މުވައްޒަފުންނަށް ބިރު ދައްކާ ކަމަށް ދެކެވޭ ވާހަކަތައް ފެނަކައިން ދޮގުކޮށްފި
ފެނަކައާ ގުޅޭ ގޮތުން ދޮގު ޚަބަރު ފަތުރަނީ ނޫސް ކިޔުންތެރިން އިތުރުކުރުމުގެ ހީލަތްތެރި އުކުޅެއްގެ ގޮތުގައި
ފެނަކަ ކޯޕަރޭޝަންގެ މެނޭޖިންގ ޑިރެކްޓަރު
ފެނަކަ ކޯޕަރޭޝަނުން އެ ކުންފުނީގެ މުވައްޒަފުންނަށް ބިރުދައްކަމުންދާ ކަމަށް ދެކެވޭ ވާހަކަތައް އެ ކުންފުނިން ދޮގުކޮށްފިއެވެ.
އެ ކުންފުނިން މިވާހަކަތައް ދޮގު ކުރީ ހޯމަ ދުވަހުގެ ރޭ ނެރުނު ބަޔާނެއްގައެވެ. އެ ބަޔާނުގައި އެ ކުންފުނިން ބުނެފައިވަނީ ބައެއް ނޫސްތަކުން ފެނަކައިގެ ނަން ބޭނުންކޮށްގެން ދައްކަމުންދަނީ އެއްވެސް އަސާސެއް ނެތް ޚިޔާލީ ވާހަކަތަކެއް ކަމަށެވެ. އަދި އެވާހަކަތައް ފަތުރަނީ އެ ކުންފުންޏަކީ މިހާރު ރައްޔިތުންގެ އިތުބާރު ހޯދާފައިވާ މަގުބޫލު ބްރޭންޑަކަށްވުމުން، އެކަމުގެ ފައިދާ ނަގައި ނޫސް ކިޔުންތެރިން އިތުރުކުރުމުގެ ހީލަތްތެރި އުކުޅެއްގެ ގޮތުގައިކަމަށެވެ.
ފެނަކައިން ވަނީ މިކަންކަމަށް ސަމާލުވުމަށް ރައްޔިތުންނަށް އިލްތިމާސްކޮށްފައެވެ. އަދި އެފަދަ ކަންކަން ކުރާ ފަރާތްތަކުން، އެ ފަރާތްތަކާއި މުޖުތަމައަށް ފައިދާ ހުރި ބޭނުންތެރި މަސައްކަތްތަކެއް ކުރުމަށް، ލިބިފައިވާ ވަގުތާއި ވަސީލަތްތައް ބޭނުންކުރުމަށް ވަނީ ނަސޭހަތްތެރިވެފައެވެ.
ފެނަކައިން އެ ކުންފުނީގެ މުވައްޒަފުންނަށް ސިޔާސީ ޕާޓީތަކުން ކެނޑުމަށް ބުނެ ވަޒީފާގެ ބިރު ދައްކާކަމަށް ބައެއް ނޫސްތަކުން ވަނީ ރިޕޯޓުކޮށްފައެވެ. އަދި އެކަން އެގޮތަށް ކުރަނީ އެ ކުންފުނީގެ މިހާރުގެ މެނޭޖުމަންޓުން ކަމަށް ރިޕޯޓުކުރެއެވެ.
މިވާހަަކަތަކަށް ރައްދުދީ ފެނަކައިން ބުނީ 17 ނޮވެމްބަރު 2018 އިން ފެށިގެން އެ ކުންފުނިން މަސައްކަތް ކުރަމުންގެންދަނީ ކުންފުނީގެ އެންމެ ބޮޑު ރައުސުލްމާލަކީ މުވައްޒަފުން ކަމަށް ދެކިގެން ކަމަށެވެ. އަދި މިއަދުގެ މެނޭޖްމަންޓުން މުވައްޒަފުން ބިރުފިލައިތިބެ ހާސްކަމެއް ނެތި ވަޒީފާ އަދާކުރެވޭނެ ފަހި މާހައުލެއް ގާއިމްކޮށްދީ، އަނެކުންގެ މިނިވަންކަމާއި ހައްގުތަކަށް އަރައިނުގަނެ އަމިއްލައަށް ލިބިފައިވާ ހައްގުތައް ފުރިހަމައަށް ބޭނުންކުރުމުގެ ފުރުސަރު ތަނަވަސްކޮށް ހުޅުވައިދީ ކަށަވަރު ކޮށްދީފައިވާނެ ކަމަށް ވެސް ބުންޏެވެ.
ފެނަކައިން ބުނީ އެއްވެސް ހާލެއްގައި މުވައްޒަފުންގެ ހައްގުތަކަށް ހުރަސް އަޅައި، މުވައްޒަފުންނަށް ބިރުދެއްކުމަކީ ކުންފުނީގެ އަދުގެ މެނޭޖްމަންޓު ދަންނަ، ނުވަތަ ބޭނުންކުރާ ފަލްސަފާއެއް ނޫންކަމަށެވެ. އަދި ކުންފުނީގެ ވަކިވަކި މުވައްޒަފުން ފާޅުކުރާ ޚިޔާލާއި ޝުއޫރާއި ބުނާ ބުނުމަކީ، ކުންފުނީގެ މެނޭޖްމަންޓުގެ ބަސް ނުވަތަ ކުންފުނިން ދެކޭގޮތް ނޫންކަމަށް ވެސް ވަނީ ފާހަގަކޮށްފައެވެ.
