ރިފްއަތުގެ އިތުބާރު ނެތްކަމުގެ މައްސަލަ: މަޖިލީހަށް ހާޒިރުވެވަޑައިގެން ޖަވާބުދާރީވެވަޑައިގަތުމުގެ ފުރުސަތަކަށް ރިފްއަތު އެދިވަޑައިގެންފި
ރިފްއަތުގެ އިތުބާރު ނެތްކަމުގެ މައްސަލަ ހުށަހެޅުއްވީ ރައްޔިތުންގެ މަޖިލީހުގެ 13 މެމްބަރުންގެ ސޮޔާއެކު
އިބްރާހީމް ރިފްއަތު
ބަންޑާރަނައިބު އިބްރާހީމް ރިފްއަތުގެ އިތުބާރު ނެތްކަމުގެ މައްސަލާގައި މަޖިލީހަށް ހާޒިރުވެވަޑައިގެން ޖަވާބުދާރީވެވަޑައިގަތުމުގެ ފުރުސަތަކަށް، އެމަނިކުފާނު އެދިވަޑައިގެންފިއެވެ.
ރިފްއަތުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހުގެ 13 މެމްބަރުންގެ ސޮޔާއެކު ހުށަހަޅުއްވާފައިވަނީ 11 މެއި 2023ގައެވެ. އަދި 31 މެއި ވީ ބުދަ ދުވަހު އެ މައްސަލައިގެ ބަހުސް، މަޖިލީހުގެ ޖަލްސާއަށް ވަނީ އެޖެންޑާކޮށްފައެވެ. އެމަނިކުފާނުގެ އިތުބާރު ނެތްކަމުގެ މައްސަލަ ހުށަހަޅާފައިވާ މައިގަނޑު ސަބަބަކީ، ރާއްޖެއާ މޮރިޝަސްއާ ދެމެދު ކަނޑުގެ ސަރަހައްދު ބައިކުރުމުގެ މައްސަލާގައި ރާއްޖޭގެ މަސްލަހަތު ގެއްލޭގޮތަށް އަމަލުކުރެއްވުން ކަމަށް، އިދިކޮޅު ފަރާތްތަކުން ވަނީ ބުނެފައެވެ.
މި މައްސަލާގައި ޖަވާބުދާރީވެވަޑައިގަތުމަށް ރިފްއަތަށް، ޖުމްލަ ވަގުތުގެގޮތުގައި 30 މިނިޓު އެރުވުމަށް މަޖިލީހުގެ އާއްމު ކޮމިޓީން ވަނީ ނިންމާފައެވެ. އެއީ ބަހުސް ފެށުމަށް 10 މިނިޓް، ބަހުސްގެ މެދުތެރެއިން 10 މިނިޓް، އަދި ބަހު ނިންމުމަށް 10 މިނިޓެވެ. ނަމަވެސް 31 ވަނަ ދުވަހުގެ ޖަލްސާއަށް ބަންޑާރަނައިބު ޖަވާބު ފޮނުއްވާފައިވަނީ ސިޓީފުޅަކުންނެވެ.
އެއާއެކު، އެއީ އިދާރީ މައްސަލައެއްކަން ފާހަގަކުރައްވައި، މެމްބަރަކު މަޖިލީހުގައި ނިޒާމީ ނުކުތާއެއް ނެންގެވިއެވެ. މަޖިލީހުގެ ރައީސް ވަނީ އެ ނިޒާމީ ނުކުތާ ބަލައިގަންނަވައި، އެ މައްސަލަ ކުރިއަށް ނުގެންދަވަން ނިންމަވާފައެވެ. އެކަމާގުޅިގެން ބުރާސްފަތި ދުވަހު މަޖިލީހުގެ ރައީސް މުހައްމަދު ނަޝީދަށް އެޑްރެސްކުރައްވައި ރިފްއަތު ވަނީ ސިޓީފުޅެއް ފޮނުއްވާފައެވެ. އެ ސިޓީފުޅުގައި ރިފްއަތު ވިދާޅުވީ، އެމަނިކުފާނުގެ އިތުބާރު ނެތްކަމުގެ މައްސަލާގައި ލިޔުމުން ދިފާއު ހުށަހެޅުއްވީ، މައްސަލަ ބިނާކުރާ މައިގަނޑު މައްސަލައަކީ ގިނަ ވާގިއާތަކާއި ގާނޫނީ ނުކުތާތަކެއް އެކުލެވޭ މައްސަލައެއް ކަމަށް ވާތީކަމަށެވެ. އަދި ލިޔުމުން ޖަވާބު ހުށަހެޅުއްވި އަނެއް ސަބަބަކީ އެމަނިކުފާނުގެ އިތުބާރު ނެތްކަމުގެ މައްސަލަ އެ ކަމެއްގެ މައްޗަށް ބިނާކުރާ މައްސަލައަކީ ދިވެހި ދައުލަތް ތަމްސީލްކުރުމުގެ ވާޖިބު އަދާކުރެއްވުމުގެ ގޮތުން އަމަލުކުރެއްވި ގޮތާ ބެހޭގޮތުން ހަގީގަތް އޮޅޭ ގޮތަށް ދައްކަވާފައިވާ ވާހަކައަކަށްވާތީ، އެކަން ހާމަކޮށްދެއްވުމަށް ކަމަށް ރިފްއަތު ވިދާޅުވިއެވެ.
އެހެންނަމަވެސް ލިޔުމުން ޖަވާބުދާރީވެވަޑައިގަތުމުގެ ފުރުސަތު 31 މެއިގެ ޖަލްސާގައި ދެއްވާފައި ނުވާތީ، ގާނޫނު އަސާސީގައިވާ ގޮތުގެ މަތީން، އަނގަބަހުން ދިފާއުގައި މަސައްކަތްކުރެއްވުމުގެ ހައްގު އިޚުތިޔާރުކުރައްވަން އެދިވަޑައިގަންނަވާކަމަށް ރިފްއަތު ވިދާޅުވިއެވެ. އެހެންކަމުން މި މައްސަލައިގެ ބަހުސް އޮންނަ ދުވަހު މަޖިލީހަށް ހާޒިރުވެވަޑައިގެން ޖަވާބުދާރީވެވަޑައިގަތުމަށް ފުރުސަތު އެރުވުމަށް ރިފްއަތު ވަނީ އެދިވަޑައިގެންފައެވެ.
