވައިސްއިން ވަރަށް ގިނަ ލުއިފަސޭހަތައް ލިބޭނެ ކަމަށެވެ. ހަރަމްފުޅުގެ ތެރެއިން، ނުވަތަ ހޮޓަލުގެ ބޭރުން ގެއްލިއްޖެނަމަ، ނުވަތަ ހޮޓަލަށް ދާން ނޭނގުނުނަމަވެސް އެ ޑިވައިސް މެދުވެރިކޮށް އެމީހަކު ހުރިތަނެއް ފަސޭހައިން ހޯދޭނެކަމަށް އާއިޝަތު ވިދާޅުވިއެވެ.
އާއިޝަތު ވިދާޅުވީ ކޮންމެ ހައްޖާޖީއަކަށް ހައްޖު ކާޑެއް ދޭނެކަމަށާއި، އެ ކާޑުގައި، ތިބޭ ހޮޓަލަށް ގުޅޭނެ ހޮޓްލައިން ނަންބަރު ހިމަނާފައިވާނެ ކަމަށެވެ. އަދި ހޮޓާ އެނގޭނެ ގޮތަށް މެޕްވެސް ހިމަނާފައިވާކަމަށް އޭނާ ވިދާޅުވިއެވެ. އޭނާ ވިދާޅުވީ ހައްޖުވެރިންނަށް ހަރަމްފުޅަށް ދިއުމުގެ ކުރިން ސިމް ފޯރުކޮށްދިނުމުގެ މަސައްކަތް ކުރަމުންދާ ކަމަށެވެ.
މި އަހަރު މިހާތަނަށް ރާއްޖެއިން ހައްޖަށް ދިޔުމަށް ކޯޓާ ލިބިފައިވަނީ 1000 މީހުންނަށެވެ. އަދި، ހައްޖާޖީން އެއަރޕޯޓަށް ގެންދިޔުމަށް ހަމަޖެހިފައިވަނީ މާލެއާއި، ހުޅުމާލެއާއި، ވިލިމާލެއިންނެވެ. އެގޮތުން ބަސްތަކާއި ފެރީ އަލި ލޯންޗް މެދުވެރިކޮށް ހައްޖާޖީން އެއަރޕޯޓަށް ގެންދިޔުމުގެ އިންތިޒާމް މިހާރު ދަނީ ކުރެވެމުންނެވެ.
މިފަހަރު ހައްޖާޖީން ފުރަން ހަމަޖެހިފައިވަނީ 6 ފްލައިޓެއްގައެވެ. އެއީ ޖޫން މަހުގެ 12، 13، 15، 16 އަދި 19 ވަނަ ދުވަހު އޮންނަ ފްލައިޓްތަކުންނެވެ.
