އޮޑެގައްލާ ކެފޭ ހުރި ހިސާބަށް އަމީނީ މަގު އާންމުންނަށް ހުޅުވާލައި، ބިލަންބޮންގ އިން ފެށިގެން ސްޓޭޑިއަމްގެ އިރުމައްޗާ ހަމައަށް މަގު ރޫޅާލަން ނިންމާފައިވާ ކަމަށް އަމީނީ މަގު ތަރައްގީކުރަމުން އަންނަ ރޯޑް ޑިވަލަޕްމަންޓް ކޯޕަރޭޝަންގެ މެނޭޖިންގ ޑިރެކްޓަރު މޫސާ އަލީ މަނިކު ވިދާޅުވެއްޖެއެވެ.

އަމީނީ މަގުގައި އެންމެ ފަހުން ނިންމި ސެގްމަންޓުގައި ގަސްއިންދުމުގެ ގޮތުން ބޭއްވި ހަރަކާތަށްފަހު މީޑިއާއަށް މައުލޫމާތު ދެއްވަމުން މޫސަ ވިދާޅުވީ ބުރާސްފަތި ދުވަހު އޮޑެގައްލާ ހިސާބަށް މަގު ހުޅުވާލާނެ ކަމަށެވެ. އަދި ހޮނިހިރު ދުވަހު ބާކީ ހުރި ސެގްމެންޓްގެ ތެރެއިން ބިލަބޮންގާ ހިސާބުން މާފަންނު ސްޓޭޑިއަމްގެ ހުޅަނގު ފަރާތު މަގާ ހަމައަށް ގައުނެގުމުގެ މަސައްކަތް ފަށާނެ ކަމަށެވެ. އޭނާ ވިދާޅުވީ ސްކޫލްތަކާއި އޮފީސްތަކަށް އެކްސެސްވުމުގައި ދަތިތަކެއް ހުންނާނެ ކަމަށާއި، ރައްޔިތުންގެ ކިބައިން އެދެނީ މި ކަމުގައި އެއްބާރުލުން ދިނުމަށް ކަމަށެވެ.

އަމީނީ މަގުގެ ގަސް އިންދުމާއި ގުޅޭގޮތުން މޫސަ ވިދާޅުވީ އަމީނީ މަގުގެ ގަހުގެ މައްސަލައަކީ ބޮޑުވެފައި އޮތް މައްސަލައެއް ކަމަށެވެ. އެއީ ވަރަށް ގިނަ ބައެއްގެ ކަންބޮޑުވުން އެކަމާއި ގުޅިފައިވާ ކަމެއް ކަމަށާއި، އެހެންނަމަވެސް މަގު ހެދުމުގައި ގަސް ނުނަގާ ވާނެ އެއްވެސް ގޮތެެއް ނެތުމުން ގަސްތައް ނަގަމުން ދިޔައީ ކަމަށެވެ. އަދި މަގުގެ ޖާގަ ލިބޭ މިންވަރަކުން މަގުގައި އައު ގަސް ޖަހަމުންދާނެ ކަމަށް ވެސް އޭނާ ވިދާޅުވިއެވެ.

ސެގްމަންޓް 1، 2 އަދި 3 ގައި ޖަހާފައި ހުރި ގަސްތައް އެހުރީ ރަނގަޅަށް ހެދެން ފަށާފައި ކަމަށާއި، އެ ތަޖުރިބާއެކީގައި މުޅި އަމީނީ މަގުގައި ހިޔާ ދޭ ޗާލު ގަސްތައް އިންދުމުގެ މަސައްކަތް ކޮންމެ ސެގްމަންޓެއް ނިންމާލާފައި ކުރިއަށް ގެންދާނެކަމަށް އޭނާ ވިދާޅުވިއެވެ. އަދި ސެގްމަންޓް 4، 5، 6 އަދި 7 ވަނަ ސެގްމެންޓުގެ ގަސް އިންދުމުގެ މަަސައްކަތް ފެށިފައިވާ ކަމަށާއި، ނާސަރީގައި ހައްދާފައި، މަގާއި ގުޅޭނެ އެންމެ ރަނގަޅު ގަސް އަމީނީ މަގުގައި ޖަހަމުންދާނެކަމަށް މޫސަ ވިދާޅުވިއެވެ. އޭގެ ތެރޭގައި ގޯލްޑެން ޝަވަރ އަދި މޫނިމާ ގަސް ޖަހަމުންދާ ކަމަށާއި، މުޅި އަމީނީ މަގު ނިމޭ އިރު ހުރިހާ ހިސާބެއްގައި ގަސް ހުންނާނެ ކަމަށް މޫސާ ވިދާޅުވިއެވެ.