އައްޑޫ ސިޓީގެ ގުޅިފައިވާ ރަށްތަކަށް ކަރަންޓުގެ ހިދުމަތް ފޯރުކޮށްދެމުންދާ ޕަވަރ ސްޓޭޝަންގެ އިތުރު އިންޖީނަކަށް މައްސަލަ ދިމާވެ ކަރަންޓު ކަނޑާ ވަގުތު އިތުރުކޮށްފި އެވެ.

އައްޑޫގެ ޕަވަރ ސްޓޭޝަނުގައި ބޭނުންކުރަމުންދާ ޖަނަރޭޓަރު ސެޓްތަކުގެ ތެރެއިން ތިން ޖެނެރޭޓަރު ސެޓަށް މައްސަލަތައް ދިމާވެ އިތުރު އެއް ޖެނެރޭޓަރު ސެޓް ވަނީ މަރާމާތު ނުކުރެވޭ ވަރަށް ހަލާކުވެފައި ކަމަށް ފެނަކައިން މިދިޔަ މަހު ވަނީ ބުނެފަ އެވެ. އަދި އެ މައްސަލަ ހައްލުކުރަން މި މަހުގެ 12 ދުވަހު އެއް މެގަވޯޓުގެ ޖެނެރޭޓަރެއް ގެންގޮސް އިންސްޓޯލްވެސް ކުރި އެވެ.

އެހެން ނަމަވެސް ފެނަކައިން މިއަދު ބުނީ ކަރަންޓުގެ މައްސަލަަ ހައްލުކުރަން ތާވަލު ކުރެވުނު ގޮތަށް މަސައްކަތް ކުރަމުން ދަނިކޮށް 1،000ކ.ވ ގެ އިތުރު އިންޖީނަކަށް މައްސަލަ ދިމާވެ ހުއްޓިފައިވާ ކަމަށެވެ. އެހެންވެ ކަރަންޓު ކަނޑަން ޖެހޭ ވަގުތު އިތުރު ކުރަން ޖެހިފައިވާ ކަމަށް ފެނަކައިން ބުންޏެވެ.

ފެނަކައިން މީގެ ކުރިން ބުނެފައި ވަނީ އެ ކުންފުނީގެ އައްޑޫ ބްރާންޗުން ކަރަންޓު އުފެއްދެނީ އެ ސިޓީގެ ގުޅިފައިވާ ރަށްތަކަށް 24 ގަޑިއިރު ކަރަންޓު ފޯރުކޮށްދޭން ބޭނުންވާ މިންވަރަށް 1000 ކިލޯވޮޓު މަދުން ކަމަށެވެ. އެހެންކަމުން މިއަދު މައްސަލަ ދިމާވި އިންޖީނަށް މައްސަލަ ދިމާވެ، ހުއްޓުމަކަށް އައިސްފައިވާއިރު، އައްޑޫއަށް 24 ގަޑިއިރު ކަރަންޓު ދޭން ބޭނުންވާ މިންވަރަށްވުރެ، އުފެއްދޭ މިންވަރު 2000 ކިލޯވޮޓު މަދުވާނެ ކަމަށް ވަނީ ބެލެވިފައެވެ.

ރަށްރަށުން ކަރަންޓު ކެނޑޭ މައްސަލަ ހައްލުކުރަން ސަރުކާރުން އަމާޒު ހިފާފައިވާ ކަމަށް ރައީސް ޑރ. މުހައްމަދު މުއިއްޒު މި އަހަރުގެ ޖެނުއަރީ މަހުގެ ކުރީކޮޅު ވަނީ ވިދާޅުވެފަ އެވެ. ރޯދަ މަހާ ދިމާކޮށް ކަރަންޓުގެ މައްސަލައަށް ހައްލެއް ގެނެސްދިނުމަށް ވަރަށް ބޮޑު އިސްކަމެއްދެއްވާކަން ފާހަގަކުރައްވާ ވިދާޅުވެފައި ވަނީ އިތުރު ޖެނެރޭޓަރުތައް ގެނެސް ރޯދަ މަހުގެ ކުރިން މައްސަލައަށް ހައްލު ހޯދުމަށް އަމާޒު ހިފާފައިވާ ކަމަށެވެ.

ހަމަ އެގޮތަށް ރޯދަ މަސް ފެށުމުގެ ކުރިން އައްޑޫގެ ކަރަންޓު މައްސަލަ ހައްލު ކުރާނެ ކަމަށް އެ ކުންފުނިން ދިޔައީ މީގެ ކުރިން ތަކުރާރު ކޮށް ބުނަމުންނެވެ. އެގޮތުން މައްސަލަ ހައްލުކުރުމަށް ސްޓެލްކޯ އާއެކު ވެވުނު އެއްބަސްވުމެއްގެ ދަށުން 1.8 މެގަވަޓްގެ ޖެނެރޭޓަރު ސެޓެއް އައްޑޫއަށް ގެންގޮސް ހަލާކުވެފައިވާ ތިން ޖެނެރޭޓަރުގެ މަރާމާތު ކުރުމުންދާ ކަމަށް ފެބްރުއަރީ 17، ގައި ފެނަކައިން ބުންޏެވެ.

މި ސަރުކާރުން ކަރަންޓުގެ މައްސަލައަށް ހައްލު ހޯދައިދޭނެ ކަމަށް ވިދާޅުވެފައިވީ ނަމަވެސް ކަން ވެގެން މި ދަނީ މުޅިން ދިމާ އިދިކޮޅަށެވެ. އެހެނީ ކަރަންޓުގެ މައްސަލަ ހައްލުނުވެ، މި ރޯދަ މަހު ވެސް އައްޑޫގެ ގުޅިފައިވާ ރަށްތަކުން ދަނީ ކޮންމެ ދުވަހަކު ވެސް ކަރަންޓު ކަނޑަމުންނެވެ. އައްޑޫގެ ކަރަންޓުގެ މައްސަލައަށް އަދިވެސް ވަނީ ހައްލެއް ނުލިބިއެވެ.

އައްޑޫ ސިޓީއަށް ދިމާވެފައިވާ ކަރަންޓްގެ މައްސަލައަށް ހައްލު ހޯދުމަށް ކަމާއި ގުޅުންހުރި މުއައްސަސާތަކުން އެކަށީގެންވާ ގޮތަކަށް މަސައްކަތް ކުރަމުން ނުދާތީ އައްޑޫ ސިޓީގެ ރައްޔިތުންނަށް ލިބެންޖެހޭ ހައްގު ލިބި ގަތުމަށް އިހްތިޖާޖް ކުރުން ނޫން އިތުރު ގޮތެއް ނެތް ކަމަށް އައްޑޫ ސިޓީގެ މޭޔަރ އަލީ ނިޒާރު ވަނީ މިމަހުގެ ކުރީކޮޅު ވިދާޅުވެފަ އެވެ.

އައްޑޫގައި ދިރިއުޅޭ ރައްޔިތުންނާއި މަޖިލިސް މެންބަރުން ވެސް ދަނީ ސޯޝަލް މީޑިއާގައި އެކަމާ މެދު ކަންބޮޑުވުން ފާޅުކުރަމުންގެންދާއިރު، ހިތަދޫ ދެކުނު ދާއިރާގެ އެމްޑީޕީ މެންބަރު، އިބްރާހިމް ނާޒިލް މަޖިލީހަށް ހުށަހެޅުއްވި ކުއްލި މައްސަލަ މަޖިލީހުގައި އޮތް ވެރިކަންކުރާ ޕީއެންސީގެ މެޖޯރިޓީން ވަނީ ބޭރުކޮށްލާފަ އެވެ.