ޖަސްޓިސް އެންޑް ޑިވެލޮޕްމެންޓް ޕާޓީގެ ނަމުގައި ޕާޓީއެއް އުފައްދަން، އިލެކްޝަން ކޮމިޝަން (އީސީ)އަށް ހުށަހަޅައިފިއެވެ.
މި ޕާޓީ އުފެއްދުމުގެ މަސައްކަތުގައި އިސްކޮށް އުޅުއްވަނީ ޑރ. މުހައްމަދު އާތިފެވެ. މި ޕާޓީގެ އިސް ސަފުން މިހާރު ރާއްޖޭގެ އެއްވެސް ފުންނާބު އުސް ސިޔާސީ މީހަކު ނުފެންނާނެކަމަށާއި، މިއީ ތައުލީމީ ބަޔަކު އިސްވެ އުފައްދާ ޕާޓީއެއް ކަމަށް، ޑރ. އާތިފް ވަނީ މީޑިއާތަކަށް މައުލޫމާތުދެއްވާފައެވެ.
އާތިފް ވިދާޅުވީ، ރިޔާސީ އިންތިހާބުގެ ކުރިން އެ ޕާޓީއަށް ތިން ހާސް މެންބަރުން ހަމަކޮށް ޕާޓީ ރަޖިސްޓްރީ ކުރާނެ ކަމަށެވެ. އަދި ޕާޓީގެ ރަޖިސްޓްރޭޝަން ޕްރޮސެސް ދިގުލައިގެން ދިޔަނަމަވެސް ރިޔާސީ އިންތިހާބުގައި ވާދަކުރައްވާނެ ކަމަށްވެސް ވަނީ ވިދާޅުވެފައެވެ.
އަލަށް ޕާޓީއެއް އުފައްދަން ހުށަހެޅި އިރު "ދަ ޑިމޮކްރެޓްސް"ގެ ނަމުގައިވެސް ވަނީ އައު ސިޔާސީ ޕާޓީއެއް އުފައްދާފައެވެ. އެ ޕާޓީއުފެއްދުމުގެ ހުއްދަ ހޯދުމަށް ހުށަހެޅީ މިދިޔަ މަހުގެ ފަހުކޮޅުއެވެ. މިހާރު ރާއްޖޭގައި ރަޖިސްޓްރީކޮށްފައިވާ ނުވަ ސިޔާސީ ޕާޓީ އޮވެއެވެ.
