ދިވެހި ސާފް ލީގުގެ "ގާމާދޫކޮޅު" މި މަހު 14ގައި ފަށަނީ

މޯލްޑިވްސް ސާފިން އެސޯސިއޭޝަން (އެމްއެސްއޭ) އާއި މިނިސްޓްރީ އޮފް ޔޫތު ސްޕޯޓްސް އެންޑް ކޮމިޔުނިޓީ އެމްޕަވަމެންޓް ގުޅިގެން ކުރިޔަށްގެންދާ ދިވެހި ސާފް ލީގުގެ މި އަހަރުގެ ތިން ވަނަ އިވެންޓު، "ގާމާދޫކޮޅު" މި މަހު 14 ގައި ފަށާނެއެވެ.

ދިވެހި ސާފް ލީގުގައި ފަސް އިވެންޓެއް ހިމެނޭއިރު، ހުރިހާ އިވެންޓެއްވެސް ކުރިޔަށްދާނީ ރާއްޖޭގެ އެކި ސަރަހައްދުތަކުގައެވެ. އެގޮތުން މި އަހަރު މިހާތަނަށް ވަނީ ދެ އިވެންޓެއް ނިމިފައެވެ. އެއީ ފެބުރުވަރީ މަހު ގދ.ގައްދޫގައި ކުރިޔަށް ދިޔަ "ކަޅެގަލެކޮޑާ" އާއި މެއި މަހު މ.މުލީގަ ކުރިޔަށްދިޔަ "މުލިކޮޅުރާޅުގަނޑު" އިވެންޓެވެ.

މި އަހަރުގެ ތިން ވަނަ އިވެންޓު ބޭއްވުމަށް ހަމަޖެހިފައިވަނީ ކ.ހިންހަމަފުށީގައެވެ. މި އިވެންޓު ކުރިޔަށްދާނީ މި މަހުގެ 14 އިން 18 ވަނަ ދުވަހުގެ ނިޔަލަށެވެ. ސާފިން އެސޯސިއޭޝަނުން މައުލޫމާތު ދިންގޮތުގައި މިހާތަނަށް ފިރިހެން އޯޕަން ބައިން 31 ސާފަރުން އަދި ޖޫނިއާ ބައިން 14 ސާފަރުން ބައިވެރިވެފައިވެއެވެ. މި މުބާރާތުގައި ބައިވެރިވުމުގެ މުއްދަތު ހަމަވާނީ ޖޫން މަހުގެ 7 ވަނަ ދުވަހުއެވެ. އެސޯސިއޭޝަނުން އިތުރަށް ބުނީ، މި އިވެންޓަކީ ޖުލައި މަހު ރާއްޖޭގައި ބޭއްވުމަށް ހަމަޖެހިފައިވާ އޭޝިއަން ސާފިން ޗެމްޕިއަންޝިޕަށް ތައްޔާރުވުމަށް ރަނގަޅު ފުރުސަތެއް ކަމަށެވެ.

ދިވެހި ސާފް ލީގުގެ ހަތަރު ވަނަ އިވެންޓު ކުރިޔަށްދާނީ ޖުލައި މަހުގެ 28 އިން އޮގަސްޓު 1 ގެ ނިޔަލަށް ރ.ކިނޮޅަހުގައެވެ. އަދި މި އަހަރުގެ އެންމެ ފަހު އިވެންޓު ކަމަށްވާ ރަންނަމާރި ޗެލެންޖު އޮންނާނީ އޮކްޓޫބަރު މަހު 27 އިން ނޮވެމްބަރު 5 ގެ ނިޔަލަށެވެ.

ތިން އަހަރުގެ މެދުކެނޑުމަކަށްފަހު އޭޝިއަން ސާފިން ޗެމްޕިއަންޝިޕް މި އަހަރު ބޭއްވުމަށް ވަނީ ހަމަޖެހިފައެވެ. ޖުލައި މަހު މި މުބާރާތް ކުރިޔަށްދާނީ ރާއްޖޭގައެވެ.