އަމީނީ މަގުގައި އެންމެ ފަހުން ތާރު އެޅި ސެގްމަންޓްތަކުގެ ތެރެއިން ސްޓެލްކޯއިން ފެށިގެން ކޮއިމަލާ ހިނގުމާއި ހަމައަށް އާންމުންނަށް މަގު ހުޅުވާލައިފިއެވެ.

އާރްޑީސީން ބުނީ އަމީނީމަގުގައި އެންމެފަހުން ތާރު އެޅި ސެގްމަންޓްތަކުގެ ޓްރެފިކް ނިޝާންތައް ކުރަހާ ނިމޭވަރަކުން އާންމުންނަށް މަގުތައް ހުޅުވާލާނެ ކަމަށެވެ.

އަމީނީ މަގުގައި 13 ސެގްމަންޓް ހިމެނޭއިރު، އޭގެ ތެރެއިން ސެގްމަންޓް 1،2،3 ގައި މިހާރު ވަނީ ތާރު އަޅައި އާންމުންނަށް ހުޅުވާލާފައެވެ. އަދި އަލަށް ތާރު އަޅާފައި ވަނީ ސެގްމަންޓް 4،5،6،7 ގައެވެ.

އަމީނީމަގު ޒަމާނީ ފެންވަރަށް ތަރައްޤީކުރުމުގެ މުޅި މަޝްރޫޢުގައި 1.79 ކިލޯމީޓަރުގެ މަގުގެ ސަރަޙައްދު ތަރައްގީކުރާއިރު، މި މަޝްރޫއަށް 84.4 މިލިއަން ރުފިޔާ ހަރަދުވާނެއެވެ.

އެންމެ ޒަމާނީ ފެންވަރަށް އަމީނީމަގު ޑިޒައިންކުރެވިގެންދާއިރު، މަގުގެ ފެންހިންދާ ނިޒާމް ޑިޒައިން ކުރެވިގެންދާނީ އަމީނީމަގުގެ ދެފަރާތުން ވެސް، މަގު ނިމެންދެން އެއްކޮޅުން އަނެއް ކޮޅަށް ކާނު އަޅާގޮތަށެވެ. އަދި ޑިޒައިނަށް ބިނާކޮށް، އެ މަގުގައި ފެންބޮޑުވުމަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައް ބަހައްޓާނެއެވެ.