ބޭބެ މަރާލި މައްސަލައިގައި ކޮއްކޮ ޝަރީއަތް ނިމެންދެން ބަންދު

އައްޑޫ ސިޓީގެ މަރަދޫފޭދޫގައި ހިންގި މާރާމާރީގައި ހައްޔަރުކޮށްފައިވާ މީހާ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރުކޮށްފިއެވެ.

ބުދަ ދުވަހުގެރޭ ހިންގި މާރާމާރީގައި 27 އަހަރުގެ މީހަކު މަރުވެފައިވާއިރު، މި މައްސަލައާ ގުޅިގެން ހައްޔަރުކޮށްފައިވަނީ 25 އަހަރުގެ ދިވެހި ފިރިހެނެކެވެ. އޭނާގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުގައި ބެހެއްޓުމަށް ވަނީ އަމުރުކޮށްފައެވެ.

ބުދަ ދުވަހުގެ ރޭ 23:38ގައި ހިނގި މިހާދިސާގައި އައްޑޫ އިކުއެޓޯރިއަލް ހޮސްޕިޓަލުގައި ފަރުވާ ދެމުން ދަނިކޮށް މަރުވެފައިވަނީ 27 އަހަރުގެ އަހްމަދު ޝުއައިބް، ސ،މަރަދޫ ފޭދޫ ބްލޫ ސްޓާރއެވެ. ފުލުހުން މައުލޫމާތު ދީފައިވާގޮތުގައި ޝުއައިބް ހޮސްޕިޓަލަށް ގެންދިޔައިރުވެސް އޭނާގެ ހާލު ވަރަށް ސީރިއަސްއެވެ. އޭނާއަށް ފަރުވާދެމުން ދަނިކޮށް މަރުވެފައިވަނީ ބުރާސްފަތި ދުވަހުގެ ރޭގެ ފަތިހުގެ ވަގުތެއްގައިކަމަށް ފުލުހުން ބުނެފައިވެއެވެ.

އޭނާގެ ހަށިގަނޑުގެ އެކި ތަންތަނަށާއި މެޔަށް ބޮޑެތި ޒަހަމްތަކެއް ލިބިފައިވާ ކަމަށް މަންޒަރު ދުށްމީހުން ވަނީ ބުނެފައެވެ. އެނގިފައިވާ ގޮތުގައި މި ހާދިސާ ހިނގާފައިވަނީ ފޯނެއްގެ މައްސަލާގައި ޝުއައިބުއާ އޭނާގެ ކޮއްކޮއާ ދެމެދު ހިނގި ހަމަނުޖެހުމެއްގެ ތެރެއިންނެވެ.

ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.