ސްޕެޝަލް އޮލިމްޕިކްސްގައި ރާއްޖެ އިން ވާދަކުރާނީ އެތުލެޓިކްސް އާއި ބެޑްމިންޓަންގައި
8 ޖޫން 2023 | ބުރާސްފަތި 08:25މިއަހަރުގެ ގޭމްސްގައި ރާއްޖެ ތަމްސީލު ކުރާނީ ޖުމުލަ ހަ އެތުލީޓުން
ސްޕެޝަލް އޮލިމްޕިކްސް ގޭމްސްގައި ވާދަކުރާ ދިވެހި ޓީމު
މިއަހަރުގެ ސްޕެޝަލް އޮލިމްޕިކްސް ވޯލްޑް ގޭމްސްގައި ރާއްޖެ އިން ވާދަކުރާ އެތުލީޓުންނަށް ޖާޒީ ހަވާލުކޮށްފި އެވެ.
މި އެތުލީޓުންނަށް ޖާޒީ ހަވާލު ކޮށްދެއްވީ އެކަމަށްޓަކައި ހެންވޭރު ބޯޅަ ގޭގައި އޮތް ޚާއްސަ ރަސްމިއްޔާތުގައި ޔޫތު މިނިސްޓަރު އަޙުމަދު މަޚްލޫފް އެވެ.
މިއަހަރުގެ ގޭމްސް ކުރިއަށް ދާނީ މި މަހުގެ 17 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް ޖަރުމަނުގެ ބާލިންގަ އެވެ. މިއަހަރުގެ ގޭމްސްގައި ރާއްޖެ ތަމްސީލު ކުރާނީ ޖުމުލަ ހަ އެތުލީޓުންނެވެ. މީގެ ތެރެއިން އެތުލެޓިކްސްގައި ވާދަކުރާ ހަތަރު އެތުލީޓުންނަކީ އިބްރާހީމް ހުމެއިދު މުޙައްމަދު، އައިޝަތު ލައިކާ ޙުސެއިން، ޙުސެއިން ސުޖޫދު ނާޝިދު އަދި ޒާނާ އަލީ ޝަރީފް އެވެ. އެތުލެޓިކްސް ޓީމުގެ ކޯޗަކީ އައިޝަތު މައުވާ އާއި އަޙުމަދު ނިޒާމް އެވެ. ބެޑްމިންޓަގައި ވާދަކުރާ ދެ އެތުލީޓުންނަކީ މުހައްމަދު ރާއިފް ޝަރީފް އަދި އައިޝަތު މާނިޔާ އާދަމް އެވެ. މި ޓީމުގެ ކޯޗަކީ އަލީ ޝަރްމީލް އަދި އައިޝަތު އަފްނާން ރަޝީދު އެވެ.
ރަސްމީ އެސޯސިއޭޝަނެއްގެ ސިފައިގައި މަސައްކަތް ފަށައިގެން ސްޕެޝަލް އޮލިމްޕިކްސް އިން އަންނަނީ ބައިނަލްއަޤުވާމީ އެކިއެކި މުބާރާތްތަކުގައި ވާދަކުރަމުންނެވެ.
