އަސެންސިއޯ ރެއާލް ދޫކޮށްލާކަން ރަސްމީކޮށް އިއުލާނުކޮށްފި
ރެއާލުން ނެރުނު ބަޔާނެއްގައި ބުނީ، އެ ކުލަބުގެ ޔޫތު އެކަޑަމީން ފެށިގެން ސީނިއާ ޓީމަށް ކުޅެފައިވާ އަސެންސިއޯ އަށް ޝުކުރު އަދާ ކުރާ ކަމަށް
ރެއާލް މެޑްރިޑަށް ކުޅެމުން އަންނަ މާކޯ އަސެންސިއޯ
މި ސީޒަނަށް ފަހު މާކޯ އަސެންސިއޯ ރެއާލް މެޑްރިޑު ދޫކޮށްލާނެކަން އެ ކުލަބުން ރަަސްމީކޮށް އިއުލާނުކޮށްފި އެވެ.
އެކަން ހާމަކޮށް ރެއާލުން ނެރުނު ބަޔާނެއްގައި ބުނީ، އެ ކުލަބުގެ ޔޫތު އެކަޑަމީން ފެށިގެން ސީނިއާ ޓީމަށް ކުޅެފައިވާ އަސެންސިއޯ އަށް ޝުކުރު އަދާ ކުރާ ކަމަށެވެ. އަސެންސިއޯ ރެއާލް ދޫކޮށްލި ނަމަވެސް، މުސްތަޤުބަލުގައި އޭނާ އާއި އޭނާގެ އާއިލާ އަށް ފުރިހަމަ ކާމިޔާބަށް އެދޭ ކަމަށް ވެސް އެ ކުލަބުން ވަނީ ބުނެފަ އެވެ. މަޔޯކާ ދޫކޮށް އަސެންސިއޯ ރެއާލަށް ބަދަލުވީ 2014 ވަނަ އަހަރު އެވެ. ހަ އަހަރު ދުވަހަށް އެކުލަވާލި އެ އެއްބަސްވުމުގެ މުއްދަތު ހަމަވާން އޮތީ 2019 ވަނަ އަހަރު އެވެ. ނަމަވެސް އޭގެ ކުރިން 2017 ވަނަ އަހަރު ރެއާލުން ވަނީ އޭނާގެ އެއްބަސްވުން އައުކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ.
އަސެންސިއޯ ވަނީ މިހާތަނަށް ރެއާލަށް ކުޅެދިން 285 މެޗުގައި 61 ލަނޑު ޖަހައިފަ އެވެ. އެ ޓީމާއެކު އޭނާ ވަނީ 16 ތައްޓެއްވެސް ކާމިޔާބުކޮށްފަ އެވެ. އޭގެ ތެރޭގައި ސްޕެނިޝް ލީގު، ކޮޕަ ޑެލް ރޭ، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް ހިމެނެ އެވެ. ރެއާލް ދޫކޮށްލަން އަސެންސިއޯ ނިންމާފައިވާއިރު، އޭނާ ހޯދުމަށް އިނގިރޭސި ޕްރިމިއާ ލީގުގެ އެސްޓަން ވިލާ އާއި ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން އަންނަނީ މަސައްކަތް ކުރަމުންނެވެ. އެހެން ނަމަވެސް އޭނާ ހޯދުމުގައި އެސްޓަން ވިލާ އަށް ވުރެ ކުރީގައި އޮތީ ޕީއެސްޖީ ކަމަށް މީޑިއާތަކުން ބުނެ އެވެ.
