އޮފިސަރުންގެ ފޮޓޯއާއި މައުލޫމާތު އާއްމުކުރާނަމަ ފިޔަވަޅު އަޅަން ފަސްނުޖެހޭނެ: އެމްސީއެސް
ސައްހަނޫން ތުހުމަތުތަކާއެކު ބަދުނާމްކުރާ ފަދަ އިބާރާތް ބޭނުންކޮށް ބިރު ދައްކާކަން ފާހަގަކުރެވިފައިވޭ
ޕްރިޒަން އޮފިސަރުންތަކެއް
މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ އޮފިސަރުންނާއި މުވައްޒަފުންގެ މައުލޫމާތާއި، ފޮޓޯ ސޯޝަލް މީޑިއާގައި އާއްމުކުރާ ފަރާތްތަކާމެދު ގާނޫނީ ފިޔަވަޅު އެޅުމަށް ފަސްނުޖެހޭނެ ކަމަށް އެސަރވިސްއިން ބުނެފިއެވެ.
އެމްސީއެސްއިން ބުނީ ފަހަކަށް އައިސް އެސަރވިސްގެ އޮފިސަރުންނާއި މުވައްޒަފުންގެ މައުލޫމާތާއި ފޮޓޯ ސޯޝަލް މީޑިއާގައި އާއްމުކޮށް ސައްހަނޫން ތުހުމަތުތަކާއެކު ބަދުނާމްކުރާ ފަދަ އިބާރާތް ބޭނުންކޮށް، ބިރު ދައްކައި އިންޒާރު ދެމުންދާކަން ފާހަގަކުރެވިފައިވާ ކަމަށެވެ. ސައްހަ ނޫން މިފަދަ މައުލޫމާތު ފެތުރުމުގެ ސަބަބުން، އެސަރވިސްގެ އޮފިސަރުންނާއި މުވައްޒަފުންގެ ގާނޫނީ މަސްއޫލިއްޔަތާއި ވާޖިބުތައް އަދާކުރުމުގެ ގޮތުން ކުރާ މަސައްކަތްތަކާ މެދު އާއްމުންގެ މެދުގައި ނަފްރަތު އުފެދޭ ކަމަށް އެމްސީއެސްއިން ބުނެއެވެ.
މީގެ ސަބަބުން އޮފިސަރުންނަށާއި، މުވައްޒަފުންނަށް ނުރައްކާތެރިކަން އިހްސާސްކުރެވޭ ކަމަށް އެމްސީއެސްއިން ބުނެއެވެ.
މިމައްސަލަ ކުށްވެރިކޮށް އެމްސީއެސްއިން ވަނީ މިފަދަ އަމަލުތައް ނުކުރުމަށާއި، މިފަދަ އަމަލުތައް ތަކުރާރުވަމުންދާނަމަ އެފަރާތްތަކާއިމެދު ގާނޫނީ ފިޔަވަޅު އެޅުމަށް ފަސްނުޖެހޭނެ ކަމުގެ އިންޒާރު ދީފައެވެ. އަދި މިއީ ނުހަނު ކަންބޮޑުވާ މައްސަލައެއް ކަމަށް އެމްސީއެސްއިން ބުނެއެވެ.
