އިންޓަ އަށް ނޫނެކޭ ބުނެ ނަޗޯ ރެއާލްގައި މަޑުކުރަނީ
6 ޖޫން 2023 | އަންގާރަ 08:35ދެން ރެއާލާއެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށް
ރެއާލްގެ ޑިފެންޑަރު ނަޗޯ ފެނާންޑޭސް
ރެއާލް މެޑްރިޑަށް ކުޅެމުން އަންނަ ސްޕެއިންގެ ޑިފެންޑަރު ނަޗޯ ފެނާންޑޭސް އެ ކުލަބުގައި މަޑު ކުރަން ނިންމާފައިވާ ކަމަށް މީޑިއާތަކުން ބުނެފި އެވެ.
އުމުރުން 33 އަހަރުގެ ކުޅުންތެރިޔާ ރެއާލާއެކު ހަދާފައިވާ އެއްބަސްވުމުގެ މުއްދަތު ހަމަވާނީ މި ޖޫން މަހުގެ ނިޔަލަށެވެ. އޭނާ ހޯދުމުގެ މަސައްކަތް އެހެން ކުލަބުތަކުން އައީ ވެސް ކުރަމުންނެވެ. އެހެންކަމުން ނަޗޯގެ މުސްތަޤުބަލާމެދު އޮތީ ސުވާލުތަކެއް އުފެދިފަ އެވެ. އެހެން ނަމަވެސް ރެއާލާއެކު ކުރިއަށް ގެންދިޔަ މަޝްވަރާތަކަށް ފަހު ނަޗޯ މިހާރު ވަނީ އެ ކުލަބުގައި މަޑު ކުރުމަށް ނިންމާފައި ކަމަށް ރިޕޯޓުތައް ބުނެ އެވެ. އެހެންކަމުން އޭނާ ރެއާލްގައި މަޑު ކުރާނީ މިހާތަނަށް އޭނާ ހޯދުމުގެ މަސައްކަތް އެންމެ ބޮޑަށް ކުރަމުން އައި އިޓާލިއަން ލީގުގެ އިންޓަ މިލާނަށް ނޫނެކޭ ބުނުމަށްފަހު ކަމަށް ވެސް ވަނީ ބުނެފަ އެވެ. ރެއާލްގެ އެއްބަސްވުން ނަޗޯ އައު ކުރާނީ އިތުރު އެއް އަހަރު ދުވަހަށެވެ. އެހެންކަމުން ދެން ރެއާލާއެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.
ނަޗޯ އޭނާގެ ސީނިއާ ކެރިއަރު ފެށީ ވެސް ރެއާލުންނެވެ. އެ ޓީމަށް މިހާތަނަށް ކުޅެދިން 319 މެޗުގައި އޭނާ ވަނީ މިހާތަނަށް 16 ލަނޑު ޖަހައިފަ އެވެ. އޭނާ އަކީ ރެއާލްގެ ކޯޗު ކާލޯ އަންޗެލޮޓީގެ ޕްލޭންގައި ހިމެނޭ އެންމެ މުހިންމު އެއް ޑިފެންޑަރެވެ. ނަޗޯ ވަނީ ރެއާލާއެކު މިހާތަނަށް 21 ތައްޓެއް ކާމިޔާބުކޮށްފަ އެވެ.
