ހުޅުދޫގައި ކުޑަކުދިންގެ ޕާރކެއް ތަރައްޤީކުރަނީ
މިތަނަށް ބޭނުންވާ ފައުންޓެއިން އަދި ޕާރކްސެޓް ސަޕްލައިކޮށްދޭނެ ފަރާތެއް ހޯދަން ވަނީ އިއުލާންކޮށްފައި
އައްޑޫ ސިޓީ ހުޅުދޫ
އައްޑޫސީޓގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ހުޅުދޫގައި ކުޑަކުދިންގެ ޕާރކެއް ތަރައްޤީ ކުރުމަށް ނިންމައިފިއެވެ.
ޑަބްލިޔުޑީސީން ބުނީ މިޕާރކް ތަރައްޤީ ކުރުމުގެ ގޮތުން މިހާރުވާނީ މިތަނަށް ބޭނުންވާ ފައުންޓެއިން އަދި ޕާރކްސެޓް ސަޕްލައިކޮށްދޭނެ ފަރާތެއް ހޯދަން އިއުލާންކޮށްފައި ކަމަށެވެ. އެގޮތުން މިމަސައްކަތަށް ދަޢުވަތު ހުޅުވާލެވެނީ ދިވެހިރާއްޖޭގައި މިބާވަތުގެ ވިޔާފާރިކުރުމަށް ރެޖިސްޓްރީ ކުރެވިފައިވާ ފަރާތްތަކަށް ކަމަށްވެސް އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ބުނެފައިވެއެވެ.
މި މަސައްކަތަށް ޝައުގުވެރިވާ ފަރާތްތަކުން 2023 ޖޫން 05 ވާ ހޯމަ ދުވަހުން ފެށިގެން 2023 ޖޫން 11 ވާ އާދީއްތަ ދުވަހުގެ 14:00 އާއި ހަމަޔަށް އައްޑޫ ސިޓީ ކައުންސިލް އިދާރާގެ ޕްރޮކިއުމަންޓް ޔުނިޓަށް ބިޑް ހުށަހަޅުއްވައި ރަޖިސްޓްރީކުރެއްވުމަށް މިހާރު ވަނީ އިއުލާންކޮށްފައެވެ،
ބީލަންތައް ބަލައިގަތުމާއި، އަދި ބީލަންހުޅުވުން އޮންނާނީ 2023 ޖޫން 21 ވާ ބުދަ ދުވަހުގެ 11:00 ގައި ކައުންސިލްގެ އިދާރާގައި ކަމަށާއި ބިޑް ޕްރޮސެސިންގެ މަސައްކަތް ނިމުމާއި އެކު ވީހާވެސް އަވަހަށް ޕާރކް ތަރައްޤީ ކުރުމުގެ މަސައްކަތް ފައްޓާނެ ކަމަށްވެސް ޑަބްލިޔުޑީސީން ވަނީ ބުނެފައެވެ.
