ޕީޖީ ވަކީލުން ކޯޓަށް ފިލީ، ގާސިމްގެ މައްސަލަ އަލުން ހުށަނޭޅޭނެ : ހިސާން
މައްސަލަ އަލުން އަނބުރާ ގެންދެވޭނީ ފުރަތަމަ އަޑުއެހުމުގެ ކުރިން
ގާސިމްގެ ވަކީލް ހިސާން ހުސެއިން
ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މައްޗަށް އުފުލި ތިން ދައުވާގެ ޝަރީއަތުގެ އަޑުއެހުމަށް ޕްރޮސެކިއުޓާ ޖެނަރަލް އޮފީހުގެ ވަކީލުން ވަޑައިނުގަނެގެން މައްސަލަ ބޭރުކޮށްލާފައިވާއިރު އަލުން އެ މައްސަލަތައް ކޯޓަށް ހުށަނޭޅޭނެ ކަމަށް ގާސިމްގެ ވަކީލް ހިސާން ހުސެއިން ވިދާޅުވެއްޖެ އެވެ.
ގާސިމްގެ މައްސަލަތައް ކޯޓުން ބާތިލް ކުރުމާ ގުޅިގެން ކޯޓުން ނިކުމެވަޑައިގެން ނޫސްވެރިންނާ ވާހަކަ ދައްކަވަމުން ހިސާން ވިދާޅުވީ ގާސިމްގެ މައްސަލާގެ ޝަރީއަތުގެ އަޑުއެހުން މެދުކަނޑާލުމަށްފަހު ފެށިއިރު ކޯޓަށް ވަޑައިނުގަނެ ޕީޖީ އޮފީހުގެ ވަކީލުން "ފިއްލެވީ" ކަމަށެވެ. ޖިނާއީ އަދުލުގެ ނިޒާމް ނަގަހައްޓަން ތިބި ބަޔަކު އެގޮތައް އަމަލު ކުރުމަކީ ވަކީލުން އޭގައި ކަންބޮޑުވާ ކަމެއް ކަމަށް އޭނާ ވިދާޅުވި އެވެ.
މިހާރު އަލަށް އަމަލު ކުރަން ފަށާފައިވާ ޖިނާއީ އިޖްރާއަތުގެ ގާނޫނުގެ ދަށުން މައްސަލައެއް ޕްރޮސެކިއުޓާ ޖެނަރަލް އޮފީހަށް އަނބުރާ ގެނެވޭނީ އިބްތިދާއީ އަޑުއެހުން ނިމުމަށްފަހު ފުރަތަމަ އަޑުއެހުން ފެށުމުގެ ކުރިން ކަމަށް ހިސާން ވިދާޅުވި އެވެ.
އޭގެ ފަހުން މައްސަލައެއް އަނބުރާ ގެނައުމުގެ ބާރު ޕީޖީއަށް ލިބިގެންނުވާ ކަމަށް އޭނާ ވިދާޅުވި އެވެ. އަދި ގާސިމްގެ މައްސަލަ ކްރިމިނަލް ކޯޓުން ބޭރުކޮށްލީ ހެކިބަހާމެދު ވާހަކަ ދެއްކުމުގެ މަރުހަލާގައި އޮއްވަ އެވެ.
"ޖިނާއީ އިޖްރާއަތުގެ ގާނޫނު ތަނެއް ނުދޭ މި މަރުހަލާގައި އޮތް މައްސަލަ އެއް އަލުން އެ މައްސަލަ އެ ވާގިޔާތަކުގެ މައްޗަށް އުފުލާކަށް. ގާސިމްގެ މައްޗަށް މި ދައުވާތައް ކުރުމަކަށް. ގާނޫނު އަސާސީވެސް ތަނެއް ނުދޭ މި ދައުވާތައް އަލުން ކުރާކަށް،" ހިސާން ވިދާޅުވި އެވެ.
ގާސިމްގެ މައްޗަށް ދައުލަތުން ވަނީ ރިޝްވަތު ދިނުމަށް ހުށަހެޅުމާއި، ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވަން އުޅުމާއި، ވޯޓު ދޭން ހުރި މީހަކަށް ނުރަނގަޅު ނުފޫޒު ފޯރުވަން އުޅުމުގެ ދައުވާ އެވެ.
މި މައްސަލަތަކުގައި އަންގާރަ ދުވަހުގެ މެންދުރު ފަހު ބޭއްވި ޝަރީއަތުގެ މަޖިލީހުގައި ގާސިމްގެ ދިފާއީ ވަކީލް ހިސާން ހުސެއިން ވިދާޅުވީ ޖިނާއީ އިޖުރާއަތުގެ ގާނޫނުގެ 115 ވަނަ މާއްދާގެ ދަށުން އެ ތިން ދައުވާ އިތުރަށް ކުރިއަށް ނުގެންދެވޭނެ ކަމަށް ކަނޑައަޅަން ޖެހޭ ކަމަށެވެ.
ޖިނާއީ އިޖުރާއަތުގެ ގާނޫނުގެ 115 ވަނަ މާއްދާގައި ބުނެފައިވަނީ ދައުވާއަށް ޖަވާބުދާރީވުމަށް ލިބޭ ފުރުސަތުގައި ދައުވާ ލިބޭ ފަރާތުން ދައުވާއަށް އިންކާރުކޮށްފި ނަމަ ހުށަހެޅިފައިވާ ދައުވާއަށާއި އެ ދައުވާ ސާބިތު ކުރުމަށް ހުށަހަޅާފައިވާ އެންމެހާ ހެއްކަށް ރިއާޔަތްކުރާއިރު ދައުވާ ރައްދުވާ ފަރާތުގެ މައްޗަށް ދައުވާ ކުރެވޭނެ ތަނެއް ނެތް ކަމަށް މަދަނީ މިންގަނޑަށް ބަލާއިރު ފަނޑިޔާރަށް ގަބޫލު ކުރެއްވިއްޖެ ނަމަ އެ ދައުވާ އިތުރަށް ކުރިއަށް ގެންދެވޭނެ ތަނެއް ނެތް ކަމަށް ކަނޑައަޅާ އެއީ ބާތިލް ދައުވާއެއް ކަމަށް ކަނޑައަޅަން ވާނެ އެވެ.
ހިސާން ނެންގެވި ނުކުތާއާ ގުޅޭ ގޮތުން ދައުލަތުގެ ވަކީލު ވިދާޅުވީ ޖިނާއީ އިޖުރާއަތުގެ އެ ގާނޫގައި ބުނާ ގޮތުން މައްސަލަ ބޭރު ކޮށްލުމުގެ ބާރު ލިބިފައިވަނީ ފަނޑިޔާރުން ނަށް ކަމަށްވާތީ އިތުރު އެއްޗެއް ބުނަން ބޭނުން ނުވާ ކަމަށެވެ. އަދި ގާނޫނަކުން ލިބެން ޖެހޭ ލުޔެއް ލިބެންވާނެ ކަމަށެވެ.
ނަމަވެސް މައްސަލަ ބޭރުކޮށްލުމާމެދު ގޮތެއް ނިންމުމަށް ޝަރީއަތުގެ އަޑުއެހުން ހަވީރު މެދު ކަނޑާލުމަށްފަހު އަލުން ޝަރީއަތް ބާއްވަން އޮތް ގަޑިއަށް ޕީޖީގެ ވަކީލުން ވަޑައެއްނުގަންނަވަ އެވެ. އެއާ ގުޅިގެން މައްސަލަ ބޭރުކޮށްލުމަށްފަހު ކްރިމިނަލް ކޯޓުން ގާސިމަށް ދޫކުރި ލިޔުމުގައި ވަނީ ޕީޖީގެ ވަކީލުން "ގަސްތުގައި" ވަޑައިނުގެންނެވީ ކަމަށާއި އަދި ކޯޓުން ތަކުރާރުކޮންވެސް ގުޅައިގެން އެންގުމުންވެސް ކޯޓަށް ހާޒިރުވެފައިނުވާ ކަމަށެވެ.
