ރަށްރަށުން ތަރައްގީ ފެނޭ، އިތުރަށް ތަރައްގީ ކުރުމަށް މިސަރުކާރާއެކު މަސައްކަތް ކުރަންޖެހޭ: މެންބަރު ހަލީމް
29 މެއި 2023 | ހޯމަ 06:32ޖެހޭ މައްސަލަތައް މަޝްވަރާކޮށްގެން ހައްލު ކުރަންޖެހޭ
ރައީސް އިބްރާހީމް މުހައްމަދު ސާލިހު ފ.އަތޮޅަށް ކުރެއްވި ދަތުރުފުޅުގެ ތެރެއިން ރައްޔިތުންނާއި މުޚާތަބު ކުރައްވަނީ
އަތޮޅުތެރޭގެ ރަށްރަށުން ތަރައްގީ ފެންނަ ކަމަށާއި، އިތުރަށް ރަށްތައް ތަރައްގީ ކުރުމަށް ކުރިއަށް އޮތް ފަސް އަހަރު ވެސް މިސަރުކާރާއެކު މަސައްކަތް ކުރަންޖެހޭ ކަމަށް ބިލެއްދޫ ދާއިރާގެ މެންބަރު އަހުމަދު ހަލީމް (ދޮންބިލެއް) ވިދާޅުވެއްޖެއެވެ.
ފ.ފީއަލީގެ އައު އިންޖީނުގެއާއި އޮފީސް އިމާރާތް އަދި އައިސް ޕްލާންޓް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި މެންބަރު ހަލީމް ވިދާޅުވީ ފިއަލި އަކީ ޒަމާނުއްސުރެ އެކުވެރި ރަށެއް ކަމަށެވެ. ނަމަވެސް އިތުރަށް އެކުވެރިކަން ބަދަހިކުރަންޖެހޭ ކަމަށާއި، ސަރުކާރާއި އޮންނަ ގުޅުން ގާއިމްކުރަންޖެހޭ ކަމަށެވެ. އަދި ޖެހޭ މައްސަލަތައް މަޝްވަރާކޮށްގެން ހައްލު ހޯދަންޖެހޭ ކަމަށް އޭނާ ވިދާޅުވިއެވެ.
މެންބަރު ހަލީމް ވިދާޅުވީ މިދަނޑިވަޅަކީ ތަރައްގީ ގެނެވޭނެ ދަނޑިވަޅެއް ކަމަށާއި، އެކަމުގެ ފައިދާ އެންމެ އެދެވޭގޮތުގައި ނެގުމުގެ ބާރު އޮތީ ރައްޔިތުންގެ އަތް މަތީގައި ކަމަށެވެ. އެހެންކަމުން އެކުވެރިވެ، އެކުގައި މަސައްކަތްކޮށް، ރަށަށް ތަރައްގީ ގެނައުމަށް އެންމެން އެކުގައި މަސައްކަތް ކުރަންޖެހޭ ކަމަށް ވެސް އޭނާ ވިދާޅުވިއެވެ.
އެންމެފަހުން ބޭއްވިގެން ދިޔަ ރައްޔިތުން މަޖިލީހުގެ އިންތިޚާބުގެ ދުވަސްވަރަށް އަލިއަޅުއްވާލައްވައި މެންބަރު ހަލީމް ވިދާޅުވީ އެދުވަސްވަރު ފީއަލީގެ ރައްޔިތުން ތިބީ މާޔޫސްވެފައި ކަމަށާއި، ތަރައްގީގެ އެއްވެސް މަޝްރޫއެއް ކުރިއަށް ގެންދެވޭނެ ކަމުގައި އުންމީދެއް ނެތް ކަމަށެވެ. ނަމަވެސް އެދުވަހު ވެސް ރައްޔިތުންނާއި މަޝްވަރާކޮށް ވަރަށް ގިނަ އުންމީދުތައް އައުކޮށްދިން ކަމަށް މެންބަރު ވިދާޅުވިއެވެ. އަދި ވިދާޅުވީ އާބާދީ ކުޑަ ނަމަވެސް މިސަރުކާރަކީ އެއްވެސް ރަށެއް ބާކީނުކޮށް ތަރައްގީ ގެނެސްދޭނެ ސަރުކާރެއް ކަމަށެވެ. އެކަން މިއަދު ރާއްޖޭގެ ހުރިހާ ހިސާބަކުން ފެންނަމުންދާ ކަމަށް މެންބަރު ހަލީމް ވިދާޅުވިއެވެ.
ފީއަލީގައި ގިނަ މަޝްރޫއުތައް ކުރިއަށްގެންދާކަން ފާހަގަކުރައްވައި ބިލެއްދޫ ދާއިރާގެ މެންބަރު ހަލީމް ވިދާޅުވީ ބައެއް މަޝްރޫއުތައް ނިމި، އަނެއް ބައި މަޝްރޫއުތައް ނިންމުމަށް އަމާޒު ހިފައިވާ ކަމަށެވެ. އެގޮތުން ކުރިއަށް އޮތްތަނުގައި ފީއަލީގެ ރައްޔިތުން ބޭނުންވާ ގޮތަށް ބިން ހިއްކިގެންދާނެ ކަމަށާއި، އެބިމުގައި ބޯހިޔާވަހިކަމަށް ބޭނުންވާ ހައުސިން ޓަވަރުތައް ގާއިމް ކުރެވިގެންދާނެ ކަމަށް އުންމީދު ކުރާ ކަމަށެވެ.
މީގެ އިތުރުން އޭނާ ވިދާޅުވީ އެ ރަށަކީ ވޮލީ ކުޅޭ ގިނަ އަދަދެއްގެ ޒުވާނުން ދިރިއުޅޭ ރަށަކަށްވާތީ އެޒުވާނުންނަށް ޚާއްސަކޮށްގެން އިންޑޯ ސްޓޭޑިއަމެއް އެޅުމަށް ކުރަންޖެހޭ މަސައްކަތްތައް ކުރަމުންދާ ކަމަށާއި، ދާދި އަވަހަށް އަމަލީ މަސައްކަތް ފެށޭނެ ކަމަށެވެ. އަދި ކުރިއަށް އޮތްތަނުގައި ފުޓްބޯޅަ ދަނޑުގެ މަސައްކަތް ވެސް ކުރެވޭނެ ކަމަށް ވެސް މެންބަރު ވިދާޅުވިއެވެ.
ފީއަލީގެ ސްކޫލަށް އިޝާރަތް ކުރައްވައި މެންބަރު ވިދާޅުވީ ސްކޫލު ތަރައްގީ ކުރުމަށް ވެސް ޚާއްސަ ޕްލޭނެއް އެބަ އޮތް ކަަމަށެވެ. އެގޮތުން ކުރިއަށް އޮތްތަނުގައި ސްކޫލުގެ މަލްޓިޕާޕަސް ހޯލް އެޅުމާއި، ތިން ކްލާސް ރޫމް އެޅުމުގެ މަސައްކަތް ކުރާނެ ކަމަށެވެ. އަދި ސައެންސް ލެބް އެޅުމުގެ މަސައްކަތް މިހާރު ކުރިއަށްދާކަން އޭނާ ފާހަގަކުރެއްވިއެވެ.
ބިލެއްދޫ ދާއިރާގެ މެންބަރު ވިދާޅުވީ ތަރައްގީގެ މަޝްރޫއުތައް ކުރިއަށް ގެންދިއުމުގައި ދަނޑިވަޅާއި ހާލަތަށް ބަލާ ކަމަށެވެ. މިހާރު ކުރިއަށް ގެންދަނީ ރައްޔިތުންނަށް އެންމެ ބޮޑަށް ބޭނުންވާ ތަރައްގީގެ މަޝްރޫއުތައް ކަމަށް އޭނާ ވިދާޅުވިއެވެ. އަދި ވިދާޅުވީ ކުރިއަށް އޮތްތަނުގައި ބަނދަރު ވެސް ބޮޑު ކުރެވިގެންދާނެ ކަމަށާއި، ރަށުގެ މަގުތައް ޒަމާނީ ފެންވަރަށް ތަރައްގީ ކުރެވި ތާރުއެޅިގެންދާނެ ކަމަށެވެ. މީގެއިތުރުން މިމަޝްރޫއުތައް ކުރިއަށް އޮތްތަނުގައި ކުރިއަށް ގެންދިއުމަށް ރައްޔިތުން ސަރުކާރާއެކު މަސައްކަތް ކުރަންޖެހޭ ކަމަށާއި، އެކުވެރިކަމާއި އެއްބައިވަންތަކަން އިސްކުރަންޖެހޭކަން ފާހަގަކުރައްވާ މެންބަރު ހަލީމް ވިދާޅުވީ ކުރިއަށް އޮތް 5 އަހަރުގެ ވެސް ރައީސް އިބްރާހިމް މުހައްމަދު ސާލިހަށް ކާމިޔާބު ކޮށްދިނުމަށް މަސައްކަތް ކުރަންޖެހޭ ކަމަށެވެ.
